1 Hae owâeme aŋelo jajahec jahe Sodom haeo fisipic. Eme Loti e Sodom haesac motâcko ŋehuc honec‐jofarâ izia fahare ra bâfuac‐jofarâ maŋfuŋ‐jekicko fodapehuc muwec: 2 “Ŋicbomboŋ jahec‐nane, ŋohe miŋecgac ŋafeo kiŋaŋ qaqa‐ŋekic nore ficko ferâ kike‐ŋekic ʒurerâ ŋec foc enic. Tomâcko furicte ine sâcne faharerâ hata ʒuhuckerâ razepirec.” Jahe mupic: “Aricne, nâhe ŋafe ʒi hae ʒoŋao fonacmu.” 3 Eki ine mâretec hota‐jacteme sifu ficticnao fepic. Eme hezu hewâneŋ ejactehuc poroŋ goreŋ tâmiric rike‐jacteme nâpic. 4 Jahe ine guŋ mi fohapire hae irecnec ŋic, Sodom ŋic hâcne, ŋic â motec mâmâc sasawa jaŋe ware fic orâŋkerâ 5 Loti wiracnehuc ʒiŋuc âzâcnembiŋ: “Ŋafe ʒira gorao ŋic fisipirec jahe wena? Jowac‐jofa wahatecne bâsâqorec‐jofanaŋ.” 6 Eme Loti e jaŋerao hurâ motâc râpenao ki bawec. 7 Erâ muwec: “Âgofâc‐nane, wiac sâqocne iŋucne moc mi eniŋ. 8 Manaŋgopieŋ, nore otâ jajahec jukopirec, jahe ŋichec moc mi jupic. No jahe jowac‐jofa wahape wiac iŋuc me iŋuc ejactezo murâ ejacteniŋ. Mocjaha, ŋic ʒi jahe ine wiac moc mi ejactenʒepieŋ, jahe nore ficko wefupirec i!” 9 Jaŋe ine mumbiŋ: “Go wisec!” Erâ âzâcnembiŋ: “Go wiwickonec warekicnezi ŋondeŋ‐nâŋecko jaba juhuc mutiŋ‐nâpozo mukic me? Nâŋe jahe wiac ejactezo mumbeneŋ irec sâc sirickehuc go egarenaŋmu.” Jaŋe iŋuc murâ Loti ro fârec ecnehuc motâc qanʒaŋnezo fuŋkembiŋ. 10 Eme ŋic jahe mejekic sicnerâ Loti ficko fârepire feme motâc ki bapic. 11 Eme ŋic kâcɋene â piticne fic orâŋkembiŋ jaŋe ine tiŋtuŋ bacjopapire motâc basambiŋ.

12 Eme ŋic jahe Loti ʒiŋuc âzâcnepic: “Âgofâcge ʒira moc juŋgopieŋ me? Kimofâcge me ŋokâ otâfâcge me wiacfâcge gâcne, jaŋe ejaretec hae ʒi beherâ wisenʒepieŋ. 13 Nâhe hae ʒi ima bazo ekoperec. Hae ʒirec ŋic jaŋere erâ mu owa sâko Wofuŋtao fuawec, irec Wofuŋzi hae ʒi ima banacte sorec‐nâfome wareperec.” 14 Eme Loti e ra otâ jahec‐ticne jahere ŋicbiŋe ʒiŋuc jasawec: “Ajoc, fahare wiserâ ranic! Wofuŋzi hae ʒi ima bazo ekac.” Jahe ine manapire ʒoraŋ ekac tinac ewec.

