LUKA
Luka e Judaŋic mâcne, e Helene ŋic. Fufua hae‐ticne Antiokia, Siria mâreŋko. E juku sokarâ hae ira hâcne miti manarâ Jesure kikefuŋ jaŋerao ʒuhuckewec. Gie‐ticne ine dota gie bahuc juwec (Kolosai 4:14). Paulozi miti kiŋaŋ arecne 2 rawec ira hatao bâbâfuac epic. Eme izia Paulo bâjâpehuc miti giere bafickehuc juwec. Paulo e Kaisarea haeo kâpâcwâru ficko ŋeha iqickehuc juwec, â Roma haeo sâc ijaha ecnehuc juwec. Irec Paulo e Timoteo ʒiŋuc qâreŋkecnewec: Ʒi Lukahec buc juekoperec (Timoteo II 4:11).
Luka e Jesure binaŋ papia i ŋicbomboŋ moc ʒâŋene Teofile ere biŋe qahuc qâreŋkewec. Â binaŋ i wenirec manarâ qâreŋkewec? E Jesuhec moc mi jujujec. Irec binaŋ‐ticne qâreŋkeocte ŋic ŋokac Jesuhec jumbiŋ jaŋe mu gufuc ejareme dâŋ binaŋ ecnepie qâreŋkewec. Wiac fuŋgâtânehec hone manac embiŋ jaŋere mickonec hâcne dâŋ manahuc birickewec (Luka 1:2). Erâ ŋic tucnezi Jesure dâŋ qâreŋkepie forawec papia i wosehuc irecnec dâŋ wâc rowec (Luka 1:1). Ehuc Jesure binaŋ sasawa qâreŋkewec izi Jesure fuŋne ʒiŋuc mutaniŋke‐nâre‐hâmokac: E sâqocne bapa âgo enârehuc bâpiaŋ‐nâpoocte wahawec.
Luka e iindiŋ gie sâko bawecte dâŋ furune bocjaha, Mataio â Mareko jaherao mi fokac, iŋucne bâfuarâ qâreŋkewec wâc. Ine ʒiŋuc: Zakaria â Elisabete jahere binaŋ, â aŋelo Gabiriezi Maria fuacnewec (gaŋ 1). Jesure fufua, Simeoŋ â Hana jahere binaŋ, â Jesu motec hombaŋte Jerusalem haeo fewec (gaŋ 2). Naiŋ haeo motec moc hâmockonec bâɋârewec, erâ ŋokac moczi Jesu kike‐ticne opâ âsu ruacnewec (gaŋ 7). Ŋic moczi kisâ‐ticne ehâmocnewec, erâ Maria â Mata jahere binaŋ (gaŋ 10). Mitiŋic jopa sipiric ekicne (gaŋ 11). Kiŋaŋ motec qâomane, erâ Jesuzi ʒoc bawahawec irec dâŋ (gaŋ 12). Situâc soŋaŋ hehesicne, erâ mafaŋic â Lazaro jahere binaŋ (gaŋ 16). Ŋic 9 fâsâerâ qâoma embiŋ (gaŋ 17). Kia râŋgeŋne, erâ Farisaio â moneŋ roro (gaŋ 18). Zakaio ere binaŋ, â Jesuzi Jerusalem hae honehuc kiowec (gaŋ 19). Motec jajahec Emausi haeo rahapire Jesuzi fua‐jactewec (gaŋ 24). Binaŋ ʒâŋene wosekopac sasawa i Luka bucticne, â gâcne ine Mataio â Mareko jahe qâreŋkepic ijaha qâreŋkewec, me qâreŋkepic irec heririŋne qâreŋkewec.
Lukare papia maŋnao dâŋ birine birine kecʒiŋuc forakac:
Gaŋ 1—2. Johane Miti Opâ fufuŋke ere binaŋ â Jesu motec fuawec, erâ Simeoŋ â Hana jahere dâŋ â Jesu motec hombaŋte Jerusalem haeo fewec.
Gaŋ 3:1—4:13. Johane gie‐ticne fuŋkewec â Jesu Miti Opâ ruacnewec.
Gaŋ 4:14—9:50. Jesu e Galilaia mâreŋko gie bawec.
Gaŋ 9:51—19:27. Jesu e rac warec ehuc gie barâ juku Jerusalem haeo feocte rawec.
Luk 19:28—Luk 21. Jerusalem haeo ferâ gie‐ticne batarawec.
Gaŋ 22—24. Jesu e ʒâic mana raku maripoŋko hâmowec, erâ hâmockonec faharewec.
1
Lukazi Jesure binaŋ Teofilo qâreŋkecnewec
