49
Wofuŋte kiŋaŋŋic e ŋicne ŋicne jaŋere ʒoctamac
Nucne nucne ŋoŋe dâŋ mupe mananiŋ,
â ʒorickonec ŋicne ŋicne ŋoŋe hazec râeniŋ:
Wofuŋzi fuapoonecteaŋ hefârecnuwec,
neŋgoc bumaŋko fohape ʒâŋe‐nane mufuawec.
E micnane ʒika micnehec iŋucne bâfuawec,
ehuc meticnezi bâsoŋnuwec;
e tepe motec mictara iŋucne bacnuwec,
ehuc foŋticnao soŋnuwec.
Erâ ʒiŋuc nazawec: “Israe go kiŋaŋ qaqa‐nane,
no gorao hâcne ʒâŋe biŋe‐nane bafaharepemu.”
No ine ʒiŋuc manasupo: “No gie sâko maŋgâŋ bapo,
â tâpiri‐nane i fârine moc mi bâfuahuc
maŋgâŋ jâmbâŋ sipirickepo;
eme Wofuŋ e sifu dâŋnane dopeckekac
â furi‐nane i Anutu‐nanerao fokac.”
 
Ʒi ine neŋgoc bumaŋko fuŋkerâ kiŋaŋŋic‐ticne bâfuacnuwec
Wofuŋ eki hâcne Jakobore ŋicfâc erao bârisiec‐jopapemurâ
â Israe ŋic erao hetumaŋ‐jopapemurâ mukac;
Wofuŋzi nore maname fekac hâcne,
â Anutu‐nanezi tâpiri‐nane ekac.
E ʒiŋuc mukac: “Go Jakobore kikefuŋ gurune gurune
bafaharec‐jopazore sawa mâcne,
â Israere ŋic tiwâne mocwâc bârisiec‐jopazore sawa
kiŋaŋŋic‐nane mi bacgukopac, aricne,
go ŋicne ŋicne jaŋere ʒoctamac râecgupe
bâbâpiaŋ‐nanezi raku mâreŋ qaŋeŋnao fisizejec.”
 
Ŋic jaŋe hone suŋgiŋ ecneeŋgopieŋ
â ŋicne ŋicne jaŋe qaisockeeŋgopieŋ
erâ ŋicbomboŋ jaŋere kiŋaŋ qaqa jukac e hâcne Wofuŋ,
Israere fifirue â Tiri runezi ʒiŋuc âzâcnekac:
“Ŋicwofuŋ jaŋe honecgurâ gore maio faharenʒepieŋ
â fekicne jaŋe fodape‐garenʒepieŋ,
i Wofuŋ erâ‐eesanaŋ â Israere Tiri runezi go bâwosâecgupo
nore erâ iŋuc enʒepieŋ.”
Zioŋ hae mocwâc heɋârerâ baniŋte Anutuzi mupaŋke‐jarewec
Wofuŋzi ʒiŋuc mukac: “No aki anonoc dameŋko mana‐garepo
â bâbâpiaŋte dameŋko baficgupo,
erâ ŋezicguhuc ŋicne ŋicne jaŋehec ʒâʒâfic fuaocte râecgupo,
eme go mâreŋ bafaharerâ merâfâc wiac ima bakicne
i kâdoc qajarezemec.
Ehuc kâpâcwâru ŋic ʒiŋuc jazazemec: ‘Ŋoŋe wahaniŋ,’
â dapâcko ŋeeŋgopieŋ jaŋe jazac, ‘Ŋoŋe fua taniŋkeniŋ!’
Jaŋe hatamecko nânâ nâhuc junʒepieŋ
â tiki burocne sasawa ira nânâ opâ‐jeŋic bâfuanʒepieŋ.
10 Jaŋe nânâ opâre moc mi hâmonʒepieŋ
â mâŋâŋ fâronezi me ʒoaŋzi qa qâʒâic mi ejarezejec,
i busâqoc mana‐jareekaczi jowac‐jopa raku
opâ ʒâŋeo râec‐jopaocmu irec.
11 No tiki‐nane sasawa hewâneŋkepe hata efâreocmu
â hata sâko‐nane mupe biaŋkezejec.
12 Manakic, gâcne jaŋe ʒorickonec wareniŋmu,
â gâcne jaŋe mâreŋ faickonec â ʒoaŋ huhunaonec
â gâcne jaŋe Sewenim mâreŋkonec fisiniŋmu.”
13 Sambâŋne sambâŋne ŋoŋe semuja heniŋ,
mâreŋ go ʒeri fânâŋ ec, â tiki ŋoŋe kiwac qawac eniŋ!
Wofuŋ e ŋicfâc‐ticne bâmiriŋ‐jopawec,
e qarâ suriŋnefâc‐ticne busâqoc mana‐jarewec hâcne.
 