15 Eme furic râeme aŋelo jahe Loti fâro ecnehuc mupic: “Ŋic ʒi jaŋere sâqocnere erâ mâmâc hâmozicte fahare ŋonâŋge â otâ jahecge ʒi rocjopatec wiserâ raniŋ!” 16 Eme e bititiehuc domame aŋelo jahe Wofuŋzi akickeocte muwecte e â ŋonâŋ‐ticne â otâ jahec‐ticne mejeŋicko rocjoparâ haeonec jowac‐jopa hurâ hae mendâŋnao râec‐jopahuc 17 moczi ʒiŋuc âzâcnewec: “Ajoc, go mâmâc sipirickezicte wiserâ razemec! Erâ forisie mi fizemec â Jordaŋ wâneŋko ŋec domac wâc mi ezemec! Sipirickezicte tikio wiserâ fezemec!” 18 Eme Lotizi ʒiŋuc muwec: “Ŋicbomboŋ‐nane, iŋuc mâcne. 19 Go kiŋaŋ qaqage no aki anonoc enarehuc akicnumec. Noni ine tikio sâcne mi wiserâ fepemu, ira wiac hâhâwicne moc fua‐nareme hâmozipohec. 20 Manakic, hae piticne mac kecocni i bembeŋko ŋekac, irec mana‐naretec ira ra juzepac. No ira sâcne jupemu.” 21 Eki ʒiŋuc muwec: “No i wâc mana‐garehuc hae mukomec i ima mi bapemu. 22 Mâc go ira mi fisihaŋtec no wiac moc ezo murâ eipiezipore gasackehuc wiserâ ira rac!” Irec hae irec ʒâŋe Zoari* Nâŋâcne dâŋko: Piticne. mukicne. 23 Eme ʒoaŋ wefuhame Lotizi Zoari haeo ra fisiwec.

24 Eme Wofuŋzi mume Sodom â Gomora haeo ʒoc hoe kâmbâc iŋucne sambâŋkonec waharâ 25 wâneŋ ira hae ŋerawec â ŋic sasawa â mâreŋko wiac doma rawec i ʒâseŋ‐jopa‐fârewec. 26 Loti ŋonâŋ‐ticne e ine forisie firâ izia hâwec qânâ ewec. 27 Eme hae fureme Abraham e Wofuŋte maŋfuŋko domawec hae mâreŋ ira rarâ 28 Sodom â Gomora hae ŋepicko wâneŋ mâreŋ irapec ʒâŋe firâ hosâc sâko jâmbâŋ ŋezurâ feme honewec. 29 Ine hâcne, Anutu e Jordaŋ wâneŋko hae ŋerawec i ima bawec dameŋ ira Abrahamte manasuhuc Loti sisipirickonec jowa rarâ hae juwec i ima bawec.

30 Loti e ine Zoari haeo juocte hâwickeme otâ jahec‐ticne jahehec hae i beherâ tikio ferâ hawec mocko jumbiŋ. 31 Eme mârâc otâ‐ticnezi qoticne ʒiŋuc âzâcnewec: “Mamac‐nâhec e ŋicqizec, eme mâreŋ ʒirec ŋic moczi moc warerâ mâreŋŋic jaŋe eeŋgopieŋ irec sâcko mi enâcteocmu. 32 Ajoc, nâhâc mamac‐nâhec ecnepere waiŋ opâ nârâ maŋne sifuckeme ehec fonac, eraonec ɋâric fua‐nâcteocte.” 33 Eme ŋafe ira mamac‐jekic waiŋ opâ gumepire maŋne sifuckeme foha mârâc otâzi ferâ mamac‐ticnehec fowec. Erâ waha fowec â fahare rawec i mamac‐ticnezi mi manawec. 34 Ʒoaŋ faicnao mârâc otâzi qoticne ʒiŋuc âzâcnewec: “Manakic, no jacne ŋafeo mamac‐nanehec fopac, nâhâc miŋecgac ŋafeo iŋuc jaha waiŋ opâ gumepere maŋne sifuckeme goki ferâ ehec fozemec, nâhâc mamac‐nâhec eraonec ɋâric fua‐nâcteocte.” 35 Eme jahe ŋafe ira mamac‐jekic iŋuc jaha waiŋ opâ gumepire maŋne sifuckeme ʒâhec otâzi ferâ ehec fowec. Erâ waha fowec â fahare rawec i mamacnezi moc mi manawec. 36 Loti otâ jahec‐ticne jahe iŋuc ehuc mamac‐jekictaonec kiwec bâfuapic. 37 Eme mârâc otâzi motec moc rowec, ere ʒâŋe Moabi† Nâŋâcne dâŋko: Mamactaonec. muwec. Eki Moabi ŋic jaŋere apa ewec. 38 Eme ʒâhec otâzi iŋuc jaha motec moc rowec, ere ʒâŋe Ben‐Ami‡ Nâŋâcne dâŋko: Mamac‐nanere ŋokâ. muwec. Eki ine Amoŋŋic jaŋere apa ewec.