1 Wofuŋte dâŋ norao ʒiŋuc fuawec: 2 “Ŋicte ɋâric, go ŋicfâcge jaŋe dâŋ kecʒiŋuc muhuc jazac: No mâreŋ mocko ʒika bâfuape mâreŋ rune jaŋe jaŋacnaonec ŋic moc bâwosâerâ ruc bapa ŋic‐jeŋic âkendâŋneniŋmu. 3 Eme ruc bapa ŋic e râsi jaŋe fisipie honec‐joparâ qeŋ ficnehuc ŋic ŋokac uŋ sawaŋ ejareocmu. 4 Iŋuc ejareme ŋic moczi qeŋfânâŋ manarâ ruc mi bahame ʒikazi fisirâ qa imac ecneme socticnere kiŋzi e jahacne faio feocmu. 5 E qeŋfânâŋ mana‐bipiehuc ruc mi bawecte socticnere kiŋzi e jahacne biŋe eocmu hâcne. Moc e ine qeŋfânâŋ manarâ ruc baocmuzi juju‐ticne ŋezickeocmu. 6 Me ruc bapa ŋic e râsi jaŋe fisipie honec‐joparâ qeŋ qahuc ŋic ŋokac uŋ sawaŋ mi ejareha ʒikazi ŋic moc qa imac ecneocmuo ine ŋic e sâqocne‐ticnere hâmoocmu, socticnere kiŋ ine ruc bapa ŋic ere faio râepe feocmu.

7 “O ŋicte ɋâric go manac, no Israe kikefuŋ jaŋere ruc bapa ŋic râecgukopac; irec go nore mickonec dâŋ manacmu sâc nore micte erâ hazec qâuŋ jazahuc juzemec. 8 No ŋic hehesicne ʒiŋuc âzâcnepemu: ‘Go hâmo‐jâmbâŋkecmu,’ dâŋ iŋuc âzâcnepe go uŋdâŋ mi âzâcnecmuo â hata‐ticne hehesicnaonec risierâ juju‐ticne asao roocte mi esockecmuo ine ŋic e sâqocne‐ticnehec hâmome ere kiŋzi gore faio feocmu. 9 Mâc ŋic hehesicne e uŋ sawaŋ ecne‐bipiehaŋ sifu hata‐ticne hehesicne â sindaŋ‐ticne mi beherâ juku sâqocne‐ticnere okacne hâmoocmu, goki ine jujuge asao rokomecte jucmu.

10 “Ŋicte ɋâric, go Israe kikefuŋ ʒiŋuc jazac: Ŋoŋe ʒiŋuc hâcne mueŋgopieŋ: ‘Qaqatara â hehesic‐nâŋeczi bâmâc‐nâpoekacte irec erâ hâmo sipiric eeŋgopeneŋ, irec weniŋuc sâcne junaŋmu?’ 11 Irec ʒiŋuc jazac: Wofuŋ Anutuzi ʒiŋuc mukac: No jujâmbâŋkekopacte ŋic hehesicne jaŋe hâmopie boc mi aŋacnuekac, aricne, jaŋe hata‐jeŋic sâqocne beherâ juniŋte enareekac. Irec Israe kikefuŋ, go hata sâqocne beherâ risiec, go wemocte hâmozo mukomec? 12 O ŋicte ɋâric, go ŋicfâcge ʒiŋuc jazac: Ŋic tiŋnezi hehesic bâfuame tiŋne juju‐ticnezi mi ŋezickeocmu. Ehame ŋic hehesicnezi hehesic‐ticne beheme hehesic juju‐ticnezi mi bawahaocmu. Ŋic tiŋnezi sâqocne baocmu ine juwicnao tiŋne juwec juju izi mi bafickeocmu. 13 No ŋic tiŋne ʒiŋuc âzâcnepemu: ‘Go jujâmbâŋkezemec,’ iŋuc âzâcnepe tiŋne juju‐ticnao roweckehuc sâqocne baocmuo ine eebapa‐ticne tiŋne i mocwâc mi manasuzo, aricne, e sâqocne bawec irec erâ hâmozejec. 14 Ŋifec ine ŋic hehesicne ʒiŋuc âzâcnepemu: ‘Go hâmo‐jâmbâŋkezemec.’ Iŋuc âzâcnehape sâqocne‐ticne beherâ eebapa biaŋne â tiŋne bâfuaocmu, 15 ehuc wiac kifac râcnekicne i mecne â wiac fiuc rowec i mâmâc bârisierâ sâcmutâc dâŋte sâcko juhuc hehesic mi bâfuaocmu e mi hâhâmo jujâmbâŋkeocmu. 16 Ehame sâqocne bawec i mocwâc mi manasuzo. E sâcmutâc dâŋte sâcko wiac‐ticne ebac ewecte jujâmbâŋkeocmu hâcne.

