Kâte Bible MATAIO 14

Johane Jesure biŋe mumu qambiŋ

(Mar 6:14–29; Luk 9:7–9; 3:19–20)

1 Dameŋ ira ŋicwofuŋ Herode eki Jesure biŋe manawec. Manarâ motecfâcne ʒiŋuc jazawec: 2 “I Johane Miti Opâ fufuŋke, eki hâmockonec ɋârerâ faharewecte tâpiri sâkohec jukac.” 3 Dâŋ i mâc mi muwec. Herode e juwicnao ɋaticne Filipo ere ŋonâŋ rowec, ʒâŋene Herodia, ŋokac ere erâ Johane me kikene qarâ kâpâcwâru ficko râewec. 4 Ine Johanezi dâŋ ʒiŋuc âzâcne jujec irec: “Go ŋokac e bameŋ i bahac ekac.” 5 Erâ Herodezi Johane qaocte manasuwec wâc. Mâc ŋic jaŋe Johane porofete mucnembiŋte jaŋere hâwickeme behewec. 6 Ehame Herode fufua dameŋ‐ticne maickeme ŋic fekicne jaŋe fisirâ erao tumaŋnerâ ŋehapie Herodia otâ‐ticnezi jaŋere maio gae wome Herodezi honeme aŋacne eme 7 kecʒiŋuc âzâcnewec: “No Anuture maio mupaŋkekopac, go irec me irec egareme mutec garepemu.” 8 Eme naru e neŋgocnezi qafeŋkeme ʒiŋuc muwec: “Go Johane Miti Opâ fufuŋke ere qizec râqâcko râerâ ʒiŋuczia narec.” 9 Iŋuc mume ŋicwofuŋ e fâfârerâ hemâtâckewec. Erâ Anuture maio mupaŋkewecte â ŋic ŋembiŋ jaŋerao dâŋticne wahazacte 10 sifu manacnerâ mume kiŋaŋ motec jaŋe rarâ Johane kâpâcwâru ficko upene qâtâcnerâ 11 qizecne râqâcko râepie hume barerâ naru râcnembiŋ. Eme naruzi neŋgoc‐ticne râcnewec. 12 Eme Johane qapie hâmome motecfâcne fisirâ qâŋɋâŋ‐ticne rorâ duckembiŋ. Duckerâ ra Jesu dâŋ binaŋ ecnembiŋ.

Jesuzi ŋic 5000 nânâ gumec‐jopawec

(Mar 6:31–44; Luk 9:10–17; Joh 6:1–13)

13 Jesu e Johanere biŋe manarâ mâreŋ i beherâ woke mocko ferâ mâreŋ tuhuo bucko juocte rawec. Rahame ŋic jaŋe biŋe manarâ haene haene hâmbâŋ sâko tiŋko raku ijaha fisimbiŋ. 14 Eme wokeonec waharâ ŋic guru sâko honec‐joparâ bune sâqoreme huchecfâc‐jeŋic ɋiɋic bacjopawec. 15 Iŋuc ehuc juhame hae owâeme motecfâc‐ticne jaŋe âzâcnerâ mumbiŋ, “Ʒi tuhuo juhapene hae owâekac, irec ŋic râec‐jopatec hae sâc rarâ nânâ bâfuanʒepieŋ.” 16 Mupie ʒiŋuc jazawec: “Wemocte raniŋte mujareŋgopieŋ? Ŋoŋe nânâ gumec‐jopaniŋ me.” 17 Jazame mumbiŋ, “Nâŋe ʒi poroŋ memoc â opâ qowi jajahec i mac sawa bajuŋgopeneŋ.” 18 Eme eki ʒiŋuc jazawec: “I norao bareniŋ.” 19 Iŋuc murâ ŋic ejareme kecɋaŋ gieo toma âterâ ŋembiŋ. Eme poroŋ memoc â opâ qowi jajahec rorâ sambâŋko fime feha mumuteŋ dâŋ muwec. Murâ bazurâ motecfâcne jareme jaŋe bârâwiŋnehuc ŋic jarembiŋ. 20 Eme jaŋe sasawa nâ gapec embiŋ. Ehame tiwâne ŋerawec i ropie hurâ sasac 12 fusewec. 21 Â nânâ qowi nâmbiŋ ŋic i jaŋere ʒare 5 tauseŋ, ŋokac naru motec mi wosec‐jopakicne.

Jesuzi riqic faio rawec

(Mar 6:45–56; Joh 6:15–21)

22 Iŋuc erâ izia Jesuzi motecfâcne esoc‐jopame wokeo buc ferâ bâniecnehuc riqic ocniŋucnao risieniŋte rambiŋ. 23 Eme ŋic ŋokac râec‐jopame rafârepie e gâmbuŋ‐ticne tikio ferâ nunumu gie bawec. Iŋuc ehuc juhame hae ŋafeme e jahackoaŋ ira juhuc juwec. 24 Ehame wokezi raku riqic ʒâʒâŋiŋko fisiwec. Eme mâŋâŋ e rambiŋkopecnec warewecte siri kâcɋene qahuc woke bafe bâriŋ ecneme foicke‐bipiembiŋ. 25 Eme Jesuzi ŋafe furec hehe‐jekicko riqic âte âte raku bâqiŋ‐jopawec. 26 Iŋuc rahame motec jaŋe honerâ hâbi‐jeŋic goroŋkeme, “Bawe warekac” muhuc owackembiŋ. 27 Owackepie mu bâmiriŋ ejarehuc jazawec, “Buŋeŋic mâteŋkeoc, ʒi no nahac fâkopac, mi hâwic‐ŋopaoc.” 28 Mume Petorozi micnao rorâ muwec, “Wofuŋ, go gahac warekomecko mutec opâ faio gorao fâpe.” 29 Eme Jesuzi muwec, “Warec”. Mume Petorozi wokeonec waharâ opâ faio Jesuraopec rawec. 30 Rahuc mâŋâŋ sâko qame honerâ hâwickeme huzo ehuc Jesu wâsickehuc muwec, “Wofuŋ go rocnuc.” 31 Mume izia Jesuzi menao rohuc muwec, “Mamanasiŋ gogoroŋ go, wemocte maŋjahec ekomec?” 32 Iŋuc muhuc rome wokeo fepire mâŋâŋ niniŋkewec. 33 Eme wokeo ŋembiŋ ŋic i jaŋe Jesure maŋfuŋko fodapehuc mumbiŋ, “Go jâmbomac Anuture Ŋokâ.” 34 Eme riqic fotâcnerâ Genesarete mâreŋko moŋgeŋko fepie 35 ŋic jaŋe Jesu ʒâŋitarâ mupie hae rârec rârec rame ŋic jaŋe huchecfâc‐jeŋic amec‐jopa fisimbiŋ. 36 Eme jaŋe Jesu ʒiŋuc âzâcnembiŋ: “Manatec ŋaqige qaŋeŋnao barâ huc âke niniŋ‐nâpozejec.” Eme iŋuc embiŋ jaŋe ɋiɋic qafârembiŋ.