1 Hae fureme taha bapa micne â soŋaŋ jaŋe furu jaha tumaŋnehuc Jesu ʒika kirâ hâmoocte mupaŋkembiŋ. 2 Erâ mupie Jesu mejahecne bândeŋnerâ bararâ kia Pilato erao râembiŋ. Luk 23:1; Joh 18:31, 32

3 Hâmoocte mupaŋkembiŋ, i Juda docbapazi hone manac erâ, wemocte iŋuc epac, muhuc bune sâqoreme siliwa moneŋ 30 râcnembiŋ i ameckerâ taha bapa micne â soŋaŋ bârisie‐jarewec; Mat 26:15 4 ehuc jaza muwec, “No burec erâ kiŋ tâmiricko doc bape sâqorekac.” Eme jaŋe mumbiŋ, “Nâŋerao wemocte ware mukic? I go gahacne wiac.” 5 Iŋuc muhuc moneŋ qikiŋnepie bara taha ufuŋko wickeme feme siŋ herâ ra bituawec. Apo 1:18; Sam II 17:23 6 Eme taha bapa micne â soŋaŋ jaŋe siliwa moeŋ 30 qâzuckerâ mumbiŋ, “Moneŋ i ʒika furi, mitire katapao râepene mi sâckeocmu.” Mar 12:41 7 Eme moneŋ izi wemo ezo, muhuc nazaŋ gazaŋ erâ kuʒi bapa ŋic ere mâreŋ, ŋic furune jaŋere ʒâŋeruŋ gie ira fuaocte furine bambiŋ. 8 Eme mâreŋ irec ʒâŋe Ʒikamâreŋ mupie sanaŋkewec fokac. Apo 1:19 9 Eme porofete Jeremia ere dâŋ fârinehec ewec, dâŋ kecʒiŋuc: “Israe ŋic jaŋe furi‐ticnere sâc siliwa moneŋ 30 mumbiŋ, Ʒek 11:12, 13; Jer 32:6–9 10 ŋickitâc moneŋ izi hâcne kuʒi bapa ŋic ere mâreŋ furine bambiŋ. Wofuŋzi nazawec ijaha embiŋ.”

11 Eme jaŋe Jesu barapie kiare maio domahame kiazi wiocnerâ muwec, “Judaŋic jaŋere ŋicwofuŋ go hâcne me?” Eme Jesuzi muwec, “Ine hâcne mukomec.” 12 Eme taha bapa micne â soŋaŋ jaŋe qorickehuc domahapie dâŋ okacne moc mi bâtikie‐jarewec. Mat 26:63; Jes 53:7 13 Iŋuc eme Pilatozi wiocnerâ muwec, “Gore dâŋ ŋemâcne mupie wemocte ŋifecne moc mi mukomec?” 14 Eme Jesuzi dâŋ moc mi âzâcne huŋgaŋkeme kiazi mâretec wareckewec. Joh 19:9

15 Aakic hombaŋ sâc kia e Judaŋic jaŋe kâpâcwâru ŋic moc ʒâŋene mupie akickerâ firue‐jare jujec. 16 Eme dameŋ ira ʒika qaqa repicne moczi kâpâcwâru ficko fowec, ʒâŋene Baraba. 17 Eme ŋic tumaŋne‐fârerâ domahapie Pilatozi wio‐jarewec, “Mo akickepemurâ muŋgopieŋ, Baraba me Jesu, ʒâŋene moc Kristo mueŋgopieŋ?” 18 Judaŋic jaŋe Jesu mâc aaric manacnehuc erao râembiŋ, i manahuc hâcne iŋuc muwec. Joh 11:47, 48; 12:19 19 Eme kia e dâŋ mumutara ŋeŋe‐ticnao ŋehame ŋonâŋ‐ticnezi erao dâŋ ʒiŋuc râeme rawec: “Go ŋic tiŋne ere dâŋ mi bâuac, no miŋecgac guŋ manahuc ere erâ ʒâic mâretec manapac.” 20 Ehame taha bapa micne â soŋaŋ jaŋe ŋic qafeŋ‐jopahuc mumbiŋ, “Mupie Baraba akickehuc Jesu qazejec.” 21 Eme kiazi mocwâc indiŋ‐joparâ muwec, “E me e akickepemurâ muŋgopieŋ?” Jaŋe mumbiŋ, “Baraba.” 22 Mupie jazawec, “Eme Jesu, ʒâŋene moc Kristo mueŋgopieŋ, ere weniŋuc ezepac?” Jazame micne mic sâc musereckehuc mumbiŋ, “E maripoŋko hâmooc!” 23 Eme kiazi mocwâc jazawec, “Wemo kiŋte?” Mume owa ruruckerâ mumbiŋ, “Maripoŋko hâmooc!” 24 Iŋuc epie Pilatozi bâmâteŋ‐jopa‐bipieme dâŋ ojowa fetone fepie mume opâ râcnepie meticne mai‐jeŋicko ʒurehuc muwec, “Ŋic tiŋne ere kiŋzi norao mi bohotazejec, i ŋoŋe qikiŋne‐ŋarekopac.” Sâc 21:6 25 Mume jaŋe micne mic sâc musereckehuc mumbiŋ, “Kiŋticne nâŋe â ɋârifâc‐nâŋec nâŋerao fozejec.” Apo 5:28 26 Eme Baraba qikiŋne‐jarerâ Jesu becsahac biriŋneheczi qâʒâickerâ maripoŋko qaniŋte momori râe‐jarewec.

