1 Eme Abraham e guŋpitic eme qoruc boze‐ticnere motâcko ŋehame Wofuŋzi Mamere boriŋ gieo fuacnewec. 2 Eme qâhâŋnerâ ʒâŋe fime feme mi ŋic jahec â moc ututuŋ jaha mainao domapie honec‐jopazejec i! Honec‐joparâ izia boze motâckonec faharerâ gasacke ra bâfuac‐jopahuc mâreŋko fodaperâ 3 ʒiŋuc muwec: “Ŋicbomboŋ‐nane, go nore manatec biaŋkekacko kiŋaŋŋicge no mi nowaruzemec. 4 Mupe opâ bawarepie kike‐ŋeŋic ʒurerâ jâc mumucko waha ŋemananiŋ. 5 Ehame no nahac ine ra poroŋ mac moc roŋarepe nâqiŋnerâ razo murâ ranʒepieŋ. Kiŋaŋ qaqa‐ŋeŋic norao mac fisiŋgopieŋte weniŋuc qâoma ezo!” Mume mumbiŋ: “Sâcne, mukomec iŋuc ec.” 6 Eme Abraham e biac qoruc bozeo ferâ Sara âzâcnewec: “Ajoc, go poroŋ uucne fifia râqâc jahec â moc fiarâ bâsifuckerâ poroŋ rikec.” 7 Abraham e iŋuc murâ gasacke rarâ bulimakao motecne urucne biaŋne moc bâwosâehuc kiŋaŋ motec râcneme eki picpac jaha hezu rikec ewec. 8 Eme susu opâne â wokemaŋne erâ bulimakao motecne rike bâmoc ekicne i mâmâc ro baware jarewec; eme jaŋe nâhuc ŋehapie e jahacne jâc mumucko domawec.

9 Eme jaŋe wiocnembiŋ: “Ŋonâŋge Sara e wena?” Eme muwec: “E bozeo ŋekac.” 10 Eme moc eki muwec: “No jara faicnao dameŋ ʒiŋucnea mocwâc gorao warepemu, eme Sara e kogoc baŋeocmu.” Sarazi ine motâc râpenao soŋkerâ hazec râehuc domawec. 11 Abraham â Sara jahe ine biac jara‐jekic bocjaha bazurâ ŋic ŋokac qizec epic, irec Sara e kogoc rorore sâc mocwâc mi ewec. 12 Irec Sara e maŋzi ʒiŋuc muhuc gâwiewec: “No sahac‐nane muzuckekicne â bomboŋ‐nane wâc ŋicqizec ekicnezi mocwâc hâpo mumuduc enacmu me?” 13 Eme Wofuŋzi Abraham ʒiŋuc wiocnerâ âzâcnewec: “Sara e wemocte ʒiŋuc muhuc gâwiekac: ‘No ŋokac qizec ekicnezi jâmbomac motec sâcne kiweckerâ ropemu?’ 14 Wofuŋzi wiac irec me irec moc bâipieocmu me? No jara faicnao dameŋ ʒiŋucnea mocwâc gorao risie warepemu eme Sara e ŋokâhec juocmu.” 15 Eme Sara e hâwickeme mickehuc muwec: “No mi gâwiepac.” Eki ine muwec: “Aricne, go gâwiemec.”

