25
Naru ŋokac lambe opâ basambiŋ jaŋere binaŋ
“Sambâŋte kikefuŋ ine naru ŋokac 10 jumbiŋ jaŋerao sâc hepe: Jaŋe ŋicbomboŋ hatao bâfuaniŋte lambe‐jeŋic barâ rambiŋ. Luk 12:35, 36; Bar 19:7 Naru ŋokac 5 jaŋe mutucne â 5 jaŋe mamanahec. Mutucne jaŋe lambe‐jeŋic sawa bambiŋ, kiruŋko opâne ine mi rombiŋ. Mamanahec jaŋe ine lambe‐jeŋic rohuc kiruŋko opâne mâmâc bambiŋ. Eme ŋicbomboŋ e jume ʒorame woŋec ŋeku dockerâ guŋ fombiŋ. Fohapie ŋafe ʒâŋiŋkeme wiwira moc kecʒiŋuc fuawec: ‘Ŋicbomboŋ warekac, ajoc, faharerâ ra bâfuaniŋ!’ Eme naru ŋokac jaŋe mana ɋâɋârerâ faharerâ lambe‐jeŋic ba bâpiaŋ embiŋ. Eme mutucne jaŋe mamanahec ʒiŋuc jazambiŋ: ‘Nâŋe lambe‐nâŋec hâpokac, irec ŋoŋe opâ moc qoŋgiŋke‐nâreniŋ.’ Mupie mamanahec jaŋe ʒiŋuc jazambiŋ: ‘I wemocko ezo, opâ i mâmâc jaha mi sâcnâpoocmu. Ŋoŋe situâcko rarâ furine baniŋ‐ŋeŋic.’ 10 Eme jaŋe lambe opâ furine bazo rahapie ŋicbomboŋ e fisirâ naru ŋokac ʒawierâ lambe‐jeŋichec domambiŋ jaŋe jowac‐jopame rambiŋ. Erâ haeo fisirâ ficko ferâ motâc ki barâ tiwâ bâzi nâhuc ŋembiŋ. 11 Ŋehapie naru ŋokac mutucne jaŋe warerâ wirahuc mumbiŋ, ‘Bomboŋ‐nâŋec, motâc ronârec mac.’ Luk 13:25, 27 12 Wirapie jazawec, ‘No jâmbomac ŋazape, no ŋoŋe ʒâŋe ruruŋ‐ŋopakopac.’ Mat 7:23 13 Dameŋ mi manaŋgopieŋte maŋŋeŋiczi rucjari bahuc junʒepieŋ. Mat 24:42
Ŋic moneŋfoŋ jarekicne jaŋere binaŋ
(Luk 19:12–27)
14 “Juki ŋicbomboŋ moczi ewec irec sâcko fuazokac. Ŋicbomboŋ moczi mâreŋ wiwicko raocte soŋaŋfâc‐ticne hefârec‐joparâ moneŋ‐ticne soŋaŋkecneniŋte bâtâc bajarewec. Mat 21:33 15 Ehuc soŋaŋ moc moneŋfoŋ 5 râcnewec, moc foŋ 2 râcnewec, moc foŋ 1 râcnewec. I giere tâpiri fojarewec sâc manahuc iŋuc ejarewec. Moneŋ jare‐fârerâ rawec. Rom 12:6 16 Raha rahame izia soŋaŋ moneŋfoŋ 5 roweczi fuŋkerâ giene bahuc kime kiŋ qakume moneŋfoŋ 5 jaha kitâcnewec. 17 Â âgone foŋ 2 rowec eki iŋuc jaha ekume foŋ 2 jaha kitâcnewec. 18 Foŋ mocjaha rowec eki ine bomboŋ‐ticnere moneŋ bararâ duckeme fowec. 19 Eme ŋicbomboŋ‐jeŋic dameŋ ʒora juku risiewec. Risierâ soŋaŋ moneŋte hetumaŋ‐jopawec. 20 Eme moneŋfoŋ 5 râcnekicne eki fisirâ foŋ furune 5 jaha râehuc muwec, ‘Bomboŋ‐nane, go moneŋfoŋ 5 naremeŋ, eme noni giene bahuc hotâckekupe 5 jaha mocwâc fuawec.’ 