19
Tiri â tiŋne juju irec mumutâc dâŋ gâcne
Eme Wofuŋzi Mose ʒiŋuc âzâcnewec: “Go Israe kikefuŋ sasawa kecʒiŋuc jazazemec: Wofuŋ Anutu‐ŋeŋic no tiri jukopacte ŋoŋe tiri jaha junʒepieŋ. Ŋoŋe sasawa neŋgoc mamacfâc‐ŋeŋic sâsec‐jopanʒepieŋ, erâ sabata hombaŋ‐nanere manapie tirine ezejec. No Wofuŋ ŋoŋere Anutu hâcne. Ŋoŋe nemuɋâŋ jaŋerao mi qohotanʒepieŋ, ehuc ɋâŋ qâqâtâc wâc mi banʒepieŋ. No Wofuŋ ŋoŋere Anutu hâcne.
“Ŋoŋe wama bâzi rikezo murâ ine mumutâc dâŋte sâcko rikepie Wofuŋzi mana‐ŋareme biaŋkezejec. Wama bâzi rikeniŋmu i ʒoaŋ ijaha me hae fureme nânʒepieŋ; â tiwâne foha ʒoaŋ jahec â moc eocmuo ine ʒocko râepie ʒazejec. Me ʒoaŋ jahec â moc eha sifu nâniŋmuo ine wiac mamakâcne eme Wofuŋzi mana‐ŋareme mi biaŋkeocmu. Moc e wiac i eocmuzi kiŋ hureocmu, e Wofuŋte wiac tirine irec maname wawahane ewecte. Ŋic iŋucne e âgofâcne jaŋere ŋondeŋkonec bâsirowezo.
“Ŋoŋe padi wiac qa roro ehuc gie qaŋeŋnao doma rakac i mi rofârenʒepieŋ; â kisecne doma raocmu i wâc mi unucke‐fârenʒepieŋ. 10 Waiŋ hândâŋne i iŋuc jaha furu mi bâtâcne‐fârenʒepieŋ, â mâreŋko waharâ fokac i wâc mi nusehuc ŋic hapetac â jabane jaŋere biŋe behepie fozejec. No Wofuŋ ŋoŋere Anutu hâcne.
11 “Ŋoŋe fiuc mi ronʒepieŋ â eeatuc ehuc burec eec wâc mi enʒepieŋ. 12 Ŋoŋe nore ʒâŋeo ɋetickerâ mumupaŋ dâŋ burecne ehuc ʒâŋe‐nane mi bawahanʒepieŋ. No hâcne Wofuŋ jukopac.
13 “Ŋoŋe ŋic âgofâc‐ŋeŋic bâʒâic‐jopahuc mafa wiac‐jeŋic mi jowac ronʒepieŋ. Kiŋaŋŋicfâc‐jeŋic jaŋere gie furi i bajuhapie hae mi furezejec. 14 Ŋoŋe ŋic nâŋguŋne mi sâwec‐jopanʒepieŋ; â tiŋtiŋ jaŋere hata i aka mi henʒepieŋ, ehuc Anutu‐ŋeŋic ine araŋ bacnenʒepieŋ. No Wofuŋ jukopac hâcne.
15 “Ŋoŋe ŋic dâŋjeŋic mutarahuc mi musifuckenʒepieŋ, ehuc ŋic waha qaqane araŋ mi bajarenʒepieŋ, â ŋic fekicne jaŋe wâc mi sâsec‐jopanʒepieŋ, aricne, ŋoŋe ŋic âgofâc‐ŋeŋic jaŋere dâŋ i sâcmutâc dâŋte sâcko mutara‐jarenʒepieŋ. 16 Ŋoŋe ŋic âgofâc‐ŋeŋic micko âkec mi ejarenʒepieŋ â jaŋere dâŋgie bahuc juju‐jeŋic ba ima ezo mi munʒepieŋ. No Wofuŋ jukopac hâcne.
17 “Ŋoŋe qomâfâc‐ŋeŋic mi qaisoc‐jopanʒepieŋ, ŋoŋe jaŋere erâ kiŋ hurenʒipiŋte juju â eebapa‐jeŋic mutiŋnenʒepieŋ. 18 Ŋoŋe okac babazu gie bahuc âgofâc‐ŋeŋic jaŋere kiŋ mi bajunʒepieŋ; ŋoŋe ŋaŋacnere eŋareekac sâc ijaha âgofâc‐ŋeŋic jaŋere eŋarezejec. No Wofuŋ jukopac hâcne.
