114
Wofuŋ e ŋicfâcne jowac‐jopahuc mâsi bawec
1 Israezi Aigita mâreŋkonec faharewecko,
â Jakobore kikefuŋzi ŋicguru dâŋmarac‐jeŋic furune
jaŋe behec‐jopawecko,
2 Judazi Wofuŋte tiri ufuŋ ewec,
â Israezi uucmaŋ‐ticne ewec.
3 Eme hâweczi honerâ wisewec,
â Jordaŋzi fotikierâ rawec.
4 Tiki jaŋe lama ŋicne tinac tarambiŋ,
â mâreŋ facne jaŋe lama motec tinac kiwaembiŋ.
5 Hâwec, go wemoczi bâʒâicgume wisekic?
Jordaŋ, go wemocte fotikierâ rakomec?
6 Tiki, ŋoŋe wemocte lama ŋicne tinac taraŋgopieŋ?
Mâreŋ facne, ŋoŋe wemocte lama motec tinac kiwaeŋgopieŋ?
7 O mâreŋ, go Wofuŋte maio ɋiɋiteckec,
Jakobore Anutu ere maio.
8 Eki hâcne qânâ hetikieme opâ ʒâkâŋ ekac,
erâ buse hetikieme opâ ʒâŋe fuakac.