1 Eme Wofuŋzi Noa ʒiŋuc muhuc âzâcnewec: “Go â wiacfâcge ŋoŋe wokeo fefârenʒepieŋ, go ŋicguru ʒi jaŋere ŋondeŋko mitihec jukomecte honecgupe biaŋkekac. 2 Irec go qowi nânâne jaŋeraonec 7, 7, ŋicne â ŋokacne aŋa sâsâc â qowi mi nânâne jaŋeraonec jajahec jajahec rowosâec‐jopac. 3 Â sawa wipe jaŋeraonec iŋuc jaha 7, 7, ŋicne â ŋokacne rocjopatec gohec wokeo fefârenʒepieŋ, mâreŋte faio wiac jujunere ukicnezi omaezacte. 4 Eme no ʒoaŋ 7 tarame mupe hoe micsâko mâreŋko hehuc domahame ŋafe ʒoaŋ 40 taraocmu. Iŋuc ehuc wiac jujune bâfuapo i mâmâc sasawa mâreŋkonec bâsirowe‐fârepemu.” 5 Eme Noazi Wofuŋte micdâŋ i reŋkehuc efârewec.

6 Noa e jara 600 bazume faicnao rumi sâkozi mâreŋko fisiwec. 7 Fisizo ehame Noa e jahacne â ŋonâŋ‐ticne erâ ŋokâ joŋaofâcne jaŋe mâmâc wokeo fefârembiŋ. 8 Ehame qowi nânâne â mi nânâne, erâ wipe â homa gisic wiac i jaŋe 9 jajahec jajahec sasawa, ŋicne ŋokacne aŋa sâsâc, iŋuczi Noahec wokeo mâmâc fembiŋ, Anutuzi Noa mutâcnecnewec irec sâc jâmbâŋ fembiŋ hâcne.

10 Eme ʒoaŋ 7 hâcne tarame mâreŋko rumi sâko fisiwec. 11 Noare jara dameŋ 600 irec mosa 2‐re ʒoaŋ gie bapa 17 ira opâ â hâwec ʒâkâŋ neŋgocne juwicnec soka siwiŋ ewefuhapie sawaonec opâ motâc aŋkeme 12 hoe micsâko jâmbâŋ hehuc foha ʒoaŋ 40 â ŋafe 40 ewec. 13 Eme ʒoaŋ ijaha Noa â ŋonâŋ‐ticne erâ ŋokâfâcne Sem, Ham â Jafete â ŋonâŋfâc‐jeŋic, jaŋe mâmâc wokeo fefârembiŋ. 14 Erâ hae qowi â kâte qowi fuŋne fuŋne â homa gisic wiac fuŋne fuŋne â wipe fuŋne fuŋne suhuc fakechec jaŋeraonec jajahec jajahec sasawa, 15 ŋicne ŋokacne aŋa sâsâc jaŋe wâc Noahec fefârehapie mâsi sâko i hâcne fuawec.

16 Wiac jujune moc mi behekicne, Anutuzi Noa mutâcnecnewec sâc fefârembiŋ. Fefârehapie Wofuŋzi motâc herâ sahacnao ki bawec. 17 Ehame rumi sâko hâcne fisime opâ jaŋe siwiŋne fehuc woke eferenʒoŋkepie mâreŋkonec fahare fewec. 18 Eme opâ jaŋe soka siwiŋ ehuc hâhâwicne qaratiepie wokezi opâ faio rac warec ewec. 19 Eme opâ jaŋe mâreŋ faio mocwâc âke sue feku tiki ʒora doma raŋgopieŋ i mâmâc sasawa qâuruc‐jopa‐fârembiŋ. 20 Opâzi tiki botâŋ‐jeŋic sirickewec ine kubi 15 irec sâc. 21 Iŋuc eme mâreŋ faio wiac jujune omaewec, wipe mecne, hae qowi mecne, kâte qowi mecne, â homa gisic wiac mecne, mâreŋko babarâ jueŋgopieŋ, erâ wâc mâreŋŋic mâmâc, jaŋe sipiricke‐fârembiŋ. 22 Mâreŋko wiac jujune, nokafehec, jaŋe hâmo‐fârembiŋ. 23 Iŋuc ehuc Anutuzi mâreŋko wiac jujune sasawa, ŋic me qowi me gisic wiac, me wipe, i jaŋe bâsirowec‐jopa‐fârewec. Noa â ehec woke maŋnao jumbiŋ, jaŋe sawa akic‐jopawec. 24 Eme opâ sâko jaŋe mâreŋ faio siwiŋne fehapie ʒoaŋ 150 tarawec.