14 Zioŋ kikefuŋ eki ʒiŋuc mukac:
“Wofuŋ e behecnuwec,
Wofuŋ‐nanezi nore nikeckewec.”
15 Wofuŋzi ʒiŋuc mukac:
“Ŋokac moc e weniŋuc erâ kogoc‐ticnere sâcne nikeckeocmu,
ehuc bumaŋ‐ticnaonec motec fuawec
ere busâqoc mi manaocmu?
Ŋokac jaŋe irec moc nikec‐jopaocmu mecne,
no ine gore moc mi nikecnuocmu.
16 Manakic, no metape jahec‐naneo qâreŋgupo,
qânâsacge i dameŋ sâc honehuc jukopac.
17 Heɋârehuc bâpiaŋguniŋmuzi fâro ehuc fisiŋgopieŋ;
sipiricguhuc ima bacgumbiŋ
jaŋe ine behecgurâ raŋgopieŋ.
18 Go qâhâŋnerâ rârec rârec ʒâŋe fitec rame honec:
Jaŋe sasawa qâturerâ gorao fisiŋgopieŋ.
Wofuŋzi mukac: No jujâmbâŋkekopaczi mukopac,
go ŋic i jaŋe sasawa eri iŋucne qonaŋ‐jopazemec,
ŋokac ʒeŋoŋ moczi umbika‐ticne jomaekac irec sâc jomac‐jopazemec.
 
19 “Jâmbomac, fic haege heropiekicne sesucne sawa fokac
â mâreŋge ima bakicne i piticnere
dameŋ ʒiŋuczia ŋecjucfâc‐ticne mocwâc mi sâcjopaocmu,
ehame sipiricgumbiŋ jaŋe ʒoricko jufâreniŋmu.
20 Eme naru motec tâmiric jukomec gore ɋâricfâc fuarâ
dâŋ kecʒiŋuc mupie hazecgao huocmu:
‘No hae mâreŋ ʒirec manape piticne ekac,
irec go sawane moc bâfua‐naretec ŋec juc ezepac.’
21 Goki ine maŋgao ʒiŋuc mucmu:
‘Keci jaŋe mozi rocjopa‐narewec?
No hufiŋne erâ naru motec tâmiric jupo,
no kâpâcwâruo bacnu rakicne â jâpecnukicne;
ehame keci jaŋe mozi hone maiŋ ejareha sokambiŋ?
No tiwâne bucnane jupo i! Eme keci jaŋe wenirec warembiŋ?’ ”
 
22 Wofuŋ Anutuzi ʒiŋuc mukac: “Manakic, no menane
ŋicne ŋicne jaŋeraopec bâfeŋnepemu
â ŋic gurune gurune qeŋ qajarepemu;
eme jaŋe ŋokâfâcge amec‐jopa wareniŋmu
â otâfâcge âsic‐jopaniŋmu.
23 Eme ŋicwofuŋzi mamac nânâ bâfâuc egarehapie
ŋokac wofuŋfâc‐jeŋic jaŋe neŋgoc egareniŋmu.
Erâ dape‐garehuc ʒâŋe mai‐jeŋiczi mâreŋko hetutuckeniŋmu,
ehuc kikegao gâc wândoc fokac i apuruniŋmu.
Iŋuc fuame nore ʒiŋuc mana taracmu:
E hâcne Wofuŋ, ere mamanac jueŋgopieŋzi mi qurutuaniŋmu.”
 
24 Ŋic tâpirihec moc e ʒikao mafa mateŋ‐ticne rowec i sâcne jâoc rozo me?
Me kâpâcwâru bacjopakicne jaŋe ŋic qac momori ere meonec sâcne batarac‐jopazo me?
25 Manakic, Wofuŋ e ʒiŋuc mukac:
“Jâmbomac, kâpâcwâru bacjopakicne jaŋe ŋic tâpirihec
ere meonec sâcne babatarac‐jopane
â ŋic qac momori e mafa mateŋ rowec sâcne jâjâoc rone wâc.
Eme râsi egareeŋgopieŋ jaŋe no nahac râsi ejarezepac,
ehuc nonizia wâc ŋokâfâcge bafic‐jopazepac.
26 Bâbâʒâicfâcge jaŋe ejarepe jaŋacne biuc nânʒepieŋ
â jaŋacne soc i waiŋ opâ iŋucne nâkupie maŋsifuc ejarezejec.
Eme mâreŋŋic sasawa jaŋe nore ʒiŋuc mana taranʒepieŋ:
Wofuŋzi hâcne Jakobore tâpiri wânʒâŋ
erâ wâc bâbâpiaŋ â fifirue‐ticne jukac.”