1 Ʒoaŋ gie bapa ira Jesuzi ficticnaonec waharâ riqic moŋgeŋnao rarâ ŋewec. 2 Ŋehame ŋic ŋokac guru sâko fisirâ tumaŋnepie honec‐joparâ woke mocko fewec. Eme e wokeo ŋehame ŋic hâmbâŋ sâko jaŋe moŋgeŋko domambiŋ. 3 Ehame kesaic dâŋ fuŋne fuŋne jazawec. Moc ine kecʒiŋuc muwec: “Manaŋgopieŋ, ŋic moczi wiac hândâŋne tieocte gieo rawec. 4 Ra tiehame hândâŋne gâcnezi waha hatao hewec. Ehame wipezi fisirâ nâfârewec. 5 Â hândâŋne gâcnezi qânâ siecko hewec. Ira mâreŋ faisuc sawa fowecte ââkeʒu i biac âkeʒuwec. 6 Erâ gâtâne râeme hurâ ine âke ariweme ʒoaŋzi wefurâ qame ururuckerâ hâmowec. 7 Â hândâŋne gâcnezi hofâ qinʒiŋ ŋondeŋko hewec. Eme âkeʒume hofâ qinʒiŋzi wefurâ hehâmowec. 8 A hândâŋne gâcnezi ine mâreŋ guecko herâ fârine bocjaha fuawec, jâcne mocte hândâŋne 100, jâcne mocte hândâŋne 60, jâcne mocte hândâŋne 30, iŋuc fuawec. 9 Moc e hazecneheczi dâŋ kecʒi manazejec.”

10 Dâŋ iŋuc jazame motecfâcne jaŋe maŋfuŋnao rarâ indiŋke mumbiŋ, “Go wemocte dâŋ suŋsuŋne jazaekomec?” 11 Eme eki kecʒiŋuc jazawec: “Sambâŋte uucmaŋko raraʒire dâŋ soŋne i ŋoŋe mananiŋte mukicne, gâcne jaŋe ine aricne. 12 Moc e wiac râcnekicne i bajume kiqecnecnezo, eme mâriri fuacnezejec, â moc e wiac râcnekicne mi bajume jâoc rozo, eme mâc juzejec. Mat 25:29; Mar 4:25; Luk 8:18 13 Jaŋe ʒâŋe fiipiehuc wiac mi hone taraeŋgopieŋ, â hazeczi dâŋ mana‐bipiehuc fuŋne mi mana taraeŋgopieŋ, irec kesaic dâŋ jazaekopac. Sâc 29:4 14 Eme Jesajare findaŋdâŋ fokac i deŋkeekac, dâŋ kecʒiŋuc:

18 “Eme ʒi hândâŋ titie dâŋ ŋazapac irec fuŋne mufua‐ŋarepe mananiŋ: 19 Ŋic moc miti manarâ maŋko mi bajuocmu, erao sâqocne runezi fisirâ maŋticnao hândâŋ tiekicne i ro bawiseekac. Ŋic e hâcne hatao hândâŋne hewec irec sâc. 20 Â qânâ siecko hewec sâc iŋucne juocmuzi miti manarâ izia aŋackeme maŋke juocmu. 21 Maŋticnao gâtâ mi bakicnere ine dameŋ bembeŋne sawa domaocmu. Izi fific guguriŋ â ʒika kâpâcwâru fuame rândiŋkeocmu. 22 Â hofâ qinʒiŋko hewec sâc iŋucne juocmuzi ine miti mamana i manaocmu. Erâ sahackopec wiac irec mamaŋ gugutuŋ juha moneŋ mafa mâriri irec aŋaczi eatuckehuc miti hehâmome fârimâc eocmu. Mat 6:19–34; Tim I 6:9 23 Mâreŋ guecko hewec sâc iŋucne juocmuzi ine miti manarâ maŋko bajuocmu. Eme moctao fârine 100, moctao 60, moctao 30, iŋuc fuaekac.”

