110
Anutuzi taha bapa ŋicwofuŋ dâŋ âzâcnewec
1 Wofuŋzi nore Wofuŋ ʒiŋuc âzâcnewec:
“Ware fâre‐naneo ŋehaŋtec
râsifâcge guruc‐jopape
kikegere ââtesiŋ enʒepieŋ.”
2 Wofuŋzi Zioŋkonec ŋicwofuŋ gunuge
tâpiri sâkonehec i sicnekac.
Râsifâcge jaŋere ŋondeŋko guriŋ bapa gie bac!
3 Ŋicfâcge jaŋe maŋafec jaha fisi‐garepie
goki momori gurufâcge tiri tikio jowac‐jopa racmu.
Ŋafe furec hehe‐jekicko
titikuc fuaekac,
irec sâc socɋâricfâcge fisi‐gareniŋmu.
4 Wofuŋ e dâŋ ʒiŋuc mupaŋkewec,
i maŋne risieme mi beheocmu:
“Goki Melikisede ere sâcko
taha bapa juraʒihuc jucmu sanaŋ.”
5 Wofuŋ e mefâregao domakac;
e kimbeŋ dameŋ‐ticnao ŋicwofuŋ qanʒaŋ‐jopaocmu.
6 Ŋic gurune gurune jaŋerao okac babazu gie bame,
qâŋɋâŋ guru fufusuc fuaniŋmu,
qizec qanʒaŋne‐jareme mâreŋ sâckerâ foraniŋmu.
7 E hatamecko opâ fia nâc eocmu,
ehuc qacboc‐ticnehec domaocmu.