1 Juku mâreŋ ira roroc mocwâc fuawec. Mârâc Abrahamzi juhame moc fuawec, ʒi ine moc. Irec Isaka e Filisa ŋic jaŋere ŋicwofuŋ ʒâŋene Abimelec, Gerari haeo juwec, erao rawec. 2 Ehame Wofuŋzi fuacnerâ muwec: “Go Aigita mâreŋko mi rahuc mâreŋ moc noni gaza gowatuc epemu ira ra juzemec. 3 Mâreŋ ira jaba juhaŋtec no gohec juhuc jambuŋgupemu. Mâreŋ i sasawa go â ɋâricfâcge ŋarepemu hâcne, ehuc mamacge Abraham mumupaŋ dâŋ âzâcnepo i fârio qazejec. 4 Ɋâricfâcge jaŋe mana‐jarepe fua sawec epie ʒare‐jeŋic sambâŋko bâpiŋ ŋeraŋgopieŋ irec sâc ezejec, â ɋâricfâcge jaŋere jambuŋzi mâreŋ sâc ŋicne ŋicne sâcjopa‐fârezejec. 5 I Abrahamzi dâŋnane â mumutâc‐nane â sâcmutâc‐nane â dâŋsanaŋ‐nane â wiac sasawa mana rereŋ efârewecte iŋuc epemu.”

6 Iŋuc mume Isaka e Gerari haeo juwec hâcne. 7 Eme mâreŋ irec rune jaŋe ŋonâŋ‐ticnere mu indiŋ ecnepie ʒiŋuc jazawec: “E seŋnane.” “E ŋonâŋ‐nane” iŋuc muocte hâwickewec. Maŋnezi ʒiŋuc manasuwec: Fuŋne mufuape mâreŋ rune jaŋe Rebekare erâ qâhâmocnunʒipiŋkohec, e sahac hawari‐ticne biaŋne irec. 8 Eme ira juhuc dameŋ mocko ŋonâŋ‐ticne Rebeka hâpo mumuduc ecnewec. Ehame ŋicwofuŋ Abimelec e qâqâtâc kataŋko honec‐jofawec. 9 Honerâ Isaka hefâreme fisime âzâcnewec: “E ŋonâŋge i! Fuŋne weniŋucte ‘E seŋnane’ mumec?” Isakazi muwec: “Jâmbomac, no ere erâ nupie hâmozipore hâwicnume mupo.” 10 Eme Abimeleczi muwec: “Go wiac hâhâwicne enâremeŋ, irec ŋicfâc‐nane jaŋeraonec moczi ŋonâŋge bâsâqoreme muzac, nâŋe gore erâ kiŋ hotâckenʒapeŋ.” 11 Iŋuc murâ ŋicfâcne ʒiŋuc jazawec: “Moc e ŋic ʒi me ŋonâŋ‐ticne wiac iŋuc me iŋuc ecneocmu e hâmoocmu.”

12 Eme Isaka e mâreŋ ira gie he sarac ewec, ehame Wofuŋzi jambuŋkeme jara ira mâriri sâko fuacnewec. 13 Eme ŋic e mazuc mâririhec eha mafa sâko mako fuacnewec. 14 E hâcne lama bulimakao guru sâko â kiŋaŋ qaqafâcne bocjaha bacjopa juwec. Irec Filisa ŋic jaŋe honerâ iiŋ guuŋ ecnembiŋ. 15 Opâ nombâŋ sasawa mamac‐ticnere kiŋaŋŋic jaŋe Abrahamzi juhame rombiŋ, i hâcne Filisa ŋic jaŋe mâreŋ fiapie hume hemase‐fârembiŋ. 16 Eme Abimeleczi Isaka ʒiŋuc âzâcnewec: “Go nâŋe siric‐nâpomeŋte behec‐nâporâ mocko ra juzemec.”

