1 Jesu e fuŋkerâ dâŋ suŋsuŋne moc kecʒiŋuc jazawec: “Ŋic moczi mâreŋ mocko waiŋ saraku sara‐fârerâ sac hafewec. Erâ waiŋ bâbâpisic toma ba akic erâ soŋaŋ jaŋere fic barâ gie sasawa mejeŋicko râerâ mâreŋ mocko rawec. Jes 5:1, 2 2 Jukuhame fârine fufua dameŋ maickeme kiŋaŋ motec‐ticne moc fârine tucne roocte soreme ra fisime 3 soŋaŋ jaŋe rorâ qa imac ecnerâ jâpepie metariŋ risiewec. 4 Risieme runezi kiŋaŋ motec moc soreme rame qizecne hefâuckerâ sopeckembiŋ. 5 Eme runezi harierâ kiŋaŋ motec moc soreme jaŋerao fisime qambiŋ. Qapie runezi ŋic bocjaha sorec‐jopame ra fisipie soŋaŋ jaŋe ʒika bâfuarâ gâcne ʒâpâ jopambiŋ â gâcne hâmocne jopambiŋ. 6 Eme mocjaha jucnewec, joroc ŋokâ‐ticne hâcne, e ʒâhec ʒiŋuc muhuc soŋaŋ jaŋerao sorewec: ‘No nahacne ŋokâ araŋ bacnehuc akickeniŋmu.’ 7 Eme soŋaŋ jaŋe ine ŋokâ‐ticne honerâ nazaŋ gazaŋ erâ mumbiŋ, ‘Eki hâcne juku gie rauckeocmu, ajoc, qanaŋ, eme gie ʒi nâŋâcne ezejec.’ 8 Iŋuc muhuc rorâ qâhâmorâ qâŋɋâŋ‐ticne gie sahacnao behepie huwec.” Heb 13:12 9 “Eme gie rune e weniŋuc eocmu? E fisirâ soŋaŋ i jopa qâhâmoc ejarerâ gie‐ticnao soŋaŋ biaŋne moc râec‐jopaocmu. 10 Miti papiao dâŋ kecʒiŋuc fokac i wose manac mi eeŋgopieŋ me?

12 Jesuzi iŋuc jazame micne bapa jaŋe e kâpâcwâru baniŋte manasurâ ŋic jaŋere hâwic‐jopame hata basambiŋ. Jaŋe ʒiŋuc mana tarambiŋ: Dâŋ i nâŋere mukac. Erâ roniŋte quŋkehuc mâc beherâ rambiŋ.

13 Judaŋic micne jaŋe farisaio ŋic gâcne â Herodere âgofâc tucne Jesu dâŋzi bitiŋ bacneniŋte sorec‐jopambiŋ. Mar 3:6 14 Sorec‐jopapie Jesurao fisirâ ʒiŋuc âzâcnembiŋ: “Qaqazu, nâŋe gore fuŋne manaeŋgopeneŋ, go dâŋburec mi ehuc jâmbomac jaha muekic, erâ fekicne fosâoc‐jopahuc dâŋ mi muhasickeekic, go fekicne wahakicne mâmâc sasawa Anuture hata sâcne nâzâ nâwotuc eekic. Irec mutec mananaŋ, Sisa* Roma ŋicwofuŋte mukicne. takesi moneŋ râcnepene sâckeekac me mâcne, 15 râcnezo me mi râcnezo?” Iŋuc mupie Jesuzi burec‐jeŋicte fuŋne mana tararâ jazawec, “Ŋoŋe wemocte dâŋzi bitiŋ banareŋgopieŋ? Ŋoŋe siliwa moneŋ moc bâfuarâ nowatupie honepe.” 16 Eme jaŋe moc râcnepie wio‐jarerâ muwec, “Hawari â qâreŋ ʒi more me?” Eme jaŋe mumbiŋ, “Sisare”. 17 Iŋuc mupie jazawec, “Murâ Sisare biŋe i Sisa râcnenʒepieŋ â Anuture biŋe i Anutu râcnenʒepieŋ.” Iŋuc muhuc jazame jaŋe wareckembiŋ. Rom 13:7

