1 Eme Isaka e jufeku ŋicqizec erâ ʒâŋe‐ticne mâteŋkeme wiac sâcne mi honehuc mârâc ŋokâ‐ticne wiracnerâ âzâcnewec: “Ŋokâ‐mae!” Eki muwec: “No ʒi.” 2 Mume muwec: “Manakic, no biac ŋicqizec ekopac, ehuc hâmoc dameŋ‐nane mi manakopac. 3 Irec go wosaŋeŋte wiacge, tepege neŋgocne motecne rorâ kâteo ra qowi moc qanarezemec, 4 erâ aŋac‐nanere sâcko rikerâ bare‐narezemec. Eme hâmoczi mi rocnuha qowi nârâ jambuŋguzepac.”

5 Isaka e ŋokâ‐ticne Esauhec dâŋ muc manac ehapire Rebekazi hazec râerâ manawec. Eme Esau e qowi qaocte kâteo rawec. 6 Ehame Rebekazi ŋokâ‐ticne Jakobo ʒiŋuc âzâcnewec: “Manakic, no mamacgezi hahacge Esau ʒiŋuc âzâcneme manapac: 7 ‘Go qowi moc baware‐narerâ nânâ aŋacne rike‐naretec hâmoczi mi rocnuha Wofuŋte maio jambuŋguzepac.’ 8 Irec ŋokâ‐mae, ʒi dâŋ gaza mutâc epe mana rereŋ ezemec. 9 Go ʒiŋuczia rarâ noniŋ motecne ŋicne jajahec baware‐narec, eme noni mamacge aŋac‐ticnere sâcko rike bâmoc ezepac. 10 Eme goki mamacgerao bafetec nârâ hâmoczi mi maickeha jambuŋguzejec.” 11 Jakobo e ine neŋgoc‐ticne Rebeka ʒiŋuc âzâcnewec: “Manakic, hahac‐nane Esau e sahac ʒâwânehec, no ine sahac fâfâsâc. 12 Eme mamac‐nanezi bâuacnuocmu mecne, iŋuc eme no ere maio eeatuc ŋic tinac domahuc jambuŋ mâcne, sâwec hotâckepemu hâcne.” 13 Eme neŋgoc‐ticnezi âzâcnewec: “Ŋokâ‐mae, sâwecgezi nore faio fezejec. Go ine sifu dâŋnane reŋkehuc ra noniŋ motecne baware‐narec.” 14 Eme eki ra rorâ baware neŋgoc‐ticne râcneme neŋgoc‐ticnezi nânâ moc mamac‐ticnere aŋac irec sâcko rike bâmoc ewec. 15 Erâ Rebekazi mârâc ŋokâ‐ticne Esau ere ŋaqi wiac biaŋne ficko fowec i rorâ ŋokâ‐ticne Jakobo hecneme huwec. 16 Erâ noniŋ motecne jahere sahaczi meticne â upe‐ticne foŋkerâ 17 noniŋ aŋacne â poroŋ rike bâmoc ewec i ŋokâ‐ticne Jakobo menao râewec.

18 Eme eki mamac‐ticnerao barerâ muwec: “Mamac‐nane!” Eki muwec: “Motec‐mae, no ʒi, go ine mo?” 19 Eme Jakobozi mamac‐ticne ʒiŋuc âzâcnewec: “No mârâc ŋokâge Esau, no dâŋ nazamec i efârepac, go faharerâ ŋehuc qowi‐nane nârâ jambuŋnuzemec.” 20 Mume Isakazi ŋokâ‐ticne ʒiŋuc âzâcnewec: “Ŋokâ‐nane, go weniŋuc erâ qowi biac jâmbâŋ bâfuamec?” Eme eki dâŋ ʒiŋuc bâtikiecnewec: “Wofuŋ, gore Anutu, eki nowatume biac bâfuapac.” 21 Iŋuc mume Isakazi Jakobo âzâcnewec: “Ŋokâ‐nane, waretec bâuacgupe, eme go ŋokâ‐nane Esau me mâcne, irec fuŋne taniŋkeoc.” 22 Eme Jakobo e mamac‐ticne Isaka erao rame eki bâuarâ muwec: “Dâŋge manape Jakobore dâŋ ekac, â megere ine manape Esaure me ekac.” 23 Eme meticne Esaure me iŋucne ʒâwânehecte mi ʒâŋitahuc jambuŋkewec. 24 Erâ muwec: “Go jâmbomac ŋokâ‐nane Esau me?” Eki muwec: “Ine hâcne.” 25 Eme muwec: “Nânâ barec, eme ŋokâ‐nanere qowi rikekicne i nârâ jambuŋguzepac.” Eme râcneme nâwec. Ehame waiŋ opâ mâmâc râcneme nâwec. 26 Erâ mamac‐ticne Isakazi ʒiŋuc âzâcnewec: “Ŋokâ‐nane, maŋfuŋ‐naneo ware muducnuc.” 27 Eme maŋfuŋ‐ticnao rarâ muduckewec. Ehame ŋaqi‐ticnere âsu manarâ dâŋ ʒiŋuc muhuc jambuŋkewec:

