1 Eme Wofuŋzi Mose ʒiŋuc âzâcnewec: 2 “Go Israe ŋic kecʒiŋuc jazazemec: No Wofuŋ ŋoŋere Anutu. 3 Ŋoŋe Aigita mâreŋko juhuc Aigita ŋic jaŋe wiac ebac epie hone jumbieŋ irec sâc mi enʒepieŋ, â Kanaaŋ mâreŋko jowac‐ŋopape raʒirâ, mâreŋ rune jaŋe wiac ebac eeŋgopieŋ irec sâc wâc mi enʒepieŋ. Ŋoŋe jaŋere dâŋsanaŋte sâcko mi junʒepieŋ. 4 Aricne, ŋoŋe nore mumutâc dâŋ â dâŋsanaŋ mana rereŋ ehuc irec sâcko junʒepieŋ. No hâcne Wofuŋ ŋoŋere Anutu. 5 Ŋoŋe irec hâcne dâŋsanaŋ â mumutâc dâŋnane reŋkehuc bâjâpenʒepieŋ, ine hâcne, moc e bâjâpehuc reŋkeocmuzi juju bâfuaocmu. No Wofuŋ jukopac hâcne.

6 “Ŋoŋeraonec moc e soctofafâc‐ticne bâsâqorec‐jopaocte mi fua‐jarezejec. No Wofuŋ jukopac hâcne. 7 Go neŋgocge bâsâqorehuc mamacge mimi qaqa mi ecnezemec, e hâcne neŋgocge jukacte mimi fainao mi râezemec. 8 Go neŋgococge bâsâqorehuc mimi qaqa mi ecnezemec. 9 Go mamacgere me neŋgocgere otâ, seŋge hâcne, soctofage me seŋocge bâsâqorehuc mimi qaqa mi ecnezemec. 10 Go ŋosage mi bâsâqorezemec, gahacne faio mimi fezacte iŋuc mi ezemec. 11 Go neŋgococgere otâ, mamacgezi bâfuawec e mi bâsâqorezemec, e seŋge jaha, irec mimi qaqa mi ecnezemec. 12 Go neŋgoc piticge mi bâsâqorezemec, e mamacgere soctofa hâcne. 13 Go neŋgoc piticge mi bâsâqorezemec, e neŋgocgere soctofa hâcne. 14 Mamac jahecge hahac ɋa jahere ŋokac mi bâsâqorec‐jofazemec, jahe neŋgoc jahecge jaha. 15 Go joŋaoge mi bâsâqorezemec, e hâcne ŋokâgere ŋokac, irec e mimi qaqa mi ecnezemec. 16 Go qozige mi bâsâqorezemec, hahacge mimi qaqa ecnezicte. 17 Go ŋokac moc â naru‐ticne mi bâsâqorec‐jofazemec, me joŋao‐ticne me ŋosa‐ticne jahe wâc mi bâsâqorec‐jofazemec, jahe soctofa jahec‐ticne, irec jahehec sâqocne bapa i wiac hâhâtâne. 18 Go ŋonâŋge juhame qoticne mamare bajuhuc mi bâsâqorezemec.

19 “Go ŋokac moc mosa dameŋ‐ticne maickeha bâsâqorecmurâ mi fuacnezemec. 20 Go ŋic âgogere ŋokac bâsâqorehuc wâwânâŋhec mi ezemec. 21 Go naru motecfâcge Moleke nemure biŋe râec‐jopahuc Anuture ʒâŋe mi sipirickezemec. No Wofuŋ jukopac hâcne. 22 Ŋokac jaŋehec foeŋgopieŋ irec sâc ŋic jaŋehec mi fozemec, iŋuc etec wiac mamakâcne eocmu. 23 Go qowi moc bâsâqorehuc wâwânâŋhec mi ezemec; â ŋokac moczi qowi ŋicnehec sasec gie mi bazejec, iŋuc eme wiac mamakâcne jâmbâŋ eocmu.

24 “Go wiac mukicne sasawa i ebac ehuc wâwânâŋhec mi ezemec; no ŋoŋere maio qâpuc ŋic gurune gurune jâpec‐jopape wiseŋgopieŋ jaŋe hâcne wiac iŋucne ebac ehuc wâwânâŋhec embiŋ. 25 Jaŋe iŋuc epie mâreŋ‐jeŋiczi wâwânâŋhec ewec; eme no kiŋjeŋicte erâ okacne bazu‐jarepe mâreŋ‐jeŋic tuhutac fuawec. 26 Ŋoŋe ine dâŋsanaŋ â mumutâc dâŋnane reŋkerâ bâjâpehuc wiac mamakâcne keci moc mi enʒepieŋ, mâreŋ rune ŋoŋe mecne â ŋic jabane ŋondeŋ‐ŋeŋicko jueŋgopieŋ jaŋe mecne. 27 (Ŋic mârâc jaha mâreŋ ʒi rauckerâ jumbiŋ jaŋe hâcne wiac i ebac epie mâreŋ i wâwânâŋhec ewec.) 28 Ŋoŋe iŋuc epie mâreŋzi mârâc jaha tuhutac fuarâ fowec irec sâc fuaocmu. 29 Ŋic izi me izi wiac mamakâcne keci moc ebac eocmu e ŋic âgofâc‐ticne jaŋere ŋondeŋkonec bâsirowezo. 30 Irec ŋoŋe mumutâc dâŋnane mana rereŋ ehuc wiac mamakâcne mârâc jaha ejumbieŋ i ebac ehuc wâwânâŋhec mi enʒepieŋ. No Wofuŋ ŋoŋere Anutu hâcne.”