18 Jaŋe rahapie sadukaio ŋic tucne fisimbiŋ. Ŋic i jaŋe hâmockonec fafahare mi fokac iŋuc muhuc jumbiŋ. Jaŋe hâcne fisirâ mumbiŋ: 19 “Qaqazu, Mosezi kecʒiŋuc mu qâreŋ enârewec: ‘Ŋic moczi ŋokac rorâ ɋâric‐ticne mi fuahame hâmome ɋanezi hozec‐ticne rorâ hahac‐ticnere biŋe ɋâric bâfuazejec.’ Sâc 25:5, 6; Fuf 38:8 20 Eme hahac ɋa 7 jumbiŋ, ehuc mârâc hahac‐jeŋic ŋokac rorâ ɋâric tâmiric jurâ hâmowec. 21 Hâmome ɋanezi hozec‐ticne rorâ iŋuc jaha ɋâric tâmiric jurâ hâmome ɋaticne moczi hozec ijaha rowec. 22 Iŋuczi iŋuc hahac ɋa 7 jaŋe ŋokac ijaha rorâ ɋâric tâmiric hâmo‐fârembiŋ. Eme ʒâhecko hozec‐jeŋic iŋuc jaha wâc hâmowec. 23 Eme ŋic 7 jaŋe mâmâc sasawa ŋokac ijaha rombiŋte juku dameŋ sâkoo fahare‐fârepie ŋokac e more ezokac?” 24 Mupie Jesuzi ʒiŋuc jazawec: “Ŋoŋe dâŋ mana sifuckeeŋgopieŋ, i mâc mâcne, ŋoŋe miti papia â Anutu tâpiri‐ticne kâuc baeŋgopieŋ irec. 25 Juku hâmockonec faharerâ ŋic â ŋokac roroc mocwâc mi enʒoŋgopieŋ. Jaŋe sambâŋ aŋelo iŋucne erâ mâc junʒoŋgopieŋ. 26 Eme ŋoŋe hâmockonec fafaharere muŋgopieŋte ŋazape: Mose e jâcko ʒocbâruŋ fuame honerâ rame Anutuzi dâŋ âzâcnewec, binaŋ i wose manac eeŋgopieŋ me mâcne? Ine dâŋ kecʒiŋuc âzâcnewec: ‘No Abraham â Isaka â Jakobo jaŋere Anutu.’ Wah 3:2, 6; Mat 8:11; Luk 16:22 27 Ine hâcne, e hâmockicne jaŋere Anutu mâcne, e ɋâricne juju jaŋere Anutu. Ŋoŋe ine dâŋ boc mana sifuckeeŋgopieŋ.”

28 Eme Jesuhec mu bârisiec ehapie eki okacne musarickehuc bâtikie‐jareme miti qaqazu jaŋeraonec moczi manarâ Jesu fuacnerâ ʒiŋuc wiocnewec: “Sâcmutâc dâŋ wenimoizi qizecne sâko?” Luk 10:25–28 29 Mume Jesuzi ʒiŋuc âzâcnewec: “Sâcmutâc dâŋ femicne ʒiŋuc fokac: ‘Israe ŋicbureŋ ŋoŋe mananiŋ, Wofuŋ Anutu‐nâŋec e Wofuŋ fârine mocjaha. Sâc 6:4, 5 30 Irec maŋge â qâqâtâcge â mamanasuge â tâpirige i Wofuŋ Anutuge furu jaha qikiŋnecnetec fozejec.’ Joh 15:12 31 Erâ dâŋ âgone moc kecʒiŋuc fokac: ‘Go gahacnere egareekac, sâc ijaha âgogere egarezejec.’ Sâcmutâc dâŋ i jahere femicne moc mi fokac.” Tah 19:18 32 Iŋuc mume miti qaqazuzi dâŋ ijaha herisiecnehuc muwec, “Qaqazu, go dâŋ mutecne manape sâcke‐hâmokac, Anutu e jâmbomac Wofuŋ fârine mocjaha, erâ e iŋucne moc mi jukac. Sâc 4:35; 6:4 33 Erâ e maŋ â mamanasu â tâpiri furu qikiŋnecnezo, â gahacnere egareekac irec sâc âgoge maŋjauŋ ecnezo, izi bâzi fuŋne fuŋne ririke sirickekac.” Sam I 15:22 34 Ŋic e iŋuc mume Jesuzi maname sâckeme ʒiŋuc âzâcnewec: “Go Anuture uucmaŋ bâqiŋkekomec.” Eme dameŋ ira ŋic jaŋe Jesu wiocneniŋte manapie ŋemâckeme behembiŋ. Apo 26:27–29

35 Eme Jesu e taha ufuŋko ŋic miti jazahuc ʒiŋuc muhuc indiŋ‐jopawec: “Kristo e Dawidire ɋâric, miti qaqazu jaŋe weniŋucte iŋuc mueŋgopieŋ? 36 Dawidi e jahac Tiri Mârozi ecneme ʒiŋuc muwec:

38 Eme Jesuzi miti muhuc dâŋ moc ʒiŋuc ʒuhuckerâ jazawec: “Ŋoŋe miti qaqazu jaŋe bâec bajarenʒepieŋ. Jaŋe ŋaqi ʒora rojuhuc hatao ŋic bâfuac‐jopapie mu ʒeri ejareniŋte maŋjeŋic domaekac. 39 Erâ mitificko â tutumaŋ ficko ŋicbomboŋ ŋeŋeoa micne ŋeniŋte mueŋgopieŋ. 40 Iŋucnezi hozec jaŋere fic wiac kâŋgâc jowac roeŋgopieŋ, erâ nunumu ʒorazi hehesic‐jeŋic hefackeeŋgopieŋ. Ŋic i jaŋe juku okacne hâhâwicne ronʒoŋgopieŋ.”

41 Jesu e taha ufuŋko moneŋ rârâe katapa irec ŋifecnao ŋehuc honehame ŋic jaŋe moneŋ râepie huwec. Ehuc mafaŋic bocjaha jaŋe fisirâ moneŋ ŋemâcne râepie huwec. Ŋic II 12:9 42 Ehame hozec hapetac moczi fisirâ toea bâbâroŋ mocjaha mac moc râewec. 43 Eme Jesuzi i honerâ motecfâcne hefârec‐joparâ jazawec, “No jâmbomac ŋazape: Hozec hapetac kecizi moneŋ râekac, i gâcne jaŋere sâc jâurukac. 44 Gâcne jaŋe neŋgocne sâko fojarehame tucne sawa râembieŋ. Â hozec e hapetaczi focnewec sâc râe‐fârerâ mâc jâmbâŋ jukac.” Kor II 8:12