1 Wofuŋte dâŋ norao ʒiŋuc fuawec: 2 “Ŋicte ɋâric, go Israe lama soŋaŋ jaŋere okacdâŋ muzemec. Ehuc ʒiŋuc muzemec: Wofuŋ Anutuzi kecʒiŋuc mukac: Jei, Israe lama soŋaŋ ŋoŋe lama nânâ gumec‐jopaniŋte muŋarekicnezi mi ŋaŋac gugumec enʒepieŋ i! 3 Ŋoŋe hâcne susure wokemaŋ nâhuc ŋaqi lama kanʒaŋzi bakicne i rojueŋgopieŋ, erâ qowi wokemaŋ sâkohec hezu nâc eeŋgopieŋ, ehuc lamafâc‐ŋeŋic ine nânâ mi gumec‐jopaeŋgopieŋ. 4 Lama betaŋkekicne jaŋe mi bafic‐jopaeŋgopieŋ, huchec jaŋe mi bâpiaŋ‐jopaeŋgopieŋ, puriŋne jaŋe he foŋ mi ejareeŋgopieŋ, qâsoriekicne jaŋe mi bârisiec‐jopaeŋgopieŋ â sifuckekicne jaŋe mi basac‐jopaeŋgopieŋ, aricne, ŋoŋe ʒocne mâsâcne ejarehuc fejarembiŋ. 5 Lama soŋaŋ arictacte lama jaŋe siŋsaŋ qafârembiŋ, ehuc kâte qowi jaŋere nânâ embiŋ. 6 Lamafâc‐nane jaŋe siŋsaŋ qahuc tiki mâreŋko tikine tikine fotâcne qâqâwiric rambiŋ; jaŋe mâreŋ sâc siŋsaŋ sirec perec qahuc juhapie ŋic moczi wira basac moc mi ejarewec.

7 “Irec lama soŋaŋ ŋoŋe Wofuŋ no dâŋ ʒiŋuc mukopac i mananiŋ: 8 Wofuŋ Anutu no jujâmbâŋkehuc ʒiŋuc mukopac: Lama soŋaŋ arictacte lamafâc‐nane sisipiricte biŋe ehuc kâte qowi jaŋere nânâ embiŋ; ehame lama soŋaŋfâc‐nane jaŋe lamafâc‐nane wira basac ejarerâ nânâ mi gugumec‐jopa jaŋaczia gugumec embiŋ. 9 Irec lama soŋaŋ ŋoŋe Wofuŋ nore dâŋ mananʒepieŋ. 10 Wofuŋ Anutu no ʒiŋuc mukopac: Manaŋgopieŋ, no lama soŋaŋ râsi eŋarehuc lamafâc‐nane meŋeŋickonec rocjopapemu, ehuc aka râe‐ŋarepe lama nânâ mocwâc mi gumec‐jopanʒepieŋ, me ŋoŋe ŋaŋac wâc iŋuc jaha gugumec mocwâc mi enʒepieŋ. Ehame no lamafâc‐nane soŋaŋ ŋoŋere mickonec batarac‐jopape mocwâc mi nâcjopanʒepieŋ.”

11 Wofuŋ Anutuzi dâŋ kecʒiŋuc mukac: “Manaŋgopieŋ, ʒi no nahac lamafâc‐nane wira basac ejarehuc hone manac ejarepemu. 12 Soŋaŋ biaŋne moczi lamafâc‐ticne siŋsaŋ qapie wira basac ejareekac irec sâc no lamafâc‐nane sisipiric me ʒika dameŋko mâreŋ sâc bâtâtiec‐jopapie siŋsaŋ qambiŋ irecnec wira hefârec ejarehuc bârisiec‐jopapemu. 13 Ehuc ŋicne ŋicne jaŋeraonec â mâreŋne mâreŋne irecnec jowac‐jopa warerâ jaŋacne mâreŋko râec‐jopapemu. Erâ Israe tiki mâreŋko me opâ heririŋko me ŋiczi ŋec juc eeŋgopieŋko ira gume jowac ejarepemu. 14 No kecɋaŋ geunao râec‐jopape Israe tiki mâreŋko nânâ‐jeŋic bâfuanʒepieŋ, erâ ira fomanahuc nânâ opâ biaŋne nâ gapec enʒepieŋ. 15 No nahac lamafâc‐nane jaŋere soŋaŋ erâ jupemu, ehuc ejarepe fomananiŋmu, Wofuŋ Anutu no iŋuc mukopac. 16 No lama sifuckekicne jaŋe wira basac ejarepemu, erâ siŋsaŋ qambiŋ jaŋe bârisiec‐jopapemu, puriŋne ekicne jaŋe he foŋ ejarepemu, betaŋkekicne jaŋe bafic‐jopapemu, â soka sanaŋ ekicne jaŋe hone maiŋ ejarepemu. No soŋaŋ gie fâretiŋ jaha bahuc lama soŋaŋ‐jopapemu hâcne.

