1 Eme ŋic e ŋonâŋ‐ticne Ewa ehec jume motec kiweckerâ Kaiŋ rowec. Rorâ ʒiŋuc muwec: “Anutuzi baficnume ŋokâ moc fua‐narekac.” 2 Eme ʒuhuckerâ ɋaticne Abe rowec. E sokarâ noniŋ â lama jaŋere hone soŋaŋ gie bawec. Kaiŋ e ine hesarac ŋic erâ juwec. 3 Eme jufeku Kaiŋzi gieonec nânâ wiac rorâ Wofuŋ taha bâzi rikecnewec. 4 Â Abe e iŋuc jaha lamafâcne mârâc fufua irecnec moc hezurâ wokemaŋne rorâ bâzi rikewec. Eme Wofuŋzi Abe jahacne â bâzi‐ticne hone biaŋkewec. 5 Kaiŋ â bâzi‐ticne ine hone takirewec. Iŋuc eme Kaiŋ e mâretec aarickeme ʒâŋe maine enduŋkewec. 6 Eme Wofuŋzi Kaiŋ âzâcnewec: “Wemocte aaricgume ʒâŋe maige enduŋkekomec? 7 Go biaŋne jutec mana‐garepe sâckeocmu. Biaŋne mi jucmuo ine sâqocnezi motâc râpeo soŋkerâ ruc bagareocmu. E gore hâcne ecnekac, go ine aka hecnezemec.”

8 Eme Kaiŋzi ɋaticne Abe âzâcne muwec: “Nâhâc gieo ranac.” Mume gieo ra jupic, ehuc Kaiŋzi fahare ɋaticne Abe qarâ qâhâmowec. 9 Eme Wofuŋzi Kaiŋ ʒiŋuc wiocnewec: “Ɋage Abe wena jukac?” Eki muwec: “Mi manakopac, no ɋananere soŋaŋ me?” 10 Eme Wofuŋzi muwec: “Go wemo wiac emec? Ɋagere soczi mâreŋko wira wâwâsic enareme manakopac. 11 Irec sâwec faigao fekac, ehuc mâreŋ, micne aŋkehuc ɋagere soc megaonec rorâ nâjec, mâreŋ izi jâpecgukac. 12 Hesarac gie batec mâreŋzi guec‐ticnere fârine sakare‐garezejec. Eme wise wise juhuc ra ju ware ju ezemec.” 13 Eme Kaiŋzi Wofuŋ âzâcnewec: “Okacne narekic i bâmâmâckekopac. 14 Go miŋecgac gie hesarac mâreŋkonec jâpecnukomec, irec ʒâŋesoŋ bagarerâ wise wise juhuc ra ju ware ju epemu, ehame ŋiczi bâfuacnurâ qâhâmocnuniŋmu.” 15 Eme Wofuŋzi muwec: “Iŋuc misac, moc e Kaiŋ qâhâmome okacne arec 7 irec sâc râcnezo.” Iŋuc murâ Kaiŋ sahacnao maqâreŋ moc râewec, moczi moc bâfuarâ qanʒipiŋte. 16 Eme Kaiŋ e Wofuŋte maionec rarâ mâreŋ moc ʒâŋene Nodi, Edeŋ ʒoaŋ wewefu‐ticnao, ira juwec.

17 Eme Kaiŋ e ŋonâŋ‐ticne ehec jume motec kiweckerâ Enoko rowec. Eme Kaiŋ e hae moc barâ ŋokâ‐ticnere wase bahuc ʒâŋene Enoko jaha muwec. 18 Enokore ŋokâ moc fuawec ʒâŋene Iradi, eme ere bifuŋko Mehujae fuawec, Mehujae ere bifuŋko Metusae fuawec, Metusae ere bifuŋko Lamec fuawec. 19 Lamec e ine ŋokac jajahec rocjofawec, moc ʒâŋene Ada, moc Zila. 20 Ada e motec kiweckerâ Jabali rowec, e qoruc bozeo juju fofo eere â bec bulimakao hone soŋaŋ giere fufuŋke ŋic. 21 Jabali ɋaticnere ʒâŋe ine Jubali. E gita â mimi ŋokac irec fufuŋke ŋic ewec. 22 Zila e iŋuc jaha motec kiweckerâ ŋokâ moc rowec ʒâŋene Tubali‐Kaiŋ, eki aeŋzi wiac fuŋne fuŋne bapa ŋicguru jaŋere fufuŋke ŋic â micne ewec. Tubali‐Kaiŋ seŋticnere ʒâŋe ine Nama. 23 Juku Lamec e ŋonâŋ jahec‐ticne hefârec‐jofarâ ʒiŋuc jasawec:

25 Adam e ŋonâŋ‐ticnehec mocwâc jume kiwechec erâ motec moc rowec. Eme ʒâŋe‐ticne ʒiŋuc manasuhuc Sete muwec: Kaiŋzi Abe qawecte ere âkehoc Anuturaonec ŋic ukic biaŋ mocwâc fisi‐narekac. 26 Eme Sete e iŋuc jaha ŋokâ moc fuacneme ʒâŋene Enosi muwec. Eme dameŋ ira hâcne ŋic jaŋe Wofuŋ ʒâŋe‐ticne bâtirihuc nunumucne gie i fuŋkembiŋ.