17 Eme Isaka e hae mâreŋ i beherâ Gerari wâneŋko hae boze barâ ŋec juc ewec. 18 Erâ opâ nombâŋ mamac‐ticne Abraham juhame rombiŋ â Filisa ŋic jaŋe hemasembiŋ i hâcne Isakazi mocwâc roniŋte muwec. Erâ opâ nombâŋ irec ʒâŋe mamacnezi muwec ijaha muwec. 19 Eme Isaka kiŋaŋŋicfâcne jaŋe mâreŋ ro gufuc ehuc opâ nombâŋ moc ira opâ ʒâŋene bâfuambiŋ. 20 Gerari lama bulimakao soŋaŋ jaŋe ine Isaka soŋaŋfâcne jaŋehec dâŋ mumuc ehuc ʒiŋuc mumbiŋ: “Opâ i nâŋere.” Iŋuc epie opâ ʒâŋene “Dâŋ mumuc” iŋuc muwec, jaŋe opâ irec erâ hehefaric embiŋte. 21 Eme irec faicnao opâ nombâŋ moc ropie iŋuc jaha dâŋ mumuc embiŋ. Eme irec opâ irec ʒâŋe “Hehefaric” muwec. 22 Iŋuc epie mâreŋ i beherâ opâ nombâŋ moc rowec, opâ irec erâ ine dâŋ mi fuawec, irec ʒâŋe i kecʒiŋuc muhuc “Sawa sâko” muwec: Wofuŋ e mâreŋ ʒira sawe mâririackenaŋte mâreŋ kâcɋene nârewec.

23 Eme irecnec Bere‐Seba haeo rafewec. 24 Eme Wofuŋ e ŋafeo fuacnerâ muwec: “No mamacge Abraham ere Anutu, go mi hâwicguoc, no gohec jukopac hâcne. No jambuŋgupemu erâ ɋâricfâcge jaŋe kiŋaŋŋic‐nane Abraham ere erâ basawec‐jopapemu.” 25 Eme Isaka e ira alata moc barâ Wofuŋ numucnewec. Erâ wâc qoruc boze‐ticne fârerâ ŋec juc ewec, ehame kiŋaŋŋicfâc‐ticne jaŋe ira opâ nombâŋ moc rombiŋ.

26 Eme dameŋ mocko Abimelec e âgo‐ticne Ahuʒata â momori micne‐ticne Fikoli jahehec Gerarinec ware fisimbiŋ. 27 Eme Isakazi ʒiŋuc jazawec: “Ŋoŋe wemocte norao wareŋgopieŋ? Ŋoŋe râsi enarehuc jâpecnupie warepo i!” 28 Jaŋe mumbiŋ: “Nâŋe Wofuŋzi gohec jukac i hone‐jâmbâŋkerâ ʒiŋuc manambeŋ: Nâŋâc ŋondeŋ‐nâŋecko mumupaŋ moc mupene foha gohec ʒâʒâfic moc enʒepeneŋ. 29 Nâŋe go wiac sâqocne moc mi egarehuc ehâmo‐garerâ wama faio râecgupene waremeŋ, iŋuc jaha goki wiac sâqocne moc mi enârezemec. Go Wofuŋzi jambuŋguwec hâcne.” 30 Eme Isakazi tiwâ bâzi ejareme nânâ opâ nâmbiŋ. 31 Eme hae fureme mumupaŋ dâŋ muhuc ʒâʒâfic embiŋ. Iŋuc ehuc Isakazi râec‐jopame wama faio rambiŋ. 32 Eme ʒoaŋ ijaha Isaka kiŋaŋŋicfâcne jaŋe warerâ opâ nombâŋ rombiŋ irec dâŋ binaŋ ehuc ʒiŋuc âzâcnembiŋ: “Nâŋe opâ bâfuambeneŋ.” 33 Mupie opâ irec ʒâŋe Siba* Nâŋâcne dâŋko: Mumupaŋ. muwec. Irec dameŋ ʒiŋuczia hae irec ʒâŋe Bere‐Seba mueŋgopieŋ jaha.

34 Esau e jara 40 bazurâ Hitiŋic Beri ere otâ ʒâŋene Juditi ŋonâŋ‐ticne rowec, erâ Hitiŋic Eloŋ ere otâ Basemata mâmâc rowec. 35 Ŋokac i jahe ine Isaka â Rebeka busâqoc boc bâfua‐jactepic.