Ŋic bocjaha jaŋe ŋondeŋ‐nâŋecko wiac fârine fuawec irec binaŋ birickerâ qâreŋkembiŋ. Jaŋe binaŋ i mitiŋiczi bapa fuŋfuŋ juhuc wiac fuŋgâtânehec hone manac eku banârembiŋ irec sâcko qâreŋkembiŋ. Joh 15:27 Eme noni iŋuc jaha fuŋnaonecteaŋ wiac fua warewec irec aimuŋ mu ikisiŋ ehuc manaku mana‐fârerâ Teofilo ŋicbomboŋ‐nane gore ninic qâninic qâreŋkekopac. Apo 1:1 Eme i wosehuc ʒiŋuc mana tarazemec: Dâŋ binaŋ egarekicne i fârine jâmbâŋ.
Aŋelo moczi Zakaria fuacnewec
Herodezi Judia mâreŋte ŋicwofuŋ juwec, dameŋ ira taha bapa moc juwec ʒâŋene Zakaria, e Abia ere gie birionec. Ŋonâŋ‐ticne Elisabete e Aroŋte tucne tofane. Bin I 24:10 Jahe Anuture maio bahac fâsâc juhuc sâcmutâc dâŋticne aiakic jaha reŋke‐fârehuc jupic. Eme Elisabete hufiŋ juwecte jahe ɋâric tâmiric juku ŋic ŋokac qizec epic. Eme Zakaria juwec ŋic biri i jaŋe taha ufuŋko bâzi ririke gie baniŋte dameŋ‐jeŋic maickeme fisirâ gie‐jeŋic ru sâc ehuc Zakaria hosâc bâzi rikeocte mucnepie taha ufuŋ maŋnao raʒiwec. Wah 30:7 10 Raʒirâ hosâc bâzi rikehame ŋic ŋokac omane jaŋe sapamaŋko Wofuŋ numecnehec jumbiŋ. 11 Ehame Wofuŋte aŋelozi fuarâ hosâc bâzi ririke alata ŋifecnao fâreopec domawec. 12 Domame Zakariazi honerâ fâfârerâ hemâtâckewec.
13 Iŋuc eme aŋelozi ʒiŋuc âzâcnewec: “Zakaria, go mi hâwicguoc, Wofuŋzi nunumuge manawecte ŋonâŋge Elisabete motec kiweckerâ roocmu, ere ʒâŋe Johane muzemec.
14 Go ʒeri ehuc bubiaŋ manacmu,
â ŋic bocjahazi fufua‐ticnere aŋac‐jopaocmu.
15 E Wofuŋte maio kâcɋene erâ juocmu;
â waiŋ me opâ momori irec sowa juocmu.
Erâ e neŋgoc bumaŋko fohame
Tiri Mârozi maŋticne bâfuseocmu. Ʒar 6:3; Mum 13:4, 5; Sam I 1:11
16 Eme Israe ŋic bocjaha bârisiec‐jopame
Wofuŋ Anutu‐jeŋic maickeniŋmu.
17 Elia maŋʒoɋac â tâpiri focnewec sâc focneha
Wofuŋte biŋedâŋ mumuŋic erâ juocmu.
Ehuc kâcɋene jaŋere maŋ bârisieme ɋiene jaŋerao iticneocmu,
â râŋgeŋne jaŋe ejareme tiŋne jaŋere mamana birire hazec râeniŋmu.
Eme ŋic jaŋe mâmâc sâko Wofuŋte ʒawierâ juniŋmu.” Mat 17:11–13; Mal 3:1; 4:5, 6
18 Aŋelozi iŋuc mume manarâ Zakariazi dâŋ ʒiŋuc bârisiecnewec: “No â ŋonâŋ‐nane nâhe ŋic ŋokac qizec, irec dâŋge wemocko manape fârine eocmu?” Fuf 18:11 19 Mume aŋelozi ʒiŋuc âzâcnewec: “Manakic, ʒâŋe‐nane Gabirie, no Anuture maio domaekopac. Eki sorecnume waharâ biŋedâŋ biaŋ gazakopac. Dan 8:16; 9:21; Heb 1:14 20 Irec manac, dâŋnane mi mana ʒakiekomec irec okacne nâŋguŋ erâ dâŋ tâmiric juhaŋtec dâŋ gazakopac fârinehec eocmu. Dâŋ mukopac i racne mi eocmu.” Luk 1:45
21 Zakaria e ufuŋko boc jume ŋic ŋokac woŋec‐ticne ŋeku manafecne manambiŋ. 22 Iŋuc ehapie ʒâhec jaŋerao waharâ dâŋ jazaocte eipiewec. Eipieme jaŋe ʒiŋuc manambiŋ: E taha ufuŋko wiac ʒâŋe furu moc honejec. Eme eki mezi sâsâc sawa ejarewec, dâŋ ine wemocko jazazac. 23 Iŋuczi iŋuc juhame gie bapa dameŋ‐ticne tarame haeo risie rawec. 24 Eme ʒâhecko ŋonâŋ‐ticne motec kiweckewec. Erâ mosa 5 soŋke soŋke juwec. Ehuc ʒiŋuc muwec: 25 “Wofuŋ e dameŋ bawec i maickeme ehâmo‐narerâ mimi bâsuec enarewec.” Fuf 30:23
Aŋelozi Maria fuacnewec
