48
Wiac ɋâricne fuaocmu irec findaŋdâŋ
1 Jakobore kikefuŋ, Israe ʒâŋe muŋarekicne,
Judare bifuŋkonec fuambiŋ,
â Wofuŋte ʒâŋeo ɋetickehuc dâŋ mueŋgopieŋ
erâ dâŋ fâri qizecnere â tiŋne hatao mi juhuc
sifu Israere Anutu mutaniŋkeeŋgopieŋ
ŋoŋe hazec râeniŋ!
2 Ŋoŋe tiri haere ʒâŋe bajuhuc Israere Anutu,
ʒâŋene Anutu Tâpiri Ɋuŋɋasaŋ Wofuŋ,
erao roweckeeŋgopieŋ hâcne.
3 “Juwicnao wiac fuawec i mârâc jaha mufuapo,
irec dâŋ i micnaneonec wahawec erâ musokape manambiŋ;
eme no ututuŋ jaha mupe fârinehec ewec.
4 I ʒiŋuc manahuc epo: Go râŋgeŋ bârâŋgeŋne
â upe ruage i aeŋ iŋucne
â ʒâŋe maige i aeŋ bâbâroŋ irec sâc.
5 No esecne gazapo â mi fuahame mufua‐garepo
i ʒiŋuc muzicte: ‘Nemu‐nanezi ewec,
â nemuɋâŋ‐nane jâczi fasaekicne â aeŋzi bakicne eki mume fuawec!’
6 “Go wiac i hone manac efârerâ mutaniŋkezore mi mukomec me?
No miŋecgac fuŋkerâ dâŋ ɋâricne â soŋne kâuc bahuc jumeŋ
i mufua‐garepe manazemec.
7 Mârâc jaha mâcne, ʒine hâcne wiac i bâfuakopac;
go juwicnao irec biŋe moc mi manameŋ,
kecʒiŋuc muzicte: ‘Hâc, i mârâc jaha manapo i!’
8 Aricne, go irec dâŋ moc mi manameŋ, kâuc bahuc jumeŋ hâcne,
erâ dameŋ ira hazecge mi uŋtowec.
No ine fuŋnege ʒiŋuc manapo,
go doc bapa, erâ ʒâŋege ʒiŋuc muniŋmu:
Neŋgoc bumaŋkonecteaŋ maŋrâŋgeŋhec juju.
9 “No ʒâŋe‐nanere erâ kimbeŋ‐nane qamasekopac
â go mi sipirickecmurâ gore manasuhuc
ʒâŋe biŋe‐nanere erâ bunane bâmâteŋkekopac.
10 Manakic, no siliwa ʒocko rikepie wosâeekac irec sâc mâcne,
ʒârâ hâriŋte ʒocbâruŋko ba esâic egarekopac.
11 Ʒâŋe‐nane musoriŋkenʒipiŋte no nahacnere erâ ejâmbâŋkekopac;
â ʒâŋe biŋe‐nane i ŋic moc râcnepe mi rauckezejec.
Wofuŋzi Israe ŋic firuec‐jopaocmu
12 “O Jakobo, go dâŋnanere hazec râec,
â Israe hefârecgupo go manac:
No ijaha jupozi jukopac, no bâbâni erâ wâc ʒâhec.
13 Nore mezi mâreŋte hobeteŋne râewec
â mefâre‐nanezi sambâŋ fârewec forakac;
no wira‐jactehape izia mâmâc jaha faharepic domakopirec.
14 “Ŋoŋe sasawa tumaŋnerâ mananiŋ!
Jaŋeraonec mozi wiac i sasawa musokawec?
Wofuŋzi maŋjauŋ ecneekac eki hâcne dâŋ mu biric ewec
irec fârine Babe hae rune jaŋerao bâfuaocmu
â Kaldea ŋic jaŋerao meticnere fuŋne bataniŋkeocmu.
15 Noni hâcne mupo, noni wira hefârec ecnepo,
noni mupe ware fisiwec,
eme gie‐ticne bame fârinehec eocmu.
16 Ŋoŋe nore maio ware fuarâ dâŋ kecʒiŋuc mananiŋ:
No fuŋnaonecteaŋ dâŋ soŋne moc mi mupo, aricne,
no juhape jaha wiac fuarâ fowarewec.”
Ʒi ine Wofuŋ Anutuzi no â Mâro‐ticne nâhe sorec‐nâfowec.
17 Wofuŋ, fifiruege, Israere Tiri rune eki ʒiŋuc mukac:
“Noni Wofuŋ gore Anutu,
noni hâcne juhâmocmurâ dâŋ qazu‐gareekopac
ehuc hata âtecmurâ mugarekicne ira jowacguekopac.
18 Go micdâŋ‐nane mana rereŋ enʒaŋ muzac
wamage i opâ sâko iŋucne ezac
â tiŋne jujuge i hâwec siri qaekac iŋucne.
19 Ehame naru motecfâcge jaŋere ʒare i moŋgeŋ iŋucne ezac
â ɋâricfâcge jaŋe moŋgeŋ uucne iŋucne fuanʒapiŋ;
eme ʒâŋe‐jeŋic i nore maio sifuckerâ mi omaezac.”
20 Ŋoŋe Babe haeonec wahaniŋ,
Kaldea mâreŋkonec wiserâ raniŋ!
Erâ ʒeri fânâŋ ehuc dâŋ kecʒiŋuc musawepie
mâreŋ qaŋeŋnao fisime mananʒepieŋ:
“Wofuŋ e kiŋaŋŋic‐ticne Jakobo firuewec.”
21 Jaŋe mâreŋ sawao jowac‐jopaha opâre moc mi hâmombiŋ;
e qânâ bâmârâŋkeme opâ waha‐jarewec,
e qânâ qâfâuckeme opâ sâronehec wahahuc fowec.
22 “Ŋic hehesicne jaŋerao wama fuarâ fofo i mi fokac,”
Wofuŋzi iŋuc mukac.