24 Eme kesaic dâŋ moc kecʒiŋuc muhuc jazawec: “Sambâŋte miti hata i ŋic moczi gie‐ticnao padi hândâŋne biaŋne râewec ehec sâc hepe. Mat 13:36–43 25 Hândâŋne râerâ raha ŋic guŋ fofârehapie râsi‐ticnezi fisirâ padi ŋondeŋnao hofâ hândâŋ tierâ rucnewec. 26 Eme padi âkeʒurâ fârine fuazo ehame hofâ mâmâc wefuwec. 27 Eme kiŋaŋ motec jaŋe i honerâ gie rune âzâcne mumbiŋ, ‘Bomboŋ‐nâŋec, go giegao hândâŋ biaŋne sasawa râemeŋ, ehame hofâ wenirec fuakac?’ 28 Wiocnepie muwec, ‘I râsi moczi tieme fuawec.’ Mume wiocnembiŋ, ‘Eme weniŋuc, ra unuckerâ behenaŋ me?’ 29 Mupie ʒiŋuc jazawec: ‘Aricne, ŋoŋe hofâ unuckehuc padi mâmâc unuckenʒipiŋkohec. 30 Padi â hofâ furu fohuc mâmâc fuazejec. Eme padi qaqa dameŋ maickeme gie bapa ŋic jazape jaŋe qanaŋ hofâ bâwosâerâ dâtâckerâ ʒocko rikenʒepieŋ â padi ine ficnaneo ropie fezejec.’ ” Mat 3:12

31 Eme kesaic dâŋ moc kecʒiŋuc muhuc jazawec: “Sambâŋte kikefuŋ e nemuja hândâŋ iŋucne. Ŋic moczi hândâŋ i hâcne jufu‐ticnao râewec. 32 Hândâŋ i piticne, jâchândâŋ gâcne irec wahamicne. Fua sokac erâ ine wiac nâkicne gâcne jowarurâ jâc eekac. Eme sawa wipe jaŋe fisirâ tieŋnao herâ ŋeeŋgopieŋ.” Dan 4:12, 21; Eʒek 17:23; 31:6; Mi Mâ 104:12

33 Eme kesaic dâŋ moc kecʒiŋuc jazawec: “Sambâŋ miti e hâmu goreŋne iŋucne. Ŋokac moczi hâmu goreŋne nânâ oto jahec â moc ihec bâsifuckeme isiricke‐fâreme aŋacnehec ewec.” Luk 13:20, 21

34 Jesuzi ŋic dâŋ jazawec i suŋsuŋne sasawa jazawec, dâŋ mai mi mutaniŋkerâ jazawec. Mar 4:33, 34 35 Iŋuc eme porofete moczi dâŋ kecʒiŋuc muwec i sanaŋkewec:

36 Eme Jesuzi ŋic râec‐jopame rahapie ficticnao fewec. Ferâ juhame motecfâcne jaŋe iqickerâ âzâcne mumbiŋ, “Go padi gieo hofâ fuawec kesaic dâŋ irec fuŋne mutec mananaŋ.” Mat 13:24–30 37 Wiocnepie jazawec, “Ŋic hândâŋ biaŋ râeekac i Ŋic Fâri Wâtuŋne eki. 38 Gie ine mâreŋ sâko mâreŋ. Hândâŋ biaŋ ine mitire fuŋfuŋfâc. Kor I 3:9 39 Hofâ i sâqocne runere fuŋfuŋfâc. Râsi hofâ hândâŋ tiewec ine Sataŋ. Padi qa roro dameŋ ine dameŋ sâko. Gie bapa ine aŋelo jaŋe. 40 Hofâ unuckerâ ʒocko rikeeŋgopieŋ iŋuc hâcne dameŋ sâkoo fuazokac. Joh 15:6 41 Ira Ŋic Fâri Wâtuŋnezi aŋelofâc‐ticne sorec‐jopame mâreŋ sâc gurufâc‐ticne jaŋeraonec ŋic sâqocne bâbâiŋ â miti ima qaqa Zef 1:13; Mat 25:31–46; 7:23 42 i qânusuc‐joparâ ʒocsanaŋko behec‐jopapie huniŋmu. Ira ki oowa ehuc mic kikiaric kiniŋmu. Mat 8:12 43 Â biaŋkekicne jaŋe Mamac‐jeŋicte uucmaŋko ʒoaŋ tatamac iŋucne tamaeniŋmu. Hazecneheczi dâŋ kecʒi manazejec. Dan 12:3

