1 “Ŋoŋe ŋic okacne dâŋ mi mutara‐jarenʒepieŋ, eme Anutuzi ŋoŋe iŋuc jaha okacne dâŋ mi mutara‐ŋareocmu. Rom 2:1; Kor I 4:5 2 Ŋoŋe ŋic okacne dâŋ mutara‐jareniŋmu sâc ijaha Anutuzi ŋoŋe mutara‐ŋareocmu, â ŋic wiac ejareniŋmu sâc ijaha Anutuzi bârisie‐ŋareocmu. Mar 4:24 3 Go wemocte âgogere ʒâŋeo gâc i honehuc gahacne ʒâŋeo jâcdâkâ fokac ine mi hone taraekomec? 4 Jâcdâkâ gahacne ʒâŋeo foipiehame go weniŋuc âgoge ʒiŋuc âzâcnetec sâckeocmu: ‘Go manahaŋ ʒâŋegao gâc fokac rogarepe.’ 5 Burecŋic, go gahacne ʒâŋeo jâcdâkâ fokac i qanaŋ rorâ ie ʒâhec hone tarahuc âgogere ʒâŋeo gâc rotec sâckeocmu. 6 Ŋoŋe mitire wiac i qâto mi qikiŋne‐jarenʒepieŋ â boreŋ ʒeŋaŋ‐ŋeŋic i bec mi behe‐jarenʒepieŋ. Jaŋe wiac iŋucne mâc kikezi âterâ izia fotikierâ ŋaŋacne ki qâsuc eŋarenʒipiŋkohec. Mat 10:11

7 “Numuku wiac roniŋmu, basaku fârine bâfuaniŋmu, motâcko heickepie roŋarezo. Mar 11:24; Luk 11:9–13; Jer 29:13, 14; Joh 14:13; 16:23 8 Numuekaczi wiac roekac, basaekaczi fârine bâfuaekac, heickeekac e motâc aŋkecneekac. 9 Me ŋoŋeraonec mo ŋic e ŋokâ‐ticnezi poroŋte âzâcneme qorac râcneocmu? 10 Me qowire âzâcneme ɋâsu râcneocmu? 11 Aricne, ŋoŋe ŋic hehesicne iŋucnezi naru motecfâc‐ŋeŋic nânâ mafa biaŋne jare gumec eeŋgopieŋ. Ehame Mamac‐ŋeŋic sambâŋko e sâc moczi ŋic ŋoŋe numucnepie wiac sâcne ŋare tahac mi eocmu me? Jak 1:17 12 Ŋoŋe ŋic jaŋe wiac eŋareniŋte manasueŋgopieŋ, sâc ijaha wâc jaŋe ejarenʒepieŋ. Izi hâcne sâcmutâc dâŋqâhâc â porofete jaŋere dâŋ qâhâckekac. Mat 22:39, 40; Rom 13:8–10

13 “Ŋoŋe motâc fâŋfâŋnao sambâŋko raʒinʒepieŋ. Sisipiric hae irec motâc i kâcɋene â irec hata i sokawec. Ira hâcne ŋic bocjahazi raeŋgopieŋ. Luk 13:24; Joh 10:7, 9 14 Juju hae irec motâc ine fâŋfâŋne â irec hata i gâŋgâŋne. Eme ŋic afecne maczi i bâfuaeŋgopieŋ. Mat 19:24; Apo 14:22

15 “Mitiŋic burec burec sahac‐jeŋic lama sahac â maŋjeŋic qâtomaŋ, momori jâmbâŋ, iŋucne jaŋere ruc bahuc junʒepieŋ. Mat 24:4, 5, 24; Apo 20:29 16 Miti fârine‐jeŋicte ʒâŋitac‐jopaniŋmu. Safeo suc fârine fuame rozo? Me ʒaqeŋko saŋ fârine fuame rozo? Gal 5:19–22; Jak 3:12 17 Aricne, jâc biaŋnao fârine biaŋne fuaekac, jâc sâqocnao fârine sâqocne fuaekac. Mat 12:33 18 Jâc biaŋnao fârine sâqocne fufua i mi fokac, â jâc sâqocnao fârine biaŋne fufua i wâc mi fokac. 19 Irec jâc moc e fârine biaŋne mi fuame qâtâcnerâ ʒocko behezo. Mat 3:10; Joh 15:2, 6 20 No irec hâcne mupac: Miti fârine‐jeŋicte ʒâŋitac‐jopaniŋmu. 21 ‘Wofuŋ‐nane, Wofuŋ‐nane’ munareeŋgopieŋ jaŋe furu jaha sambâŋte uucmaŋko mi raʒiniŋmu. Mamac‐nane sambâŋko ere mic reŋkeeŋgopieŋ jaŋe sawa raʒiniŋmu. Mat 21:29; Rom 2:13; Jak 1:22, 25; 2:14; Kor I 12:3 22 Ŋic bocjahazi dameŋ sâkoo ʒiŋuc nazanʒoŋgopieŋ: ‘Wofuŋ‐nâŋec, hâc, nâŋe gore micte ŋic miti mi jazambeŋ? Me gore micte demoŋ mi jâpe‐jarembeŋ? Me gore micte gie sâko mi bambeŋ?’ Jer 14:14; 27:15; Luk 13:25–27; Kor I 13:1, 2 23 Iŋuc mupie no kecʒiŋuc jazazokopac: ‘No moc mi manac‐ŋopakopac. Wise tâmireniŋ, sâqocne bapa ŋoŋe.’ Mat 13:41; 25:41; Tim II 2:19; Mi Mâ 6:8

24 “Ŋic moczi dâŋnane kecʒi manarâ reŋkeocmu, e ŋic mamana tara‐ticnehec iŋucne, ŋic moczi ficticne tikitoŋko bawec e iŋucne. Mat 7:21 25 Bame ŋehame hoe mâŋâŋ sâko fisirâ fic bâipieme qiŋ herâ ŋewec. Tikitoŋko bakicnere sanaŋkerâ ŋewec hâcne. 26 Â ŋic moczi dâŋnane kecʒi manarâ qikiŋneocmu, e ine ŋic mutucne iŋucne, ŋic mutucne moczi ficticne opâ moŋgeŋko bawec e iŋucne. 27 Bame ŋehame hoe micsâko heme opâ rumi hâhâwicne fisirâ fic âeckeku âke rândiŋkerâ âkenʒaŋne‐fârewec.” Eʒek 13:10, 11

28 Jesuzi dâŋ kecʒi muku mufâreme ŋic jaŋe miti mumu‐ticnere mana warec ehuc bipic tara‐jarewec. Mat 11:1; 13:53; 19:1; 26:1; Mar 1:22; Luk 4:32 29 E runezi miti bâutuckehuc jazawec, miti qaqazu siric‐jopahuc sâc moc muwec. Joh 7:46