26 Mosa 6 tarame Wofuŋzi aŋelo Gabirie soreme Galilaia mâreŋko Nazarete haeo rawec. 27 Ira naru ŋokac moc juwec ʒâŋene Maria, e ŋic moc Dawidire oso gitecne, Ʒâŋene Josefe, ere biŋe mukicne. Luk 2:5; Mat 1:16, 18 28 Eme aŋelo e Mariarao fuarâ muwec, “Wofuŋte joroc biaŋ, go ʒeri ec, Wofuŋzi gohec jukac.” Mum 5:24 29 Aŋelozi dâŋ iŋuc mume maname quŋkeme maŋnezi ʒiŋuc manasuwec: Weniŋucte mu ʒeri enarekac? 30 Eme aŋelozi ʒiŋuc âzâcnewec: “Maria go mi hâwicguoc, Anutuzi honecgume biaŋkekac. 31 Manakic, go motec kiweckerâ rocmu, ere ʒâŋe Jesu muzemec. Mum 13:3; Jes 7:14; Mat 1:21–23
32 E kâcɋene jâmbâŋ jume Fekicne sâko ere Ŋokâ mucneniŋmu,
â Wofuŋ Anutuzi apa‐ticne Dawidi ere ŋeŋetacko râeocmu. Jes 9:7; Sam II 7:12, 13, 16
33 Eme Jakobore ɋâricfâc guriŋne bajarehuc jume
Ŋicwofuŋ juju‐ticne foraʒihuc juocmu sanaŋ.” Mik 4:7; Dan 7:14
34 Mume Mariazi ʒiŋuc âzâcnewec: “No ŋic tâmiric jukopacko dâŋ mukic i weniŋuc erâ sanaŋkeocmu?”
35 Mume aŋelozi dâŋ ʒiŋuc bâtikiecnewec:
“Tiri Mârozi faigao wahaocmu
â Fekicne sâko ere tâpirizi neŋgoc ŋesiŋ ŋegareocmu.
Eme irec motec rocmu e tiri mucnezo,
Anuture Ŋokâ hâcne. Wah 13:12; Mat 1:18, 20
36 Erâ moc gazape manac: Âgoge Elisabete e ŋokac qizeczi motec kiweckerâ juhame mosa 6 ekac, e hufiŋ ŋokac mucneeŋgopieŋzi iŋuc ekac hâcne. 37 Anutu e wiac moc ezomurâ mi eipieekac.” Fuf 18:14 38 Mume Mariazi ʒiŋuc âzâcnewec: “No Wofuŋte kiŋaŋ naru, irec dâŋ mukic iŋuc hâcne enarezejec.” Iŋuc mume aŋelozi beherâ rawec.
Mariazi Elisabete iqickewec
39 Maria e jume mi ʒoraha biac ʒawierâ Judaia tiki mâreŋko hae moc ŋewec ira rawec. 40 Ra fisirâ Zakariare ficko ferâ Elisabete mu ʒeri ecnewec. 41 Mu ʒeri ecneme manahame izia bumaŋnao motec e kiwaewec. Eme Tiri Mârozi Elisabete ere maŋko hurâ fuseme Luk 1:15; Fuf 25:22 42 dâŋ bafehuc ʒiŋuc âzâcnewec: “Ŋokac âgo‐nâŋec gore manape sâc moc eme mumbiaŋgukopac â bumaŋgao fuajec fokac e wâc iŋuc jaha mumbiaŋkekopac. Sâc 28:4; Mum 5:24 43 Go Wofuŋ‐nanere neŋgoczi wemo biaŋ‐nanere norao warekomec? 44 Mu ʒeri enaretec hazec‐naneo hume bumaŋ‐naneo moteczi kiwaekac. 45 Go Wofuŋte biŋedâŋ gazakicne irec fârine fuaocmu manapaŋkemeŋte gore manape ʒerine ekac.” Luk 1:20; 11:28
Mariazi ʒeri mumuteŋ dâŋ muwec
46 Eme Mariazi kecʒiŋuc muwec:
“No maŋ qâqâtâc‐nanezi Wofuŋ muafeckekopac, Sam I 2:1–10
47 â maŋnanezi Anutu bâbapiaŋ‐nane ʒeri ecnekopac.
48 E kiŋaŋ naru‐ticne waha qaqane no bafecnukacte
ŋic gurune gurune nore manapie ʒerine eocmu. Luk 1:25; Sam I 1:11; Mi Mâ 113:5, 6; Luk 11:27
49 E bapafârezi norao mâsi sâko bakac hâcne.
Ʒâŋe biŋe‐ticne tiri jaha fokac. Mi Mâ 111:9
50 Araŋ bacneeŋgopieŋ jaŋe maŋuruc‐ticnere erâ
mimiŋzi ɋâric ehâmo‐jareekac. Mi Mâ 103:13, 17
51 E tâpiri‐ticnere fuŋne bâfuahuc
maŋfefe jueŋgopieŋ jaŋe bâtâtiec‐jopaekac. Mi Mâ 89:10; Sam II 22:28
52 E ŋicbomboŋ sâko jaŋe popoonec tuŋjopame wahahapie
hujukicne jaŋe bafec‐joparâ toŋko râec‐jopakac. Mi Mâ 147:6; Hio 12:19; 5:11; Sam I 2:7
53 E roroc hapetac jaŋe wiac bâmâckehuc jare gumec ekac,
