1 Iŋuc mume Isakazi Jakobo hefârerâ jambuŋkehuc dâŋ ʒiŋuc âzâcnewec: “Go Kanaaŋ mâreŋkonec naru jaŋeraonec ŋonâŋ moc mi rozemec. 2 Irec faharerâ Mesopotamia mâreŋko neŋgocgere mamac Betuele erao razemec. Ira neŋgocgere hahac Labaŋte otâfâc jaŋeraonec ŋonâŋ moc rozemec. 3 Anutu babafâre e jambuŋguhuc baficgume fua sawec erâ ŋic gurune gurune ezemec. 4 Eme eki go â ɋâricfâcge ŋoŋe mâmâc Abrahamte jambuŋ tahac‐ŋopaocmu, ehame Anutuzi Abraham mâreŋ râcnewec jaba jukomec hâcne i sâcne rauckecmu.” 5 Isakazi Jakobo iŋuc âzâcne sorec eme eki Mesopotamia mâreŋko Labaŋtao raocte rawec. Labaŋ e Aramea ŋic, Betuele ere ŋokâ â Jakobo â Esau neŋgoc‐jekic Rebekare hahac.

6 Isakazi Jakobo jambuŋkerâ ŋokac moc bâfuaocte Mesopotamia mâreŋko sorewec. Erâ jambuŋkehuc dâŋ ʒiŋuc âzâcnewec: “Go Kanaaŋ ŋokac jaŋeraonec ŋonâŋ moc mi rozemec.” 7 Eme Jakobo e neŋgoc mamac jahec‐ticne jahere dâŋ reŋkerâ Mesopotamia mâreŋko rawec. 8 Esauzi ine wiac i, â mamac‐ticne Isakazi Kanaaŋ ŋokac jaŋere maname mi sâckewec, i mâmâc hone manac ehuc 9 Abrahamte ŋokâ Isimae erao rarâ otâ‐ticne Mahalati Nebajotire seŋ hâcne, ŋokac rorâ mârâc ŋonâŋ jahec‐ticne jaherao ʒuhuckewec.

10 Jakobo e Bere‐Seba hae beherâ Haraŋ haeo raocte rawec. Raku hae mâreŋ mocko fisihame ʒoaŋ ŋetarawec. 11 Eme mâreŋ ira qânâ ŋerawec irec moc ro roŋgâŋ herâ guŋ fowec. 12 Guŋko ine riri moc honewec, fuŋne mâreŋko domawec â botâŋnezi fe sambâŋ âke uawec, ehame Anuture aŋelofâc jaŋe mi ririo fefec wawahac enʒepieŋ i! 13 Ehame Wofuŋ e ututuŋ fuarâ riri botâŋnao domahuc ʒiŋuc âzâcnewec: “No Wofuŋ, mamac ŋosa jahecge Abraham â Isaka jahere Anutu, mâreŋ fokic i go â ɋâricfâcge ŋarezokopac. 14 Â ɋâricfâcge jaŋe fua sawec eku mâreŋko rufe fokac irec sâc enʒepieŋ. Eme go mâreŋ ŋifec â ŋifec faic â juwic ira soka ŋeratiec ezemec. Erâ wâc go â ɋaricfâcge ŋoŋere erâ mâreŋ sâc ŋic jaŋe jambuŋ hotâckenʒepieŋ. 15 Manakic, no gohec jupemu, ehuc mâreŋ jucmu sâc sabecgupemu, erâ jowacgupe mâreŋ ʒira risie warecmu. No mi behecguhuc gohec jaha jukuhape wiac mupaŋke‐garekopac i fârio qafâreocmu.” 16 Eme Jakobo e guŋkonec ɋârerâ muwec, “Wofuŋzi mâreŋ kecʒira jujâmbâŋkekac, no mâc fokac muhape.” 17 Erâ sahacne gâgâmârâme kecʒiŋuc muwec: “Mâreŋ ʒi qeŋ bipinehec i! Jâmbomac, ʒi Anuture ŋeŋe hae â sambâŋte motâc hâcne.”

18 Hae fureme Jakobozi furic araraŋte fahare qânâ roŋgâŋ he fowec i bafahare ma âkendâŋnerâ wokemaŋ ruacnewec. 19 Ehuc hae mâreŋ ʒâŋene Bete muwec. Juwicnao ine hae irec ʒâŋe Lusi mujumbieŋ. 20 Eme Jakobo e dâŋ ʒiŋuc mupaŋkewec: “Anutu go nohec jucmu, ehuc hata ʒi rahuc juhape hone soŋoŋ enarecmu, ehuc hobu‐nanere nânâ â sahac‐nanere foŋ bâfua‐narecmu, 21 iŋuc enarekutec sahac furu mamac‐nanere ficko risiepemuo ine Wofuŋ go nore Anutu erâ juzemec. 22 Eme qânâ ʒi ma âkendâŋnekopac izi gore fic ezejec; â wiac narehuc jucmu sasawa i bâfâuckehuc teŋkonec wâŋ irec sâc bârisie‐garehuc jupemu.”