111
Anutu e sahackopec â maŋkopec jambuŋ‐nâpoekac
1 Wofuŋ mumbiaŋkeniŋ!
No Wofuŋ maŋ hâcbuc jaha daŋge âzâcnepe,
ŋic siocmâc jaŋere ŋondeŋko â kikefuŋ guruo.
2 Wofuŋte meqâreŋ i bipinehec,
irec aŋac fojareekac jaŋe mana wosâeeŋgopieŋ.
3 Wiac bapa‐ticne i ʒâŋe biŋe â ʒai ʒonʒoŋhec,
â tiŋne‐ticne tofamâc fohuc juocmu.
4 E mâsi sâko‐ticne manasuhuc junaŋte ma moc bâfuawec;
Wofuŋ e aki anonoc â buuruchec.
5 E araŋ bacneeŋgopieŋ jaŋe nânâ bâfua‐jareekac;
e ʒâʒâfic‐ticnere manasuhuc jaha juekac.
6 E ŋicne ŋicne jaŋere mâreŋ i ŋicfâc‐ticne jarehuc,
wiac tâpirihec eekac irec fuŋne jowatuwec.
7 Meticnezi gie baekac i siocmâc â tiŋne;
sâcmutâc‐ticne i eeatuc tâmiric,
8 izi fofo sanaŋ foocte keteŋke‐hâmowec,
ŋiczi siocmâc â maŋhumuc juhuc reŋkeniŋte.
9 E kikefuŋfâc‐ticne firuec‐jopawec,
ehuc ʒâʒâfic‐ticne fofo sanaŋ foocte mupaŋkewec.
Ʒâŋe‐ticne tiri moc â bipinehec.
10 Wofuŋ araŋ babacne izi maŋɋârâŋte hata fufuŋkene ekac;
irec giene baniŋmuzi wiac mana utuckeniŋmu.
Ere ʒâŋe biŋe foraʒihuc jaha juocmu.