2
Anutuzi hombaŋ ŋewec
Iŋuc hâcne ehuc sambâŋ â mâreŋ jahe kikefuŋ guru sâkofâc‐jekic jaŋehec bâfuac‐jopa‐fârekicne. Eme ʒoaŋ 7 ira Anutuzi gie‐ticne batara‐fârehuc gie wiac bawec irec ŋemanaocte hombaŋ ŋewec. Iŋuc ehuc Anutuzi ʒoaŋ 7 hâcne jambuŋkehuc bâtiriwec, i wiac mocte mâcne, wiac sasawa bâfua tararâ ŋemanaocte hombaŋ ŋewec. Kecʒi sambâŋ â mâreŋ kikefuŋfâc‐jekic jaŋehec bâfuac‐jopa wefukicne irec binaŋ.
Ŋic ŋokac â jufu gie bâfuac‐jopakicne irec binaŋ
Wofuŋ Anutuzi sambâŋ â mâreŋ bâfuac‐jofawec dameŋ ira jâc me monʒaŋ wiac fuŋne fuŋne mâreŋko mi fua rawec, i Wofuŋ Anuture micte hoezi moc mi hewecte, â gie hesarac ee ŋic mi bâfuac‐jopakicnere iŋuc hâcne fowec. Dameŋ ira mâreŋ maŋnaonec rombâŋ sâkozi wefu fehuc waha mâreŋ bâgunuckewec. Eme Wofuŋ Anutu e mâreŋzi ŋic moc basarickehuc sâkenao juju mâro ficneme hume ŋic e nokafe herâ ɋârewec. Eme Wofuŋ Anutuzi ʒoaŋ wewefunaopec Edeŋko jufu gie moc sararâ ŋic bâfuawec e ira râewec. Eme Wofuŋ Anutuzi mâreŋ ecneme e jâc hone aŋacnehec â fâri nânânehec biaŋne fuŋne fuŋne âke sueme wefuwec, jufu ʒâʒâŋiŋnao ine jujujâc â fuŋne mamana jâc jahe wefupic.
10 Opâ kâcɋene moc e ine Edeŋ jufu gieonec wefurâ bâbâgunuc gie baku gieonec waha fâuckeme sohocne 4 ewec. 11 Moc ʒâŋene Pisoŋ, izi Hawila mâreŋ orâŋke‐fârekac. Ira gol fokac. 12 Mâreŋ irec gol i furi sâko. Ira wâc Bedolac sâfâ â Soham qânâ fokopirec. 13 Opâ ombâŋne moc ʒâŋene Gihoŋ. Eki Kusu mâreŋ orâŋke‐fârekac. 14 Â ombâŋne moc ʒâŋene Tigirisi, eki Asiria mâreŋ ʒoaŋ wewefu‐ticnao hurakac. Â ombâŋne moc ʒâŋe‐ticne Eufrata.
15 Eme Wofuŋ Anutuzi ŋic rorâ Edeŋ jufu gie ira hone soŋaŋ ehuc giene baocte râewec. 16 Râerâ ŋic ʒiŋuc mupaŋkecnewec: “Jufu gieo jâc fârihec doma raŋgopieŋ i sâcne ro nâc efârecmu. 17 Fuŋne mamana jâc mocjaha ere fârine moc mi nâjâmbâŋkezemec! Sifu nâcmuo ine hâmo‐jâmbâŋkecmu.”
18 Eme Wofuŋ Anutuzi muwec: “Ŋic e buc jume mi biaŋkekac. Irec no ere sâc jaha âgo babafic‐ticne moc bâfuazepac!”
19 Wofuŋ Anutu e hae qowi â kâte qowi sasawa â sawa wipe sasawa mâreŋzi bacjoparâ ŋiczi ʒâŋe‐jeŋic weniŋuc muocmu i hone manac eocte ŋictao amec‐jopa fisiwec. Eme ŋiczi ʒâŋe‐jeŋic mufuahuc muocmu i foocte muwec. 20 Eme ŋic e hae qoqi â kâte qowi â sawa wipe sasawa jaŋere ʒâŋe mufârewec. E jahacne sâc âgo babafic‐ticne moc ine mi bâfuawec. 21 Irec Wofuŋ Anutuzi ŋic ecneme guŋsâko qâmâckeme fowec. Eme tambaraŋne moc unuckerâ fofotacne biuczi bâbâzickewec. 22 Erâ Wofuŋ Anutu e ŋicte tambaraŋ rowec izi ŋokac moc barâ ŋictao jowa rawec. 23 Jowa rame ŋiczi honerâ muwec:
“Keʒi jâmbomac siec‐nane
â biuc‐nane!
E ŋickonec rokicnere
ʒâŋene Ŋokac mucnezo.”
24 Irec hâcne ŋiczi neŋgoc mamac jahec‐ticne behec‐jofarâ ŋonâŋ‐ticnerao qohotame jahe maŋ sahac mocjaha erâ junicmu. 25 Ŋic ŋokac jahe mâmâc jaha biuctac juhuc mi mimiepic.