FUFUA
FUFUA papia qizec izi MITI RAŊɊAnere birio micne bakac. Maŋnao dâŋ neŋgocne neŋgocne biri‐ticne kecʒiŋuc forakac:
Fuf 1; Fuf 2:1–4 ira Anutuzi sambâŋ â mâreŋ â ŋic erâ wiac sasawa bâfuac‐jopa‐fârewec irec binaŋ namba wâŋ qâreŋkekicne fokac.
Gaŋ 2:5–24 ira ine Anutuzi ŋic erâ sambâŋ â mâreŋ bâfuac‐jopawec irec binaŋ namba 2 fokac. Ine hâcne, Anutuzi sambâŋ â mâreŋ â ŋic bâfuac‐jopawec irec binaŋ jajahec fokopirec. Anutu e hata weniŋucko â dameŋ wenimoira wiac sasawa bâfua‐fârewec irec binaŋ i bârâwiŋ fokac hâcne.
Eme izi kecʒiŋuc mufua‐nârekac: Papia i ŋic mocjahazi sawa mi qâreŋkewec, ŋic jajahec me jahec â moczi qâreŋkembiŋ mecne. Ŋifec ine sifu kecʒiŋuc honeŋgopeneŋ wâc: Sambâŋ â mâreŋ â ŋic bâfuac‐jopakicne binaŋ jajahec irec dâŋqizecne mocjaha wirec‐jekic fokac, kecʒiŋuc: Anutu tâpiri rune e wiac sasawa irec bâbâfua. Dâŋqizecne i hâcne qâreŋŋic jajahec jahe mâmâc jaha mutaniŋkekopirec.
Fuf 3. Ira sâqocne â irec okacne fuawec irec binaŋ fokac.
Fuf 4—5. Irec maŋnao ine Adamtaonec ŋic fua wefukupie Noarao tarawec irec dâŋ binaŋ fokac.
Fuf 6—11. Ira rumi sâko fuawec, erâ Noa â ɋâricfâc‐ticne jaŋe fua sawec ewefumbiŋ irec dâŋ qâreŋkekicne fokac. Binaŋ wiac irec maŋnao Anutu tiri juju‐ticnere fuŋne erâ buuruc â erâ‐eesanaŋ‐ticnere fuŋne i mâmâc fua taniŋkekac. Erâ Noa e ŋic mamanasiŋhec juhuc Anuture dâŋ mana rereŋ ewec i mujaŋgeŋkekicne wâc.
Fuf 12. Ira ine Anutu e tiri â tiŋne rune jukacte ŋic jaŋe wiac mamakâcne fuŋne fuŋne bâfuapie hone suŋgiŋ ejarehuc bâtâc qâtâtiec‐jopawec, erâ weniŋuc ehuc e jahacne tiri ŋicguru moc fuarâ juniŋte manasuwec, irec dâŋ muhuc Israe ŋic mimiŋnefâc‐jeŋic Abraham, Isaka â Jakobo jaŋere binaŋ fuŋkerâ qâreŋke raku gaŋ 50 ira qâreŋke tarakicne. Ine kecʒiŋuc:
Fuf 12:1Fuf 25:18. Ira Abrahamte binaŋ fokac.
Fuf 25:19Fuf 27:46. Ira Isakare binaŋ bâfuaŋgopeneŋ.
Fuf 28—50. Ira ine Jakobo â ŋokâfâcne jaŋere binaŋ fofârekac.
1
Anutuzi sambâŋ â mâreŋ bâfuac‐jofawec irec binaŋ
Dameŋ fufuŋkenao Anutuzi sambâŋ â mâreŋ bâfuac‐jofawec. Ehame mâreŋ e sisifucne â tacne fowec, â ʒâkâŋ ʒora duŋdapâczi foŋkewec, ehame opâ faicko Wofuŋte Mârozi teŋ hâmorâ rac warec ewec. Eme Anutuzi ʒiŋuc muwec: “Tamaeoc!” Mume tamaewec. Eme Anutuzi tatamac honeme biaŋkeme tatamac â dapâc bâtâc bacjofawec. Ehuc tatamacte ʒâŋe ʒoaŋ â dapâcte ʒâŋe ŋafe mujactewec. Iŋuc eme hae ŋaferâ fureme ʒoaŋ 1 tarawec.
Tarame Anutuzi ʒiŋuc muwec: “Opâ ŋondeŋko aka sanaŋ moc fuaoc, ehuc izi opâ bâtâc bazejec.” Iŋuc mume opâ ŋondeŋko aka sâko fuarâ izi opâ bârâwiŋneme tâcnerâ faic moc ewec â juwic moc ewec. Iŋuc fuame Anutuzi aka irec ʒâŋe sawa muwec. Eme hae ŋaferâ fureme ʒoaŋ 2 tarawec.