17 “Ŋicfâcge jaŋe ine wiac tiŋne ebac mi ehuc ʒiŋuc mueŋgopieŋ: ‘Wofuŋzi wiac tiŋne ebac mi eekac.’ 18 Ŋic tiŋnezi hata tiŋne beherâ hehesic bâfuaocmuo irec erâ hâmoocmu. 19 Me ŋic hehesicnezi hata hehesicne beherâ sâcmutâc dâŋte sâcko juhuc wiac tiŋne ebac eocmu e ine irec erâ juocmu. 20 Ŋoŋe ine mueŋgopieŋ: ‘Wofuŋzi wiac tiŋne ebac mi eekac.’ O Israe kikefuŋ, no ru sâc juju bapa‐ŋeŋicte sâcko dâŋ mutara‐ŋarepemu hâcne.”

21 Nâŋe kâpâcwâru ficko ŋehuc juhapene jara 12 â mosa 10 erâ ʒoaŋ gie bapa 5 ehame ŋic moc Jerusalem haeonec wisekicnezi norao warerâ ʒiŋuc nazawec: “Râsi jaŋe hae biac ro rauc embiŋ.” 22 Ŋic e mi fisihame Wofuŋzi ŋafeo basanaŋnuhuc micnane baafeckeme mocwâc dâŋ dâŋ epo. Izi hae fureme ŋic e fisiha dâŋehuc nâŋguŋne mocwâc mi jupo.

23 Wofuŋte dâŋ norao kecʒiŋuc fuawec: 24 “Ŋicte ɋâric, Israe mâreŋ ima bakicne ŋecjucfâc‐ticne jaŋe ʒiŋuc mueŋgopieŋ: ‘Abraham e ŋic mocjahazi mâreŋ ro rauc efârewec, nâŋe ine ŋic bocjaha irec mâreŋ i rauckenaŋte mana‐nârekicne.’ 25 Irec hâcne ʒiŋuc jazac: Wofuŋ Anutuzi dâŋ kecʒiŋuc mukac: Ŋoŋe qowi socnehec nâeŋgopieŋ, ehuc ɋâŋ qâqâtâcfâc‐ŋeŋic honec‐jopahuc araŋ bajareeŋgopieŋ, ehuc soc hoŋkeeŋgopieŋ. Ŋic iŋucnezi mâreŋ rauckezo mupie sâckeocmu me? 26 Ŋoŋe ʒika‐ŋeŋicte manapie tâpiri‐ŋeŋic eha wiac mamakâcne ebac eeŋgopieŋ, ehuc ŋoŋe ru sâc âgofâc‐ŋeŋic jaŋere ŋokac bâsâqorec‐jopaeŋgopieŋ. Ŋoŋe ŋic iŋucnezi mâreŋ rauckezo mupie sâckeocmu me? 27 Irec ʒiŋuc jazac: Wofuŋ Anutuzi kecʒiŋuc mukac: No jujâmbâŋkekopacte mâreŋ ima bakicnao jueŋgopieŋzi ʒikare biŋe enʒepieŋ, ehame mâreŋ rambaŋko jueŋgopieŋ jaŋe kâte qowi jaŋerao behec‐jopape ɋâcjopanʒepieŋ â ficsanaŋko â qânâ hawecko jueŋgopieŋ jaŋe huc mimicne fua‐jareme sipirickenʒepieŋ. 28 Eme no mâreŋ ima bape niniŋ siarereŋ fuarâ fozejec. Ehame ʒai ʒonʒoŋ‐ticne omaezejec. Eme Israe tiki mâreŋko ima fuarâ foha ŋiczi sicne fotâc mocwâc mi enʒepieŋ. 29 Jaŋe wiac mamakâcne ebac embiŋte mâreŋ‐jeŋic ima samaki bape, no hâcne Wofuŋ jukopac i mana taraniŋmu.

30 “Ŋicte ɋâric, manakic, ŋicfâcge jaŋe qânâsac heririŋ me ficmotâc sâc doma rahuc jaŋe jaŋackoaŋ gore dâŋ ʒiŋuc muc manac eeŋgopieŋ: ‘Ajoc, warepie Wofuŋtaonec dâŋ ware fisikac irec fuŋne mananaŋ!’ 31 Eme jaŋe ŋicmanac hawari fisirâ gore maŋfuŋko nore ŋicfâc jaŋere hawari erâ ŋeeŋgopieŋ, ehuc dâŋ muekic sâc mamana i manaeŋgopieŋ, mâc rereŋke ine mi eeŋgopieŋ. Jaŋe micjeŋiczi ‘Dâŋ biaŋne mukomec,’ iŋuc muhuc maŋjeŋic moneŋ mafa wiac ira râepie foekac. 32 Jaŋe gore manapie gae mânec biaŋne woŋgâŋge qasarickehuc marac furuo hefuakic eekac. Jaŋe dâŋ muekic sâc mamana i manaeŋgopieŋ, rereŋke ine mi eeŋgopieŋ. 33 Mâc wiac fuaocte mukicne i juku fua‐jâmbâŋkeme ʒiŋuc mana taraniŋmu: Jâmbomac, ŋondeŋ‐nâŋecko porofete moc juwec.”