21 Mume bomboŋ‐ticnezi ʒiŋuc âzâcnewec: ‘Kiŋaŋ motec biaŋne â micrereŋhec, go wiac omanere soŋaŋ sâcne jumeŋte noni wiac fârinere soŋaŋ râecgupemu, irec go bomboŋgere ʒerimaŋko raʒizemec.’ Mat 25:23; Mat 24:45–47; Luk 16:10 22 Iŋuc mume soŋaŋ foŋ 2 râcnekicne eki fisirâ muwec, ‘Bomboŋ‐nane, go moneŋfoŋ 2 naremeŋ, eme noni giene bahuc hotâckekupe 2 jaha mocwâc fuapic.’ 23 Mume bomboŋ‐ticnezi ʒiŋuc âzâcnewec: ‘Kiŋaŋ motec biaŋne â micrereŋhec, go wiac omanere soŋaŋ sâcne jumeŋte noni wiac fârinere soŋaŋ râecgupemu, irec go Wofuŋgere ʒerimaŋko raʒizemec.’ Mat 25:21
24 “Mume ʒâhec moneŋfoŋ mocjaha râcnekicne eki fisirâ muwec, ‘Bomboŋ, no fuŋnege kecʒiŋuc manakopac, go ŋic gereŋ gereŋne, go gie he sarac mi ehuc nareckonec nânâ bâfuarâ gagarere muekic, erâ kise ficko mi guruckehuc mâc sawaonec bâfuarâ gagarere muekic. 25 Eme no irec hâwicnume moneŋge duckepe fowec, eme ʒi bârisie‐garekopac.’ 26 Mume bomboŋ‐ticnezi dâŋ kecʒiŋuc bâtikiecnewec: ‘Go kiŋaŋ motec sâqocne â ojoŋne. No gie mi he sarac ehuc nareckonec nânâ bâfuarâ nanarere muekopac, â kise ficko mi guruckehuc mâc sawaonec nanarere muekopac, 27 nore iŋuc manahuc moneŋ‐nane moneŋŋic jaŋerao râetec jaŋe kime kiŋ qakupie sawehame risierâ rozapo. 28 Irec ŋoŋe moneŋfoŋ jâoc rorâ foŋ 10 bajukac e râcneniŋ. 29 Moc e wiac râcnekicne i bajume kiqecnecnezo, eme mâriri fuacnezejec, â moc e wiac râcnekicne mi bajume jâoc rozo, eme mâc juzejec. Mat 13:12 30 Kiŋaŋ motec ojoŋne ine ro duŋdapâcko sârockepie huzejec. Ira ki oowa ehuc mic kikiaric kihuc fozejec.’ Mat 8:12
Jesuzi juku bâtâc bacnâpozokac
31 “Juku Ŋic Fâri Wâtuŋne e sambâŋ hawari‐ticnehec â aŋelo guru ŋondeŋnao fisirâ eri ŋeŋe‐ticnao fe ŋezokac. Mat 16:27; Ʒek 14:5; Bar 20:11–13 32 Ehuc ŋic mâreŋne mâreŋne hefârec‐jopame ere maio tumaŋne‐fârenʒoŋgopieŋ. Eme soŋaŋ moczi lama â noniŋ bâtâc bacjopaekac, iŋuc bâtâc bacjoparâ Rom 14:10 33 lama fârenaopec guru bacjopaocmu â noniŋ qananaopec guru bacjopaocmu. Eʒek 34:17 34 Iŋuc erâ Wofuŋ Sâko e fârenaopec ʒiŋuc jazaocmu: ‘Mamac‐nanezi jambuŋ‐ŋopawec ŋoŋe ware sambâŋ hae mâreŋ‐ŋeŋic rauckeniŋ, i mârâc jaha mâreŋ fuaweckonecteaŋ biŋe qaŋarekicne. 