â mafa sâkohec behec‐jopame qarâ suriŋne juŋgopieŋ. Sam I 2:5; Mi Mâ 34:10; 107:9
54 Erâ Israe kiŋaŋ ŋicfâc‐ticne
maŋuru‐ticnere roroŋ fâre‐nârekac. Jes 41:8; Mi Mâ 98:3
55 Mimiŋnefâc‐nâŋec, Abraham â ɋâricfâcne, jurahuc juniŋmu,
jaŋe dâŋ jazawec irec fârine fuakac.” Mik 7:20; Fuf 17:7; 18:18; 22:17
56 Eme Maria e mosa jahec â moc Elisabetehec juku hae‐ticnao risie rawec.
Johane fuawec
57 Elisabete e dameŋ‐ticne maickeme motec rowec. 58 Eme haefâc‐ticne â mame sâkofâc‐ticne jaŋe Wofuŋzi maŋuruc‐ticnere fuŋne erao bataniŋkewecte manarâ ehec mâmâc bubiaŋ manambiŋ. 59 Izi ʒoaŋ gie bapa 8 tarame jaŋe tumaŋnerâ motec sahacnao Wofuŋte ma barâ mamac‐ticne Zakaria ere wase bazo mumbiŋ. Fuf 17:12 60 Eme neŋgoc‐ticnezi qatara‐jarerâ muwec, “Aricne, ʒâŋene Johane muzo.” Luk 1:13 61 Mume ʒiŋuc âzâcnembiŋ: “Hâc, mame sâkofâcge jaŋerao ʒâŋe wase iŋucne moc mi fokac.” 62 Qaqatarac erâ Zakaria e motecte ʒâŋe muocte ecnepie 63 tafere ejareme râcnepie fainao ʒiŋuc qâreŋkewec: “Ʒâŋe‐ticne Johane.” Iŋuc qâreŋkeme jaŋe manapie moc eha 64 izia nameŋne risieme dâŋ dâŋ ehuc Anutu muteŋkewec. 65 Eme hae rârec rârec ŋic jurambiŋ jaŋe dâŋ binaŋ i manapie hâhâwicne ewec. Eme Judaia tiki mâreŋko binaŋ miczi mic nazaŋ gazaŋ efârembiŋ. 66 Eme manambiŋ jaŋe dâŋ i maŋke juhuc ʒiŋuc mumbiŋ: “Motec iŋucnezi sokarâ weniŋuc eocmu?” Eme Wofuŋzi dopecke sapec ecneha juwec.
Zakariazi findaŋdâŋ muhuc Wofuŋ muteŋkewec
67 Eme mamac‐ticne Zakaria e Tiri Mârozi maŋne fusucmame findaŋdâŋ kecʒiŋuc muwec:
68 “Israe ŋic nâŋâc Wofuŋ‐nâŋec Anutu muteŋkenaŋ.
Eki hâcne ŋicfâc‐ticne iqic‐nâporâ kitâc‐nâpokac. Luk 7:16; Mi Mâ 41:13; 72:18
69 Ehuc kiŋaŋŋic‐ticne Dawidi ere ɋâricfâc nâŋâcnao
bâbâpiaŋte wâtuŋ moc âkendâŋnekac. Sam I 2:10; Mi Mâ 18:2; 132:17
70 Mârâc jaha porofetefâc‐ticne ejareme
findaŋdâŋ mujumbieŋ sâc iŋuc hâcne fuakac.
71 Eki kisâ enârehuc qaisoc‐nâpoeŋgopieŋ
jaŋeraonec hâcne batarac‐nâpoocmu. Mi Mâ 106:10; 105:8; 106:45; Fuf 17:7; Tah 26:42
72 Mimiŋnefâc‐nâŋec jaŋehec tiri ʒâʒâfic sanaŋ ewecte
manasuc‐jopahuc maŋuruc‐ticnere iŋuc enâreocmu.
73 Apa‐nâŋec Abraham mupaŋkecnewecte Fuf 22:16, 17; Mik 7:20
74 râsifâc‐nâŋec jaŋeraonec batarac‐nâpoocmu hâcne.
Iŋuc enâreme âke mâteŋ‐nâpoha Tit 2:12, 14
75 maŋfuru â bahac fâsâc juhuc
kiŋaŋ qacnehuc juku hâmonʒepeneŋ.
76 Erâ motec go hâcne Femicne sâko ere porofete erâ jucmu,
ehuc Wofuŋte biŋe muhuc hata bâʒâwecnecmu. Mal 3:1; Mat 3:3
77 Erâ ŋicfâc‐ticne bâbâpiaŋte dâŋ jaza qazuc etecne
mana ʒakiepie sâqocne‐jeŋic tâmireocmu. Jer 31:34
78 Anutu‐nâŋec e maŋuruc‐ticne kâcɋene sâko fokacte
mume faickonec furic râehuc Ʒar 24:17; Jes 60:1, 2; Mal 4:2
79 dapâcko â hâmoc uupicko ŋeŋene nâŋâc bataniŋ‐nâpokac.
Ehame wamare hata fuame honehuc sâcne âtenaŋmu.” Mat 4:16; Jes 9:2; 58:8
80 Eme motec e sahaczi â maŋzi soka sanaŋ ewec. Erâ mâreŋ tuhuo juhame gie dameŋ‐ticne maickeme Israe ŋic jaŋerao fua tâcnewec. Mat 3:1