30 Eme Isaka e Jakobo jambuŋkeme tarame Jakobozi mamac‐ticne beherâ rahame Esauzi kâteonec risie warewec. 31 Erâ e iŋuc jaha qowi rikerâ mamac‐ticnerao baferâ âzâcnewec: “Mamac‐nane, go faharerâ ŋokâge nore qowi nârâ jambuŋnuzemec.” 32 Eme mamac‐ticne Isakazi ʒiŋuc âzâcnewec: “Hâc, go mo?” Eki muwec: “No mârâc ŋokâge Esau.” 33 Eme Isaka e fâfâre sâqorehuc muwec: “Eme go mi warehaŋtecne qowi qarâ bawefu‐nareme nârâ jambuŋkepac e mo? Jambuŋzi erao fohuc juocmu sanaŋ.” 34 Eme Esau e mamac‐ticnere dâŋ i manarâ kio ŋâŋâtâc ehuc mamacne âzâcnewec: “O mamac‐nane, no sifu jambuŋnuzemec wâc.” 35 Isakazi ine muwec: “Ɋagezi sioc ehuc jambuŋge gowac rojec.” 36 Eme muwec: “Sowine ʒâŋe‐ticne Jakobo mukicne, e sioc enareha biac arec jajahec ekac, e qanaŋ mârâc fufuare wiac biŋe‐nane nowac rowec â ʒi jambuŋ‐nane nowac rokac wâc.” Erâ ʒuhuckerâ muwec: “Nore biŋe jambuŋ moc mi sakaremec me?” 37 Eme Isaka e Esau ʒiŋuc âzâcnewec: “Manakic, e gore ŋicbomboŋ juocte âkendâŋnepac â qomâfâc‐ticne jaŋe ere kiŋaŋ qaqa juniŋte mupac erâ jacgoŋ â waiŋ i ere biŋe jaha qapac. Irec, ŋokâ‐mae, go wemo wiac mo egarepemu?” 38 Eme Esauzi mamac‐ticne âzâcnewec: “Mamac‐nane, jambuŋge mocjaha mac sawa fogarejec me? O mamac‐nane, no sifu jambuŋnuzemec wâc!” Eme Isaka e dâŋemâc ŋeha Esauzi ki owa kâcɋene ewec. 39 Iŋuc eme mamac‐ticne Isakazi dâŋ ʒiŋuc muhuc bâtikiecnewec:

41 Esau eki ine mamac‐ticnezi Jakobo jambuŋkewec jambuŋ irec erâ Jakobo aaric manacnewec. Ehuc maŋnezi ʒiŋuc manasuwec: Mamac‐nanere ki mamakuc ee dameŋne bembeŋkekac, irec faicnao ɋanane Jakobo qâhâmozepac. 42 Eme Rebeka e mârâc ŋokâ‐ticnere dâŋ i âzâcnepie manarâ ʒâhec ŋokâ‐ticne hefârerâ dâŋ ʒiŋuc âzâcnewec: “Manakic, hahacge Esau e okacne bazu‐garehuc qâhâmocguzo mukac. 43 Irec, ŋokâ‐nane, ʒiŋuc mupe manac: Go fahare hahac‐nane Labaŋ, Haraŋ haeo jukac, erao wiserâ razemec. 44 Erâ erao dameŋ ʒoricne juhaŋtec hahacgere aariczi mâteŋkezejec. 45 Mâteŋkeme go wiac ecnemec irec nikeckeha no gorao dâŋ râepe fâme manarâ risie warezemec. Ŋohe wemocte ʒoaŋ ijaha mâmâc omae‐narenicmu?”

46 Rebeka e iŋuc murâ Isaka ʒiŋuc âzâcnewec: “No Hiti ŋokac jahere takicnuekac. Ehame Jakobo e iŋuc jaha Hitiŋic jaŋere naru, mâreŋ ʒirec rune hâcne, jahe iŋucne moc roocmuo no wenac epemu?”