11
Jesu e doŋgio Jerusalem haeo fewec
(Mat 21:1–9; Luk 19:29–38; Joh 12:12–16)
Eme raku Jerusalem hae bâqiŋkezo ehuc Oliwa tikio Betefage â Betania hae ŋepicko fisimbiŋ. Ira fisirâ Jesuzi motec jajahec sorec‐jofahuc muwec, “Hae raecko ŋekac ira ranic. Raferâ izia doŋgi motecne niŋgiŋko domakac i bâfuanicmu. Motecne i ŋiczi fainao mi ŋekicne furune. Eme i bâfuarâ firuerâ bawareniŋ. Firuepire ŋic moczi, wemocte rokopirec, mume ʒiŋuc muhuc âzâcnenic: ‘Wofuŋ‐nâheczi irec mukac, erâ biac mocwâc râeme wareocmu.’ ” Mar 14:14 Iŋuc muhuc jasame motec jahec rarâ doŋgi motecne ficmotâcko mai jaha niŋgiŋko domame bâfuarâ firuepic. Firuepire ŋic domambiŋ jaŋe honec‐jofarâ mumbiŋ, “Hâc, mozi mume rokopirec?” Mupie Jesuzi dâŋ jasawec i jazapire manapie tarawec. Eme Jesurao bararâ fainao ŋaqi‐jeŋic râepie eki ferâ ŋewec. Eme ŋic bocjahazi ŋaqi‐jeŋic hatao rumacke rambiŋ â tucnezi gieonec ʒariŋ bazurâ râe rambiŋ. Eme ŋic guru sâko roʒâc bâʒâŋiŋ ecnembiŋ jaŋe kecʒiŋuc muhuc ofac hecnembiŋ: “Ohec, Wofuŋte micte ware‐nârekomec go mumbiaŋgunaŋ. Mi Mâ 118:25, 26 10 Apa‐nâŋec Dawidi ere guriŋ bapa risie‐nârekacte ʒerienaŋ. Ohec, Anutu fâic sambâŋko.”
11 Iŋuc ecnehapie Jerusalem haeo fe fisirâ Jesuzi taha ufuŋko raʒiwec. Raʒirâ wiac sasawa hone manac efârerâ hae biac owâeme waharâ motecfâc‐ticne 12 rocjopame Betania haeo fembiŋ.
Jâmbo jâcnezi Jesure micte ururuckewec
(Mat 21:18–19)
12 Hae fureme jaŋehec Betania haeonec wahahuc Jesu nânâre hâmowec. 13 Ehuc fime rame jâmbo jâcne moc rehacnehec honerâ fârine ŋekac muhuc ra basawec: Fârine fufua dameŋ mi maickewecte rehacne sawa domawec. Luk 3:9; 13:6–9 14 Iŋuc honerâ jâc ʒiŋuc âzâcnewec: “Goraonec fârine nânâ i ŋic moczi mocwâc mi nâjâmbâŋkezejec.” Eme dâŋ i motecfâcne jaŋe manambiŋ. Mar 11:20
Jesu e taha ufuŋ furu muwec
(Mat 21:12–17; Luk 19:45–48; Joh 2:13–22)
15 Eme Jerusalem haeo fembiŋ. Eme Jesuzi taha ufuŋko ferâ ŋic ira wiac nareŋ gareŋ ehuc domambiŋ jaŋe jâpec‐joparâ moneŋ katapa‐jeŋic â hapâ ŋeŋe herândiŋkewec. Joh 2:14–16 16 Erâ taha ufuŋko wiac iŋucne moc ba rac warec mi eniŋte muac‐jopawec. 17 Iŋuc ejarerâ dâŋ ʒiŋuc jazawec: “Dâŋqâreŋ kecʒiŋuc fokac: Ficnane i mâreŋ sâc ŋic jaŋere nunumu fic ezejec. Ŋoŋe ine epie fiuc sindaŋhec jaŋere qânâuŋ tinac ekac.” Jes 57:7; Jer 7:11 18 Iŋuc eme taha bapa micne â miti qaqazu jaŋe honerâ, weniŋuc erâ qapene arictac ezejec muhuc nazaŋ gazaŋ embiŋ. Erâ fuŋne ʒiŋucte ere hâwic‐jopawec: Ŋic mâmâc sasawa miti‐ticnere manapie bipine sâkohec ewec. 19 Eme Jesu â motecfâcne jaŋe hae owâeme sâc hae sâko beherâ rahuc jumbiŋ.
