15
Wiac nâkicnezi ŋic maŋnâŋec mi hegâpâreekac
(Mar 7:1–23)
1 Dameŋ ira Jerusalem haeonec farisaio â miti qaqazu gâcne Jesurao fisirâ wiocnerâ mumbiŋ, 2 “Motecfâcge jaŋe wemocte kâcɋenefâc‐nâŋec jaŋere sâcmutâc dâŋ qâhuckeeŋgopieŋ? Ehuc nânâ nâniŋte mejeŋic mi ʒuʒure mâc nâeŋgopieŋ.” Sâc 4:2; Luk 11:38 3 Wiocnepie Jesuzi jazawec, “Â ŋoŋe ine wemocte ŋaŋacne sâcmutâc dâŋ reŋkehuc Anutu e jahacne micdâŋ âke sipueŋgopieŋ? 4 Anuture dâŋ kecʒiŋuc fokac: ‘Go neŋgoc mamac jahecge sâsec‐jofazemec.’ Erâ moc ʒiŋuc: ‘Moc e neŋgoc mamac jahecne sâwecdâŋ jasaocmu e mi juzejec.’ Wah 20:12; 21:17; Sâc 5:16 5 Ŋoŋe ine ʒiŋuc mueŋgopieŋ: ‘Moc e neŋgoc me mamac‐ticne âzâcneocmu: Wiac go garehuc dopecguzapo i Anutu taha bacnepemu; e sâcne iŋuc ehuc mi sâsec‐jofazejec. 6 Ŋoŋe iŋuc ehuc Anuture dâŋ bâsuepie raha ŋaŋacne dâŋ heʒakiepie foekac. 7 Burecŋic ŋoŋere Jesajazi findaŋdâŋ kecʒiŋuc sâcne muwec: Jes 29:13
8 ‘Ŋicguru ʒi jaŋe micbipiczi sâsecnuhuc
maŋjeŋiczi ine qikiŋnueŋgopieŋ.
9 Erâ dâŋ fârinere okacne ŋicdâŋ mu qaqazuc ehuc
no mai enarepie honepe racne eekac.’ ”
10 Jesu e iŋuc jazarâ ŋic gâcne hefârec‐jopame fisipie ʒiŋuc jazawec: “No dâŋ ŋazape manahuc mana taraniŋ: 11 Micŋeŋicko wiac raʒiekac izi mi hegâpârec‐ŋopaekac, micŋeŋickonec wiac wefuekac izi ine hegâpârec‐ŋopaekac.” Mat 12:34; Tim I 4:4
12 Iŋuc mume motecfâcne jaŋe jurâ jurâ maŋfuŋnao rarâ âzâcne mumbiŋ, “Go farisaio dâŋ jazatec mana gâpârembieŋ i manakic?” 13 Mupie jazawec “Jâc sasawa sambâŋ Mamac‐nanezi mi sarawec i unucke behec ezo. Joh 15:2 14 Ŋoŋe mâc behec‐jopaniŋ, jaŋe tiŋtuŋzi tiŋtuŋ jaŋere hata bâbânie. Ŋic tiŋtuŋ jajaheczi jojowac enicmu, ine qâsorierâ serec jaha hârâcko hunicmu i.” Mat 23:24; Luk 6:39; Joh 9:40; Rom 2:19 15 Eme Petorozi kecʒiŋuc muhuc âzâcnewec: “Go dâŋ suŋsuŋne nâzâmec, irec fuŋne ritutec mananaŋ.” 16 Mume Jesuzi muwec, “Hâc, ŋoŋe iŋuc jaha maŋ mamanasu tâmiric jueŋgopieŋ? 17 Fuŋne kecʒiŋuc mi manaŋgopieŋ: Miczi wiac nâpie buŋeŋicko hume getâckeme mocwâc hata‐ticnao wahaekac. 18 Â micŋeŋickonec wiac wahaekac ine maŋkonec, izi hâcne hegâpârec‐ŋopaekac. 19 Ŋicmaŋkonec wiac wefuekac ine mamanasu sâqocne, ʒika, boe sau, sasec, fiuc, burec, dâŋ gâgâpâcne. Fuf 8:21 20 Wiac iŋucnezi hegâpârec‐ŋopaekac. Â me mi ʒurehuc wiac nânâ izi mi hegâpârec‐ŋopaekac.”
