1 Eme Wofuŋ e Mose ʒiŋuc âzâcnewec: 2 “Go Aroŋ â ŋokâfâcne erâ Israe kikefuŋ ʒiŋuc jazazemec: Wofuŋzi dâŋ kecʒiŋuc mutâcnewec: 3 Israe kikefuŋkonec ŋic moc e bulimakao me lama me noniŋ hae maŋnao me hae râpeo qâhâmorâ 4 Wofuŋte tiri bozeo taha râeocte tutumaŋ qoruc bozere motâcko mi bafisiocmuo ine soc hoŋkewec irec kiŋ i ŋic ere faio feme ŋic âgofâcne jaŋere guruonec bâsirowezo. 5 Israe ŋic jaŋe taha bâzire qowi gieo qâhâmoc‐jopaeŋgopieŋ i Wofuŋte biŋe qahuc tutumaŋ qoruc bozere motâcko taha baparao bafisirâ ira wama bâzire biŋe qâhâmorâ Wofuŋ taha bacnenʒepieŋ. 6 Ehame taha bapazi irec soc rorâ Wofuŋte alata tutumaŋ qoruc bozere motâcko ŋekac ira tiezejec, ehuc wokemaŋ‐jeŋic ine ʒocko rikeme Wofuŋte maio âsu biaŋ fuazejec. 7 Israe ŋic jaŋe taha bâzire qowi‐jeŋic i nemu sâqocne kiŋaŋ qajareeŋgopieŋ jaŋere biŋe mocwâc mi qâhâmonʒepieŋ. Dâŋ izi ŋic gaŋne gaŋne fuarâ juniŋmu sâc jaŋere dâŋsanaŋ erâ fozejec.

8 “Erâ ʒiŋuc ʒuhuckerâ jazazemec: Israe kikefuŋ ŋoŋeraonec, me ŋondeŋ‐ŋeŋicko ŋic jaba jueŋgopieŋ jaŋeraonec moczi qowi bâzi rikehuc 9 tutumaŋ qoruc bozere motâcko bafisirâ Wofuŋ taha mi bacneocmu ine ŋic e âgofâcne jaŋere guruonec bâsirowezo.

10 “Israe kikefuŋ ŋoŋeraonec me ŋondeŋ‐ŋeŋicko ŋic jaba jueŋgopieŋ jaŋeraonec moczi soc nâocmu e ine râsi ecnehuc ŋic âgofâc‐ticne jaŋere guruonec bâsirowepemu. 11 Jujure tâpiri i socko fokac hâcne; eme no irec hâcne taha bapazi kiwiric‐ŋeŋic rohuc alatao hoŋkeocte mupo. Jujure tâpiri i socko fokacte taha bapazi iŋuc ehuc kiwiric‐ŋeŋic sâcne roocmu. 12 No irec hâcne Israe ŋic kecʒiŋuc jazapo: Ŋoŋeraonec me ŋondeŋ‐ŋeŋicko ŋic jaba jueŋgopieŋ jaŋeraonec moczi soc mi nâzejec. 13 Israe ŋic ŋoŋeraonec me ŋondeŋ‐ŋeŋicko ŋic jaba jueŋgopieŋ jaŋeraonec moczi wosaŋeŋ gie bahuc qowi nânâne moc roocmu e socticne mâreŋko hoŋkerâ rufezi hemackezejec.

14 “Wiac jujune sasawa jaŋere tâpiri i socko fokac; eme no irec hâcne Israe ŋic ʒiŋuc jazapo: Wiac jujune sasawa jaŋere tâpiri i socko fokacte wiac i jaŋere soc moc mi nânʒepieŋ. Moc e sifu nâocmuzi mi juzejec. 15 Â mâreŋ rune me ŋic jabane moczi qowi e jahac hâmoekac me qowi gâcne jaŋe ki sipiric ecnepie hâmoekac i nâocmuzi ŋaqi‐ticne ʒurerâ e jahacne wâc opâ ruarâ wâwânâŋhec jaha juha hae ŋafezejec. Hae ŋafeme ine ɋaɋackezejec. 16 Me ŋaqi wiac‐ticne mi ʒurehuc opâ mi ruaocmu ine kiŋ hureocmu.”