113
Anutu qeŋ bipinehec e muteŋkezo
1 Wofuŋ mumbiaŋkeniŋ!
Wofuŋte kiŋaŋ qaqa ŋoŋe e mumbiaŋkeniŋ,
Wofuŋ ʒâŋe‐ticne mumbiaŋkeniŋ.
2 Wofuŋte ʒâŋe i ʒiŋuczia muteŋkerâ,
dameŋ tâmiric muteŋke rahuc juzo.
3 Ʒoaŋ wewefunaonec domarâ raku huhunao,
i Wofuŋte ʒâŋe jaha mumbiaŋkehuc juzo.
4 Wofuŋ e ŋicne ŋicne jowarurâ fewec jukac,
eri tatamac‐ticnezi sambâŋ sirickerâ fekac.
5 Mozi Wofuŋ Anutu‐nâŋec ere sâc jukac?
E faic eri ŋeŋe‐ticnao ŋekac.
6 Ehuc fime juwic wahame,
sambâŋ â mâreŋ honenʒaŋ‐jofaekac.
7 E qarâ suriŋne wândockonec bâfeŋneekac,
â hapetac jawa guruonec bafahareekac.
8 Erâ râeme micne bapare gâjoŋko ŋeekac,
ehuc ŋicfâcne jaŋere micne bapa qâteekac.
9 E ŋokac hufiŋne bafickeme ficte eri eekac,
ehuc mume ɋâricfâcne fuapie bubiaŋ manaekac.
Wofuŋ mumbiaŋkeniŋ!