Qâpuc ŋokac moczi wira wâwâsic ecnewec
(Mar 7:24–30)
21 Eme Jesu e mâreŋ i beherâ Tiro â Sidoŋ hae ŋepicko rawec. 22 Ra juhame Kanaaŋ ŋic qâpuc jaŋeraonec ŋokac moczi warerâ Jesu wira wâwâsic ecnehuc muwec, “Wofuŋ, go Dawidire ɋâriczi nore mac buge sâqoreoc me. Otâ‐nane e demoŋzi mâretec ecneekac.” 23 Iŋuc mume Jesuzi manarâ dâŋ moc mi bâtikiecnewec. Iŋuc eme motecfâc‐ticne jaŋe âzâcne mumbiŋ, “Go ŋokac soretec raoc, e râpefuŋ‐nâŋecko wira oowa warekac.” 24 Mupie jazawec, “No Israe ŋicguru lama iŋucne qâsoriekicne, jaŋerao sawa sorecnukicne.” Mat 10:6 25 Muhame ŋokac e maŋfuŋnao fisirâ fodaperâ numucnehuc muwec, “Wofuŋ, go sifu mac baficnuc.” 26 Iŋuc mume ʒiŋuc âzâcnewec: “Naru motec nânâ‐jeŋic jowac rorâ qâto gugumec‐jopa i mi sâckeocmu.” 27 Mume dâŋ ʒiŋuc bâtikiecnewec: “Wofuŋ, i sâcne mukic, erâ qâto jaŋe rufâc‐jeŋic jaŋere teboonec huŋgaŋne wahame i sifu mac nâeŋgopieŋ.” 28 Iŋuc mume âzâcnerâ muwec, “O ŋokac, mamanasiŋge fekicne, mukomec iŋuc egareoc.” Muhame izia otâ‐ticne biaŋkewec. Mat 8:10, 13
Jesuzi ŋic bocjaha bâpiaŋ‐jopawec
(Mar 7:31–37)
29 Eme Jesu e mâreŋ irecnec mocwâc risie wareku Galilaia riqic,* Genesarete riɋicte mukicne. ira fisiwec. Fisirâ tikio ferâ ŋehame Mar 7:31 30 ŋic gurune gurune erao fisimbiŋ. Jaŋe ŋic sahac‐jeŋic ɋaŋakicne â tiŋtuŋ â ʒeke puriŋ â nâŋguŋ â huc ʒâichec amec‐jopa fisirâ Jesure maŋfuŋko guruc‐jopapie bâpiaŋ‐jopa‐fârewec. 31 Eme nâŋguŋzi dâŋ dâŋ embiŋ â puriŋzi hata juju embiŋ â sahac‐jeŋic ɋaŋakicnezi sanaŋkembiŋ â tiŋtuŋzi ʒâŋe fifi embiŋ. Eme ŋic jaŋe i hone manac erâ boc seckehuc Israe ŋic jaŋere Anutu mumbiaŋkembiŋ. Mar 7:37
Jesuzi ŋic 4000 nânâ gumec‐jopawec
(Mar 8:1–10)
32 Eme Jesuzi motecfâcne hefârec‐joparâ jazawec, “No ŋic jaŋere bunane sâqorekac, jaŋe norao ʒoaŋ gie bapa jahec â moc juku nânâre hâmoŋgopieŋ. Eme nânâ tâmiric sorec‐jopape rarâ hatao sipirickenʒipiŋte manabâc ekopac.” Mat 14:14 33 Mume motecfâc‐ticne jaŋe ʒiŋuc âzâcnembiŋ: “Ʒi tuhuo poroŋ sâko wenirec bâfuarâ ŋic guru dindiŋ iŋucne gumec‐jopapene nâpie sâcjopaocmu?” 34 Iŋuc âzâcnepie wio‐jarehuc muwec, “Ŋaŋacne poroŋ wezimuc fokac?” Eme jaŋe mumbiŋ, “Poroŋ 7 â opâ qowi jahec mac.” 35 Eme manarâ mume ŋic jaŋe qâzuckerâ waha ŋerambiŋ. 36 Iŋuc epie poroŋ 7 â qowi i rorâ daŋge murâ bazuhuc motec jareme jaŋe kâdoc bahuc ŋic jare rambiŋ. 37 Jare rapie ŋic jaŋe mâmâc sasawa nâ gapec embiŋ. Eme tiwâne ŋerawec i ro qânusuc epie sasac 7 fusucmawec. 38 Nânâ nâmbiŋ ŋic i jaŋere ʒare 4 tauseŋ, ŋokac naru motec mi wosec‐jopakicne. 39 Eme ŋic râec‐jopame rapie e jahacne ine wokeo ferâ raku Magadaŋ mâreŋko fisiwec.