1:2: Joh 15:27

1:3: Apo 1:1

1:5: Bin I 24:10

1:9: Wah 30:7

1:15: Ʒar 6:3; Mum 13:4, 5; Sam I 1:11

1:17: Mat 17:11–13; Mal 3:1; 4:5, 6

1:18: Fuf 18:11

1:19: Dan 8:16; 9:21; Heb 1:14

1:20: Luk 1:45

1:25: Fuf 30:23

1:27: Luk 2:5; Mat 1:16, 18

1:28: Mum 5:24

1:31: Mum 13:3; Jes 7:14; Mat 1:21–23

1:32: Jes 9:7; Sam II 7:12, 13, 16

1:33: Mik 4:7; Dan 7:14

1:35: Wah 13:12; Mat 1:18, 20

1:37: Fuf 18:14

1:41: Luk 1:15; Fuf 25:22

1:42: Sâc 28:4; Mum 5:24

1:45: Luk 1:20; 11:28

1:46: Sam I 2:1–10

1:48: Luk 1:25; Sam I 1:11; Mi Mâ 113:5, 6; Luk 11:27

1:49: Mi Mâ 111:9

1:50: Mi Mâ 103:13, 17

1:51: Mi Mâ 89:10; Sam II 22:28

1:52: Mi Mâ 147:6; Hio 12:19; 5:11; Sam I 2:7

1:53: Sam I 2:5; Mi Mâ 34:10; 107:9

1:54: Jes 41:8; Mi Mâ 98:3

1:55: Mik 7:20; Fuf 17:7; 18:18; 22:17

1:59: Fuf 17:12

1:60: Luk 1:13

1:68: Luk 7:16; Mi Mâ 41:13; 72:18

1:69: Sam I 2:10; Mi Mâ 18:2; 132:17

1:71: Mi Mâ 106:10; 105:8; 106:45; Fuf 17:7; Tah 26:42

1:73: Fuf 22:16, 17; Mik 7:20

1:74: Tit 2:12, 14

1:76: Mal 3:1; Mat 3:3

1:77: Jer 31:34

1:78: Ʒar 24:17; Jes 60:1, 2; Mal 4:2

1:79: Mat 4:16; Jes 9:2; 58:8

1:80: Mat 3:1