16 Eme ŋic jaŋe irecnec faharerâ Sodom haeopec raniŋte rambiŋ. Eme Abraham e hatao râec‐jopaocte jaŋehec mâmâc rambiŋ. 17 Rahuc Wofuŋ e maŋticnezi ʒiŋuc manawec: 18 “Abraham e ŋicguru sâko â sasanaŋhec eocte â eraonec jambuŋzi mâreŋne mâreŋne ŋic jaŋerao fotâcnehuc sâcjopaocte mupaŋkekicne. Irec no wiac ezo mukopac i Abraham wemocko hesoŋkecnepemu? 19 No e kecʒiŋuc muhuc rowosâepo hâcne: E ɋâricfâcne â kikefuŋfâcne jaŋe Wofuŋ nore hata jowatuhuc tiŋne â mitine juniŋte jaza qâmoc ejarezejec. Iŋuc eme no Wofuŋzi Abraham wiac biŋe qacnepo irec fârine sâcne bâfuacnepemu.” 20 Erâ Wofuŋzi muwec: “Sodom â Gomora haeonec ŋic jaŋere sâqocne i ŋemâcne jâmbâŋ fokacte jaŋere erâ mu owa sâko fuakac. 21 Irec no hurâ honepe, jaŋe jâmbomac mu owa norao wefume manapo irec sâcko wiac efârembiŋ me weniŋuc, irec fuŋne mana‐jâmbâŋkezo mukopac.”

22 Eme ŋic jajahec jahe irecnec faharerâ Sodom haeopec rahapire Wofuŋzi ine Abrahamhec ʒuhuckerâ domawec. 23 Eme Abraham e Wofuŋte maŋfuŋko ra domahuc muwec: “Go jâmbomac ŋic biaŋne â sâqocne mâmâc bâsirowec‐jopazo mukomec me? 24 Hae irec maŋnao ŋic tiŋne 50 juŋgopieŋko, irec go jaŋe mâmâc bâsirowec‐jopacmu me jaŋere erâ hae sifu mi akickenʒaŋ me? Iŋuc mac mi ezemec! 25 Go ŋic tiŋne â sâqocne mâmâc bâsirowec‐jopatecne tiŋne â sâqocne jahe sâc mocjaha ezipicte iŋuc mi ezemec. Go mâreŋ sâko mâreŋ irec mumutara sâko jukomeczi giege fâretiŋ jaha bazemec.” 26 Eme Wofuŋzi muwec: “No Sodom haeo ŋic tiŋne 50 bâfuac‐jopapemuo ine jaŋere erâ gâcne sâko wâc hone akic ejarepemu.” 27 Eme Abrahamzi âzâcnerâ muwec: “No gâc wândoc â ʒafe iŋucnezi sifu ropaŋ erâ Wofuŋ‐nane go dâŋ gazakopac. 28 Ŋic tiŋne 50 muhape jaŋeraonec 5 basac‐jopacmu mecne, eme go jâmbomac 5 jaŋere erâ hae sâko bâsirowecmu me?” Mume muwec: “No ira 45 bâfuac‐joparâ hae i ima mi bapemu.” 29 Eme Abrahamzi ine mocwâc ʒuhuckerâ ʒiŋuc muhuc âzâcnewec: “Me ŋic 40 sawa bâfuac‐jopa wiac moc ecmu?” Eki muwec: “No 40 jaŋere erâ mi epemu.” 30 Eme Abrahamzi muwec: “No dâŋ ʒuhuckerâ mupe Wofuŋ‐nane go sifu mana‐naretec mi sâqoreoc: Ŋic 30 sawa bâfuac‐jopacmu mecne.” Eki muwec: “No 30 bâfuac‐joparâ mi epemu.” 31 Eme Abrahamzi muwec: “No Wofuŋ‐nane gohec muc manac ezore ropaŋ epac, ŋic 20 sawa ira bâfuac‐jopacmu mecne.” Wofuŋzi muwec: “No 20 jaŋere erâ hae i mi bâsirowepemu.” 32 Eme Abrahamzi muwec: “O Wofuŋ‐nane, no arec mocjaha sawa mac ʒuhuckerâ mupe sifu mi mana sâqore‐narezemec: Ŋic 10 sawa bâfuac‐jopa wiac moc etec!” Eki muwec: “No 10 jaŋere erâ hae i ima mi bapemu.” 33 Wofuŋ e Abrahamhec dâŋ iŋuc mutararâ rawec. Eme Abrahamzi hae‐ticnao risiewec.