6
Anutuzi mâreŋŋic jaŋere eebapa honeme sâqorewec
1 Ŋiczi mâreŋko sawe mâririackezo ehapie narufâc‐jeŋic wâc bocjaha fuambiŋ, 2 dameŋ ira nemu jaŋe ŋic jaŋere narufâc hawari biaŋ honec‐jopambiŋ, erâ honebâc‐jopambiŋ sâc ŋonâŋfâc‐jeŋic bacjopambiŋ. 3 Eme Wofuŋzi muwec: “Nore tâpirizi ŋicko mi fofehuc juzejec, ŋic e mâreŋkonec, sahac biuchec, mâreŋko juju‐ticnere jara dameŋ 130 mocwâc mi jâuruzejec.” 4 Dameŋ ira nemu â mâreŋ ŋokac jaŋe turepie ŋicsâko mako ʒâŋe biŋehec fuarâ jurambiŋ.
5 Eme ŋic jaŋe mâreŋko mamakâc sâko fuŋne fuŋne ehuc maŋ sâc wiac sâqocne sasawa ʒuʒuhuc maŋke jumbiŋte 6 Wofuŋzi i honerâ mâreŋŋic bâfuac‐jopawec irec erâ bunezi hâhâtâwewec. 7 Eme Wofuŋzi muwec: “Ŋic bâfuac‐jopapo jaŋe bâsirowec‐jopape mâreŋko omaenʒepieŋ, qowi â gisic wiac â sawa wipe jaŋe mâmâc, jaŋe bâfuac‐jopapore bunane hâhâtâwekac!”
Anutu e Noa honeme biaŋkewec
8 Noa e ine Anutuzi hone ʒemuraŋ ecnewec. 9 E tiŋne â mitinezi ŋic ŋondeŋko juwec, ehuc Anutuhec ʒâʒâfic sanaŋ erâ juwec. 10 Ehame ere bifuŋko ŋokâ 3 fuambiŋ, ʒâŋe‐jeŋic Sem, Ham â Jafete. Noare binaŋ iŋuc. 11 Â mâreŋŋic gâcne jaŋe ine Anuture maio sâqore‐fârepie sindaŋ hârindaŋzi mâreŋ fusucmawec. 12 Eme Anutuzi mâreŋ honeme sâqore‐jâmbâŋkewec, mâreŋŋic juju â eebapa‐jeŋic sifuc safucke‐fârerâ fowec.
Anutuzi Noa wokere dâŋ âzâcnekac
13 Eme irec Anutuzi Noa ʒiŋuc âzâcnewec: “No mâreŋŋic jaŋere dameŋ taraocte manapaŋkekopac. Jaŋe sindaŋ hârindaŋ‐jeŋiczi mâreŋ fusucmakacte no bâsirowec‐jopapemu. 14 Irec go marojâc herâ izi woke moc bazemec. Erâ âke tâcnetec maŋne maŋne fua‐fâreme maŋne â sahacne sâfâzi ʒimickezemec. 15 Woke sâcticne kecʒiŋuc bazemec: Ʒoricne‐ticne kubi 300,* 1 kubi i sâcmeta moc 18 inses me 46 senti meta irec sâc. otecne‐ticne kubi 50 â hâŋne‐ticne kubi 30. 16 Erâ bupune bâbâzickehuc sâcmutâcte sâcko faic motâc piticne moc bazemec â motâc jâmbâŋ‐ticne ine neŋgocnaopec râezemec. Maŋnao feŋgaŋne jahec â moc fuanʒepieŋ. 17 Manakic, no mâreŋko ŋic juŋgopieŋ jaŋe bâsirowec‐jopa‐fârepemurâ rumi sâko bâfuape mâreŋko wiac jujune forakac i omae‐fâreocmu. 18 Gohec ine ʒâʒâfic fârine ekopac. Goki wokeo ferâ juzemec, go â ŋonâŋge â ŋokâ joŋaofâcge, jaŋe gohec mâmâc wokeo ferâ junʒepeiŋ. 19 Â wipe qowi jaŋe sipiricke‐fârenʒipiŋte jaŋeraonec jajahec jajahec, ŋicne ŋokacne iŋuc aŋa sâsâc rocjopatec gohec mâmâc wokeo fenʒepieŋ. 20 Wipe fuŋne fuŋne, qowi fuŋne fuŋne, â homa gisic wiac fuŋne fuŋne jaŋeraonec jajahec jajahec gohec mâmâc wokeo raʒirâ junʒepieŋ. 21 Â wiac nânâne i me i fokac sâc mâmâc nuse qâzuc efârerâ wokeo rotec feme izi gahacne â wipe qowi jaŋere juju dopeckezejec.” 22 Eme Noa e Anutuzi muwec sâc micdâŋ‐ticne reŋke‐fârerâ ejâmbâŋkewec. Noa e iŋuc hâcne ewec.