35 Ŋoŋe wiac kecʒiŋuc enarembiŋ irec: Nânâre enareme nânâ gumecnumbiŋ. Opâre enareme opâ gumecnumbiŋ. Ŋeŋe hae tâmiric juhape ŋoŋe hezu hewâneŋ enarembiŋ. Jes 58:7 36 Ŋaqi basape ŋoŋe moc qikiŋne‐narembiŋ. Huc fohape ŋoŋe jauŋ bacnumbiŋ. Kâpâcwâru ficko ŋehape ŋoŋe iqicnumbiŋ.’ 37 Iŋuc mume biaŋkekicnezi dâŋ ʒiŋuc bâtikiecneniŋmu: ‘Wofuŋ, go wena moc nânâre egareme nânâ gumecgumbeŋ? Me wena moc opâre egareme opâ gumecgumbeŋ? Mat 6:3 38 Me wena moc ŋeŋe hae tâmiric juhaŋtec hezu hewâneŋ egarembeŋ? Me wena moc ŋaqi basatec qikiŋne‐garembeŋ? 39 Me wena moc hucko me kâpâcwâru ficko ŋehaŋtec iqicgumbeŋ?’
40 “Mupie Wofuŋ e ʒiŋuc jazaocmu: ‘No jâmbomac ŋazape, qomâfâc‐nane wahakicne jaŋeraonec mocjaha mac âgo jauŋ ecnembiŋ i no enarembiŋ ekac.’ Muq 19:17; Heb 2:11 41 Iŋuc murâ qanaopec jaŋe ʒiŋuc jazaocmu: ‘Sâwec‐ŋopakicne, ŋoŋe Mamac‐nanezi Sataŋ â aŋelofâc‐ticne ʒocsanaŋ ruqe‐jarewec ira hurâ junʒepieŋ. Mat 7:23; Bar 20:10, 15 42 Ŋoŋe kecʒiŋuc embiŋ irec: No nânâre enareme nânâ mi gumecnumbiŋ. Opâre enareme opâ mi gumecnumbiŋ. 43 Ŋeŋe hae tâmiric juhape hezu hewâneŋ mi enarembiŋ. Ŋaqi basape moc mi qikiŋne‐narembiŋ. Hucko â kâpâcwâru ficko fohape mi iqicnumbiŋ.’ 44 Iŋuc jazame qanaopec jaŋe ʒiŋuc muniŋmu: ‘Wofuŋ, go wena moc nânâ opâ tâmiric, me ŋaqi fic hae tâmiric jutecne hone qâoma egarembeŋ? Me wena moc hucko me kâpâcwâru ficko fohaŋtec hone takic egarembeŋ?’ 45 Mupie e ʒiŋuc jazaocmu: ‘No jâmbomac ŋazape, qomâfâc‐nane wahakicne jaŋeraonec mocjaha mac âgo jauŋ mi ecnembiŋ i no mi enarembiŋ ekac.’ 46 Eme jaŋe sisipiric sanaŋ haeo huniŋmu, â biaŋkekicne jaŋe juju sanaŋ haeo feniŋmu.” Joh 5:29; Dan 12:2

25:1: Luk 12:35, 36; Bar 19:7

25:11: Luk 13:25, 27

25:12: Mat 7:23

25:13: Mat 24:42

25:14: Mat 21:33

25:15: Rom 12:6

25:21: Mat 25:23; Mat 24:45–47; Luk 16:10

25:23: Mat 25:21

25:29: Mat 13:12

25:30: Mat 8:12

25:31: Mat 16:27; Ʒek 14:5; Bar 20:11–13

25:32: Rom 14:10

25:33: Eʒek 34:17

25:35: Jes 58:7

25:37: Mat 6:3

25:40: Muq 19:17; Heb 2:11

25:41: Mat 7:23; Bar 20:10, 15

25:46: Joh 5:29; Dan 12:2