Wofuŋ manasiŋkehuc numuzo
(Mat 21:20–22)
20 Hae fureme jâmbojâc domawecko mocwâc ra fisirâ honembiŋ: Jâc hâmo bâŋeŋ erâ domawec. Mar 11:14 21 Eme Petorozi honerâ Jesu dâŋ muwec i manasurâ âzâcnewec, “Qaqazu honec, jâmbo jâc sâweckemec e ururuckejec domakac.” 22 Mume Jesuzi ʒiŋuc jazawec: “Ŋoŋe Anutu manasiŋkehuc junʒepieŋ. Joh 14:1 23 No jâmbomac ŋazape: Moc e tiki kecocni hockerâ hâwecko huc âzâcneocmu, ehuc mupe sanaŋkeocmu me mâcne, maŋjahec iŋuc mi erâ manapaŋkehuc muocmu, i fârine fuaocmu. Mat 17:20; Luk 17:6 24 Irec ŋazape mananiŋ: Ŋoŋe wiac irec me irec manasurâ numuniŋmu, ine biac roŋgopeneŋ muhuc mana ʒakiepie fua‐ŋareocmu. Mat 7:7; Joh 14:13; 16:23 25 Erâ numuzo murâ ŋic mocte kiŋtofa bajuŋgopieŋko behenʒepieŋ. Iŋuc epie sambâŋ Mamac‐ŋeŋiczi iŋuc jaha ŋoŋere kiŋtofa beheocmu. Mat 5:23[ 26 Me ŋoŋe ŋic jaŋere kiŋtofa bajupie sambâŋ Mamac‐ŋeŋiczi iŋuc jaha ŋoŋere kiŋtofa bajuocmu.]” Mat 6:14, 15
Jesu â micne bapa jaŋe eesâic embiŋ
(Mat 21:23–27; Luk 20:1–8)
27 Jesu motecfâc jaŋe mocwâc Jerusalem haeo risiembiŋ. Risierâ Jesuzi taha ufuŋko ferâ juhame taha bapa micne â miti qaqazu â soŋaŋ erao fisirâ 28 indiŋkerâ mumbiŋ, “Go ʒira wiac eekic i more micte eekomec? Mozi iŋuc ecmurâ mugareme eekomec?” 29 Esâickepie dâŋ ʒiŋuc bâtikie‐jarewec: “No dâŋ mocjaha sawa wio‐ŋarepe nazapie noni iŋuc jaha more micte wiac eekopac i okacne ŋazapemu. 30 Johane Miti Opâ gie‐ticne i wenirec fuawec, sambâŋkonec me ŋickonec? Mupie manape.” 31 Iŋuc jazame jaŋackoaŋ ʒiŋuc muhuc nazaŋ gazaŋ embiŋ: “Nâŋâc sambâŋkonec fuawec iŋuc mupene muocmu ‘Hâc, eme wemocte dâŋticne mi mana ʒakiembiŋ?’ 32 Me ŋickonec fuawec iŋuc moc munaŋ?” Erâ iŋuc muniŋte ŋic jaŋere hâwic‐jopawec. Jaŋe ʒeŋgoma Johanere manapie porofete jâmbâŋ ewec. 33 Eme Jesu ʒiŋuc âzâcnembiŋ: “Nâŋe mi manaŋgopeneŋ.” Mupie Jesuzi ʒiŋuc jazawec: “Wiac murâ sâcne, eme noni iŋuc jaha more micte ʒira wiac eekopac okacne wâc mi ŋazapemu.”

11:3: Mar 14:14

11:9: Mi Mâ 118:25, 26

11:13: Luk 3:9; 13:6–9

11:14: Mar 11:20

11:15: Joh 2:14–16

11:17: Jes 57:7; Jer 7:11

11:20: Mar 11:14

11:22: Joh 14:1

11:23: Mat 17:20; Luk 17:6

11:24: Mat 7:7; Joh 14:13; 16:23

11:25: Mat 5:23

11:26: Mat 6:14, 15