44 “Sambâŋte miti hata i kecʒiŋuc: Boreŋ ʒeŋaŋ moc jufu gie mocko duo fowec. Eme ŋic moczi i bâfuarâ seucko râewec. Erâ bubiaŋ sâko manahuc wiac focnewec sasawa i ŋic qikiŋne‐jareme moneŋ râcnepie ra jufu i furine bawec. Mat 19:29; Luk 14:33; Fil 3:7; Muq 2:4

45 “Erâ sambâŋte miti hata i kecʒiŋuc wâc: Ŋic moc e ʒuŋe gâpiŋte babasa gie bawec. 46 Baku ʒuŋe gâpiŋ moc micne kizukicne biaŋ bâfuarâ bec wiac‐ticne sasawa ʒuŋe rune qikiŋnecneme ʒuŋe gâpiŋ ere ewec. Muq 8:10, 11

47 “Sambâŋte kikefuŋ e wasaŋ iŋucne. Ŋic jaŋe wasaŋ hâwecko behepie hume qowi fuŋne fuŋne jowawec. Mat 22:9, 10 48 Fusucmame tiŋko fârepie feme qowi bâtâc bahuc nânâne i oto gombao ropie huwec â mi nânâne ine behepie rawec. 49 Mâreŋ dameŋne tarame iŋuc hâcne fuazokac. Ira aŋelo jaŋe mâreŋne mâreŋne rarâ ŋic biaŋkekicne jaŋere ŋondeŋkonec ŋic sâqocne rowosâec‐joparâ Mat 25:32 50 ʒocsanaŋko tuŋjopapie huniŋmu. Ira ki oowa ehuc mic kikiaric kihuc juniŋmu.”

51 Iŋuc murâ wio‐jarewec, “Ŋoŋe i sasawa mana taraŋgopieŋ me?” Eme jaŋe mumbiŋ, “Mana taraŋgopeneŋ.” 52 Mupie jazawec, “Ine hâcne, miti qaqazu moczi sambâŋte miti hatare fuŋne manaekac, e ficte micne iŋucne erâ rowaŋ‐ticnaonec wiac fuŋne fuŋne, raŋɋane â ɋâricne, utu guruc eocmu.”

53 Jesu e kesaic dâŋ fuŋne fuŋne muku mufârerâ hae mâreŋ i beherâ rawec. 54 Erâ haefuŋ‐ticnao fisirâ mitificko ferâ miti qazu‐jareme ŋic jaŋe wareckerâ mumbiŋ, “Mamana sâko â mâsi sâko bapa i wenirec bâfuawec? Mat 7:28; 11:1; 19:1; 26:1 55 Nâŋâc fuŋne‐ticne manaŋgopeneŋ, e kapentare ŋokâ, neŋgoc‐ticne ʒâŋene Maria, â ɋafâc‐ticne ʒâŋe‐jeŋic Jakobo â Josefe â Simoŋ â Juda. 56 Erâ seŋfâc‐ticne nâŋâcnehec mâmâc juŋgopieŋ. Eme e wiac sasawa i wenirec bâfuawec?” Joh 7:15, 52 57 Iŋuc murâ quŋkecnehuc mana pitiwambiŋ. Eme Jesuzi jazawec, “Porofete moc e ʒâŋe biŋe‐ticne hae mâreŋ gâcnao haŋ bahame haefâcne â fuŋfuŋfâcne jaŋe ine qikiŋneeŋgopieŋ.” Joh 4:44 58 Eme hae irec ŋic jaŋe maŋjeŋic sakarembiŋte Jesuzi jaŋerao mâsi bocjaha mi bawec.