Tarame Anutuzi ʒiŋuc muwec: “Sambâŋ rurumaŋnao opâ mockoa qâzuckepie kereŋnezi fua tâcneoc!” Mume iŋuc fuawec. 10 Eme Anutuzi kereŋne irec ʒâŋe mâreŋ muwec â opâ ʒâkâŋ sâko irec ʒâŋe hâwec muwec. Eme honeme biaŋkewec. 11 Eme Anutuzi muwec: “Mâreŋte faio wiac fofone i âkeʒurâ wefuoc! Nânâ monʒaŋ ʒariŋ wiac ukichec sasawa, â jâc wiac hândâŋ ukichec sasawa, iŋucne fuŋne fuŋne wefunʒepieŋ!” Mume iŋuc hâcne fuawec. 12 Mâreŋzi âke sueme nânâ monʒaŋ ʒariŋ wiac fuŋne fuŋne, ukic‐jeŋichec sasawa wefumbiŋ, â jâc fuŋne fuŋne fârihec â fârimaŋko ukic‐jeŋichec sasawa. Eme Anutuzi honeme biaŋkewec. 13 Iŋuc eme hae ŋaferâ fureme ʒoaŋ 3 tarawec.
14 Tarame Anutuzi ʒiŋuc muwec: “Sambâŋko ʒoctamac fua raniŋ. Jaŋe hâcne ʒoaŋ â ŋafe bâtâc bacjofanʒepieŋ, ehuc hoemaŋ â sâko ʒoaŋ, gie bapa â jara irec dameŋ mufua‐nârehuc doma ranʒepieŋ! 15 Ehuc sambâŋte ʒoctamac erâ mâreŋ âke tamaenʒepieŋ!” Mume iŋuc fuawec. 16 Anutuzi iŋuc ehuc ʒoctamac sâko jajahec bâfuac‐jofawec, kâcɋene moc e ʒoaŋko micne barâ juocte â kâkâcɋene moc e ŋafeo micne barâ juocte. Erâ wâc bâpiŋ mâmâc bâfuac‐jopawec. 17 Jaŋe mâreŋ âke tamaeniŋte â ŋafe ʒoaŋ soŋaŋ‐jofahuc dapâc â tatamac bâtâc bacjofaniŋte Anutuzi sambâŋko hâcne râec‐jopawec. 18 Eme Anutuzi honeme biaŋkewec. 19 Iŋuc eme hae ŋaferâ fureme ʒoaŋ 4 tarawec.
20 Tarame Anutuzi ʒiŋuc muwec: “Opâ jaŋere maŋko opâ qowi fuŋne fuŋnezi fuarâ fusucmapie qiriŋ sâko fuazejec â wipe jaŋe sawao furuc furuc qahuc junʒepieŋ!” Mume fuawec. 21 Anutuzi hâwec qowi sâko mako mecne â wiac jujune fuŋne fuŋne opâmaŋko qiriŋhec foŋgopieŋ, â wipe fakechec fuŋne fuŋne, iŋuc bâfuac‐joparâ honeme biaŋkewec. 22 Eme Anutuzi ʒiŋuc muhuc jambuŋ‐jopawec: “Ŋoŋe ukichec erâ sawe mâririackehuc opâ hâwec sâcke‐fârenʒepieŋ â wipe jaŋe mâreŋ faio sawenʒepieŋ!” 23 Iŋuc mume hae ŋaferâ fureme ʒoaŋ 5 tarawec.
24 Tarame Anutuzi ʒiŋuc muwec: “Mâreŋzi wiac jujune fuŋne fuŋne kiweckerâ rozejec, hae qowi â homa gisic â kâte qowi fuŋne fuŋne!” Mume iŋuc fuawec. 25 Anutuzi hae qowi fuŋne fuŋne â kâte qowi fuŋne fuŋne erâ homa gisic wiac fuŋne fuŋne iŋuc hâcne bâfuac‐joparâ honeme biaŋkewec.
Anutuzi ŋic â ŋokac bâfuac‐jofawec
26 Eme Anutuzi ʒiŋuc muwec: “Ajoc! Nâŋâc nâŋâcne hawarire sâcko ŋic bâfuac‐jopanaŋ! Jaŋe hâwec qowi â sawa wipe â hae qowi â kâte qowi sasawa erâ homa gisic wiac mâreŋko babarâ jueŋgopieŋ jaŋe ŋicwofuŋ ejarenʒepieŋ!” 27 Eme Anutu e hawari‐ticnere sâcko ŋic bâfuawec hâcne. Ŋic â ŋokac bâfuac‐jofawec. 28 Erâ jambuŋ‐jofahuc ʒiŋuc jasawec: “Ɋârichec ehuc fua sawec erâ mâreŋ ŋefusucmahuc ruckenʒepieŋ. Ehuc hâwec qowi â sawa wipe â mâreŋ qowi gisic wiac sasawa ŋicwofuŋ ejarenʒepieŋ!” 29 Anutuzi iŋuc murâ ʒiŋuc jasawec: “No monʒaŋ wiac ukic‐ticne tie raekac â jâcfâri nânâne ukic‐ticnehec ʒi râe‐ŋactekopac, izi nânâ‐ŋekic ezejec. 30 Â mâreŋ qowi â sawa wipe â homa gisic wiac nokafehec bâfuac‐jopakicne, jaŋere nânâ ine sopâc hofâ qinʒiŋ wiac râekopac.” Eme iŋuc fuawec hâcne. 31 Eme Anutuzi wiac bâfuawec i hone‐fâreme biaŋne jâmbâŋ ewec. Eme hae mocwâc ŋaferâ fureme ʒoaŋ 6 tarawec.