112
Mitihec jaŋe sâcne juhâmoniŋmu
1 Wofuŋ mumbiaŋkeniŋ!
Moc e Wofuŋ araŋ bacnehuc,
sâcmutâc‐ticnere bubiaŋ sâko manaekac,
ere manape ʒerine ekac.
2 Ɋâricfâcne jaŋe mâreŋko tâpirihec juniŋmu,
tiŋne jaŋere guruzi jambuŋhec eniŋmu.
3 Ficticnao wiac sasawa mazuc mâriri foocmu,
â tiŋne‐ticnezi foraʒihuc juocmu.
4 Siocmâc jaŋe dapâcko tatamac fua‐jareocmu;
ŋic tiŋnezi aki anonoc â buuruchec juekac.
5 Moc e buafec erâ ŋic wiac jaba jareekac e sâcne juhâmoocmu;
â dâŋgieo râepie dâŋticne sâcne mume biaŋkeocmu.
6 Ŋic tiŋnezi ra ioc ware ioc moc mi eocmu,
irec ŋiczi ere raŋɋa manasuhuc juniŋmu.
7 E biŋedâŋ sâqocnere boc mi mezackeocmu,
maŋnezi Wofuŋtao roweckehuc qiŋ herâ domaocmu.
8 E hâbi heme hume hâhâwic tâmiric jufeku
râsifâcne sanaŋke‐jarerâ saoreŋ qaekac.
9 E boki bahuc hapetac wiac tahac‐jopaekac;
tiŋne juju‐ticnezi foraʒihuc juocmu;
eme ŋiczi sâsekupie ʒâŋe biŋe‐ticnezi feocmu.
10 Ŋic sindaŋnezi e honerâ aarickeekac,
erâ mic kikiaric kiku omaeekac;
sindaŋnezi wiac fuaocte muekac i fârimâc eekac.