17 “O lama gurufâc‐nane, Wofuŋ Anutu no ŋoŋere manasuhuc ʒiŋuc mukopac: Manaŋgopieŋ, no lama ŋicne â ŋokacne erâ noniŋ ŋicne hone qârâwiŋ eŋarehuc dâŋŋeŋic mutarapemu. 18 Ŋoŋe kecɋaŋ biaŋne nâhuc mi sâcŋopame kecɋaŋ tiwâne kikezi hofackeeŋgopieŋ me? Â opâ ɋaɋacne nâhuc iŋuc jaha manapie mi sâckeha opâ gâcne kikezi âtepie sohoŋnehec eekac me? 19 Ehame lamafâc‐nane jaŋe kecɋaŋ hofackekicne â opâ kikezi âtekicne i nâniŋte mueŋgopieŋ me?

20 “Irec Wofuŋ Anutu no ʒiŋuc mukopac: Manaŋgopieŋ, no nahac lama wokemaŋ sâkohec â siec sawa ŋoŋe hone qârâwiŋ eŋarehuc dâŋŋeŋic mutarapemu. 21 Ŋoŋe gâcne hetuŋ‐jopahuc betaŋkekicne jaŋe ʒuŋe‐ŋeŋiczi hecjopakupie siŋsaŋ qaeŋgopieŋte iŋuc eŋarepemu hâcne. 22 No lamafâc‐nane ŋezic‐jopape sisipiricte biŋe mocwâc mi enʒepieŋ, no lama ŋoŋe hone qârâwiŋ eŋarehuc dâŋŋeŋic mutarapemu. 23 Ehuc lamafâc‐nane jaŋere soŋaŋ mocjaha, kiŋaŋŋic‐nane Dawidi hâcne, e âkendâŋnepe gume jowac ejarezejec. 24 Eme Wofuŋ noni hâcne Anutu‐jeŋic juhape kiŋaŋŋic‐nane Dawidi e ŋondeŋ‐jeŋicko micne‐jeŋic erâ juzejec. Wofuŋ no hâcne iŋuc mukopac.

25 “No jaŋehec wamare ʒâʒâfic moc bâfuahape qowi mimicne jaŋe mâreŋ irecnec râriepie lamafâc‐nane mâreŋ burocnao juhâc qâhâmohuc kâteo ŋec foc enʒepieŋ. 26 Erâ no jaŋe mecne â tiki‐nane râreckehuc mâreŋ forakac i mâmâc jambuŋkepemu, ehuc hoe sisic i dameŋ‐ticnao mupe hehuc mâreŋ bâgunuckeocmu. 27 Ehame jâc wiac doma rakac i fâri rarauhec efâreocmu â giegaŋko wiac forakac i qaqa qeqeuhec eocmu; iŋuc fuame jaŋe mâreŋ ira juhâc qâhâmoniŋmu. Eme no kioŋ‐jeŋic hezurâ kiŋaŋ qaqa bacjopambiŋ ŋic i jaŋere meonec batarac‐jopape no hâcne Wofuŋ jukopac i mana taranʒepieŋ. 28 Jaŋe ŋicne ŋicne jaŋere meo mocwâc mi fenʒepieŋ â qowi mimicnezi wâc mi nâcjopanʒepieŋ, jaŋe juhâc qâhâmohapie moczi moc hâhâwic mi hejarezejec. 29 Eme no giegaŋ‐jeŋic jambuŋkepe mazuc mâriri fuame nânâre hâmo sipiric mocwâc mi enʒepieŋ, â ŋicne ŋicne jaŋe mu âke sisic ejarehuc mocwâc mi bâʒâic‐jopanʒepieŋ. 30 Eme no Wofuŋ Anutu‐jeŋiczi jaŋehec juhape jaŋe Israe kikefuŋzi nore ŋicfâc erâ juŋgopieŋ i mana taranʒepieŋ. Wofuŋ Anutu nore dâŋ iŋuc. 31 Ŋoŋe hâcne sacnanere lamafâc erâ juhapie no Anutu‐ŋeŋic jukopac. Wofuŋ Anutu nore dâŋ iŋuc.”