2
Niniwe hae tâtieocmu irec biŋedâŋ
1 O Niniwe hae, sisipiric ŋiczi fisi‐garezo ekac,
irec go haesacko ruc bapa ŋic râec‐jopahuc hata soŋaŋkezemec,
erâ bifuŋge jomarâ hâbihec juzemec.
2 (Wofuŋ e Jakobo â Israe jahere waiŋ qizec emasaŋkerâ bâpiaŋkeocmu,
ima bapa ŋic jaŋe waiŋ qizecne ima bahuc
qaŋeŋne mâmâc sipirickembiŋ irec.
3 Ŋicfâc‐ticne tâpiri wânʒâŋhec jaŋere maro i bâbâroŋ,
â momorifâc‐ticne jaŋe ŋaqi saŋ bâbâroŋ iŋucne rojuŋgopieŋ;
keretac wiac‐ticne mume birickerâ ʒocbâruŋ iŋucne tamaeŋgopieŋ,
â becâsic jaŋe kâŋ herâ fahare hâŋ domaŋgopieŋ.
4 Keretac jaŋe haere hatao fâfâcnehec gasackerâ raŋgopieŋ,
ehuc gagasac jaha hae ʒoŋao rac warec ehuc domaŋgopieŋ;
jaŋe waha iŋucne bâruŋkeŋgopieŋ,
â bâbâric iŋucne tamaeŋgopieŋ.
5 Momori micne hetumaŋ‐jopakicne jaŋe rahuc
hehetuŋ erâ gasackehuc sacko fisirâ
sâsâoc boze‐jeŋic biac wirepie domakac.
6 Opâ kanaŋte motâc ropie ŋicwofuŋ ficko juŋgopieŋ
jaŋe fâfârerâ hemâtâc‐jopakac.
7 Ŋicwofuŋ ŋonâŋ‐ticne e ine ŋaqi‐ticne heunuckerâ
kâpâcwâruo baraŋgopieŋ,
ehame kiŋaŋ narufâcne jaŋe hapâ iŋucne kio huse eŋgopieŋ,
ehuc amec‐jeŋic bomackeŋgopieŋ.
8 Niniwe hae i opâ nombâŋ mockonec opâzi rafâreekac irec sâc,
ehame, “Domaniŋ, domaniŋ!” iŋuc muhuc wirapie
moczi moc mi forisiekac.
9 Siliwa mecne, gol mecne fiucke‐fâreniŋ!
Moneŋ mafa me wiac furi sâko i oomaene tâmiric ɋâfoŋnea fokac.
10 Ima samaki â niniŋ siarereŋ fuarâ fokac.
Ŋic maŋjeŋic omaeme kike‐jeŋic ɋarac ɋarac qakac,
â sahac‐jeŋiczi ʒâic fârohec eha
ʒâŋe mai‐jeŋiczi weaŋkekac.
11 Laioŋ jaŋere fofo hae wena,
â motecfâc‐jeŋic jaŋere qânâ hawec i wena?
Laioŋ e qowi qarâ hae ira hâcne kisoŋkerâ rajujec,
â motecfâcne jaŋe hae ira juhapie
moczi moc serereŋ mi ejare jujec.
12 Laioŋ ŋicnezi ŋokac motecfâcne jaŋere sâc qowi qajujec;
qowi qawec â kisuc qâsuckewec i bararâ
qânâ hawecko â fofo hae‐ticnao râeme fuse jujec.
Niniwe hae i tâtie‐jâmbâŋkeocmu
13 Manakic, no râsi egarerâ keretac wiacge ʒoczi turuŋkepe ʒazejec, ehame laioŋfâcge motecne jaŋe ʒikare nânâ enʒepieŋ. Go wiac fiuc rotec sesuc sembureŋ fewec i mupe omaezejec, eme kiŋaŋŋicfâcge jaŋere marac fânâŋ mocwâc mi fuazejec, Anutu Tâpiri Ɋuŋɋasaŋ Wofuŋ nore dâŋ iŋuc.