19 “Ŋoŋe dâŋsanaŋ‐nane mana rereŋ enʒepieŋ. Bulimakaofâc‐ŋeŋic jaŋe bulimakao fuŋne fuŋne jaŋehec sisifuc erâ mi junʒepieŋ. Ŋoŋe wiac ukicne jajahec gie‐ŋeŋicko mi tienʒepieŋ, â ŋaqi wiac‐ŋeŋic i qoruc hawarine jajaheczi bakicne mi rojunʒepieŋ.
20 “Ŋic moc e kiŋaŋ naru moc ŋic mocte biŋe qakicne e kiwiric‐ticne ropie rambaŋko mi juha bâsâqoreocmu ine dâŋgie fuazejec. Naru e rambaŋko mi juwecte mi qâhâmoc‐jofazo. 21 Ŋic e kiŋ tatara taha Wofuŋ râcnezejec, ine lama ŋicne moc kiŋ tatara tahare biŋe tutumaŋ qoruc bozere motâcko hâcne râezejec. 22 Eme taha bapa e Wofuŋte maio lama ŋicne i kiŋ tatara tahare biŋe râehuc kiwiric‐ticne rozejec, eme sâqocne bawec i bâtâmirecnezo.
23 “Ŋoŋe mâreŋ biŋe qaŋarekicne ira fisirâ jâc fuŋne fuŋne sarapie fârine fuame mi nâhuc juhapie jara jahec â moc tarazejec. Iŋuc juhuc manapie muac‐nâpokicne ezejec. 24 Eme jara namba 4 ira fârine fuaocmu i Wofuŋ ʒeri mumuteŋ ecnehuc daŋge taha râecnenʒepieŋ. 25 Jara 5 ira ine nâ bac epie mâriri sâko fua‐ŋarezejec. No Wofuŋ ŋoŋere Anutu hâcne.
26 “Ŋoŋe qowi biuc socnehec mi nânʒepieŋ, ehuc faŋfaŋdâŋ muhuc qaŋgec mi banʒepieŋ. 27 Ŋoŋe naki‐ŋeŋic ŋifec â ŋifec susucne mi hezunʒepieŋ, â mecʒâwâ‐ŋeŋic tofane wâc mi bâtâcnenʒepieŋ. 28 Hâmoc fuame busâqocte sahac‐ŋeŋic mi hetâcnenʒepieŋ, â soqâreŋ wâc mi banʒepieŋ. No Wofuŋ jukopac hâcne.
29 “Go otâge bawahahuc sasec giere mi qikiŋnezemec, iŋuc etec sau gie â hehesiczi mâreŋ mi sâckezejec. 30 Ŋoŋe sabata hombaŋ‐nanere manapie tirine eha furufic‐nane araŋ bacnenʒepieŋ. No Wofuŋ jukopac hâcne.
31 “Ŋoŋe bawe me faŋfaŋ wiac maic‐joparâ jaŋerao qohotahuc wâwânâŋhec mi enʒepieŋ. No Wofuŋ ŋoŋere Anutu hâcne.
32 “Ŋoŋe ŋic jaŋɋâŋhec jaŋerao faharenʒepieŋ, ehuc ŋicraŋɋa jaŋe sâsec‐jopanʒepieŋ, â Anutu‐ŋeŋic araŋ bacnenʒepieŋ. No Wofuŋ jukopac hâcne.
33 “Ŋic jabane moc e ŋondeŋ‐ŋeŋicko juhame mi bâʒâickenʒepieŋ. 34 Aricne, ere manapie mâreŋ rune tinac eha ŋoŋe ŋaŋacnere eŋareekac sâc ijaha ere eŋarezejec. Ŋoŋe Aigita mâreŋko jaba jaha jumbiŋte iŋuc enʒepieŋ. No Wofuŋ ŋoŋere Anutu hâcne.
35 “Ŋoŋe ŋic dâŋjeŋic mutarahuc mi musifuckenʒepieŋ, â sâcmeta me sigelire bâbâsifuc wâc mi bâfuanʒepieŋ. 36 Ŋoŋe sigeli me ŋemâc me oto me fifia râqâc wiac‐ŋeŋic i sâc mocjaha foŋarezejec. No Wofuŋ ŋoŋere Anutu, noni hâcne Aigita mâreŋkonec jowac‐ŋopa wefupo. 37 Irec ŋoŋe dâŋsanaŋ â mumutâc dâŋnane mana rereŋ efârenʒepieŋ. No Wofuŋ jukopac hâcne.”