3
Mimiŋne jahec‐nâŋec sâqorepic
1 Wofuŋ Anutu e kâtere wiac jujune gâcne bâfuac‐jopawec jaŋere sâc jâuru‐fârehuc homare gibioczi fejâmbâŋkewec. Eme homa e ŋokac ʒiŋuc muhuc wiocnewec: “Jufuo jâc sasawa doma rakac irec fârine mi nânicte Anutuzi muwec me?” 2 Eme ŋokaczi homa âzâcnewec: “Nâhe jufuo jâcne jâcne doma rakac irec hândâŋne sâcne nanacte mana‐nâctekicne, 3 â jufu ʒâʒâŋiŋko jâc moc domakac irec hândâŋne ine Anutuzi mi nanacte, erâ wâc mi bâuanacte muwec, iŋuc erâ hâmozipecte.” 4 Eme homazi ŋokac âzâcnewec: “Aricne, ŋohe mi hâmonicmu. 5 Anutu e ʒiŋuc manakac: Ŋohe hândâŋ i nâpire ʒâŋe‐ŋekic tâcneme e jahacne iŋucne erâ biaŋne â sâqocne irec fuŋne mana taranicmu.” 6 Eme ŋokaczi jâc honerâ ʒiŋuc manawec: Jâchândâŋ i nânâne biaŋ â hawarine hone aŋac eene, erâ wâc mamana bâbâfua‐ticnehec muhuc maname biaŋkewec. Iŋuc eku hândâŋ i batararâ nâwec. Nâhuc ŋowene râcneme nâwec wâc. 7 Nâpire ʒâŋe‐jekic tâcnewec. Tâcneme biuctac jupic i hone tarapic. Irec qoŋgeŋ rehaczi siŋiŋ furâ jomapic.
8 Eme ʒoaŋ otewehuc hae urueme Wofuŋ Anutu e jufuo hata jume fânâŋ‐ticne manapic. Manarâ ŋic â ŋonâŋ‐ticne jahe Wofuŋ Anuture hâwic‐jofame jufuo jâc ŋondeŋko soŋkepic. 9 Ehame Wofuŋ Anutuzi ŋic wiracnerâ muwec: “Go wena?” 10 Eme muwec: “No jufuo hata jutec fânâŋge manarâ, biuctac jukopacte hâwicnume soŋkepac.” 11 Eki muwec: “Biuctac jukomec i mozi gazajec? Go jâchândâŋ mi nâcmurâ mupaŋke‐garepo i moc nâmec me?” 12 Ŋiczi muwec: “Ŋokac nohec juocte naremeŋ eki jâchândâŋne nareme napac.” 13 Eme Wofuŋ Anutuzi ŋokac âzâcnewec: “Go wemocte iŋuc emec?” Ŋokaczi muwec: “Homazi eatucnume napac.”
14 Eme Wofuŋ Anutuzi homa ʒiŋuc âzâcnewec:
“Go iŋuc emecte
ine hae qowi â kâte qowi
jaŋeraonec go mocjaha sâwecgukopac.
Go mâreŋko jucmu sâc
bugezi foforâ juhuc gâc wândoc nâzemec.
15 Erâ go â ŋokac ŋoherao kikisâ sanaŋ râekopac,
izi ɋâricge â ɋâric‐ticne jaherao wâc fozejec.
Eme eki qizecge âtenʒaŋneocmu,
goki ine kike kiririŋne kinʒaŋnecmu.”
16 Ŋokac ine ʒiŋuc âzâcnewec:
“Kiwechec juhaŋtec ʒâic bocjaha bâfua‐garepemu,
eme gozi kicgukuhame naru motec rocjopazemec.
Ŋowegere aŋacguha
eki bomboŋ egarezejec.”
17 Adam ine ʒiŋuc âzâcnewec:
“Go ŋonâŋgere dâŋ reŋkehuc
jâchândâŋ mi nâjâmbâŋkecmurâ mupaŋke‐garepo i nâmec,
irec gore ehuc mâreŋ sâweckekopac!
Go ʒâic gie sâko tatara tâmiric bahuc
nânâge bâfuazemec.
18 Ehame hofâ qinʒiŋ wiaczi giegao kosa fuaha
irecnec monʒaŋ wiac nâhuc juzemec!
19 Fofoŋac sâkohec nânâge nârahuc juku
mâreŋkonec rocgukicnere
mocwâc risie mâreŋko jaha huzemec!
Gâc wândoczi gâc wândocko jaha risiezemec!”
20 Eme ŋic e ŋonâŋ‐ticnere ʒâŋe Ewa muwec, e mâreŋko ŋic sasawa fuambeŋ nâŋâcne neŋgoc fuŋfuŋ ewec hâcne. 21 Eme Wofuŋ Anutu e qowi sahaczi ŋaqi ɋâtârâ ŋic ŋokac hejacteme hume rojupic.
22 Wofuŋ Anutu e iŋuc erâ ʒiŋuc muwec: “Jei! Ŋic e biac nâŋâcne sâcko biaŋne â sâqocne irec fuŋne mamana ejec! E meticne sicnerâ jujujâcte hândâŋ rorâ nâhuc juju sanaŋ juzacte mi manacnezo.” 23 Wofuŋ Anutu e iŋuc murâ ŋic soreme Edeŋ jufuonec hurâ rawec, e mâreŋzi bakicnere hu mâreŋ sawanao e jahac gie he sarac eocte. 24 Wofuŋ Anutuzi ŋic ŋokac iŋuc jâpec‐jofame hurapic. Eme Edeŋ jufu gie ʒoaŋ wewefu‐ticnao bâbâricte ʒocbâruŋ âkendâŋnehuc kerubim jajahec jahe jujujâcte hata âte bâzickenicte soŋaŋ râec‐jofawec.