27 Eme kiare momorifâc gâcne jaŋe Jesu fickonec bawaharâ ficrâpeo sacmaŋko baferâ mupie momori mâmâc sasawa tumaŋnembiŋ. 28 Tumaŋne‐fârehuc Jesu e jahacne ŋaqi heunuckerâ momori ŋaqi bâbâroŋ hecnepie huwec. 29 Erâ mucʒârâzi hendiŋ ba akic erâ qizecnao hecnepie huwec. Erâ gunu moc râcnepie mefârenezi barâ domawec. Iŋuc erâ maŋfuŋnao ra dieŋzi hecnerâ sâckehuc mumbiŋ, “Ohec, Judaŋic jaŋere ŋicwofuŋ!” 30 Eme tâfeckehuc gunu jâoc rorâ izia qizecnao qambiŋ. Jes 50:6 31 Qa sâsâc ecneku momori ŋaqi heunuckecnerâ e jahacne ŋaqi mocwâc hecnepie hume maripoŋko qaniŋte jowa rambiŋ.

32 Bararâ hatao ŋic moc bâfuambiŋ, ʒâŋene Simoŋ, Kirene haeonec, e ʒoɋac ecnepie Jesu maripoŋ bacneme rambiŋ. 33 Raku mâreŋ moc ʒâŋene Goligata, Kâtedâŋko utusiec, ira fisimbiŋ. 34 Fisirâ waiŋ opâ â hâhâtâ bâsifuckekicne gumezo mupie nâhonerâ qikiŋnewec. Mi Mâ 69:21 35 Eme maripoŋko qambiŋ. Qapie domahame ŋaqi‐ticnere ɋâsâi qahuc bâtâc bambiŋ. Mi Mâ 22:18 36 Iŋuc erâ waha soŋaŋ‐ticne ŋembiŋ. 37 Eme qizec botâŋnao fuŋne‐ticne kecʒiŋuc qâreŋkekicne fowec: “Ʒi Jesu Judaŋic jaŋere ŋicwofuŋ.” 38 Eme ʒika qaqa jajahec ehec mâmâc maripoŋko joparâ moc ŋifec â moc ŋifec iŋuc râec‐jofambiŋ. Jes 53:12 39 Eme ira rac warec embiŋ ŋic i jaŋe Jesu mufec muriŋ ecnehuc sâke kiki dâŋ âzâcnembiŋ. Mi Mâ 22:7; 109:25 40 Ʒiŋuc: “Si, taha ufuŋ heropierâ ʒoaŋ jahec â moc eha bâzickezo mumeŋzi gahacne sahac ŋezickec me. Go Anuture Ŋokâ jukomecko maripoŋkonec wahac me.” Mat 26:61; Joh 2:19 41 Eme taha bapa micne â miti qaqazu â soŋaŋ jaŋe iŋuc jaha âke sisic ecnehuc mumbiŋ, 42 “Ŋic gâcne bafic‐jopaweczi e jahacne sahac ŋezicke‐bipiekac. E Israe ŋic nâŋâcne ŋicwofuŋ jukacko maripoŋkonec wahame erao sâcne roweckenaŋmu. 43 Eki ‘no Anuture Ŋokâ’ muhuc mamanasiŋ‐ticne Anuturao râeme fowec, irec Anutuzi ere ecnekacko bataraoc me.” Mi Mâ 22:8 44 Erâ ʒika qaqa ehec mâmâc jopakicne jahe iŋuc jaha mu ruruc ecnepic.

45 Iŋuc ecnehapie 12 kilok ira dapâc fuarâ mâreŋ sâckerâ fokuhame 3 kilok ewec. 46 Eme 3 kilok ira Jesuzi wiwic jaha wirarâ muwec, “Eli, Eli, lama sabaktani”. Kâtedâŋko: “Anutu‐nane, Anutu‐nane, wemocte behecnukomec?” Mi Mâ 22:1 47 Eme domambiŋ jaŋeraonec tucnezi manarâ mumbiŋ, “Elia wâsickekac.” 48 Â ŋic moczi manarâ bâruŋ jaha gasacke rarâ hâwec sâmbiŋ moc rorâ baŋac opâ ʒaʒacnao âke uruckerâ huti tofanao bândeŋnerâ Jesu gumewec. Mi Mâ 69:21 49 Ehame gâcnezi mumbiŋ, “Go behehaŋ, Elia jâmbomac ware batarame wahame honenaŋ.” 50 Eme Jesu e mocwâc kâcɋene wirame mâro‐ticne wefu‐fârewec. 51 Hâmome taha ufuŋko qoruc ââketâc sâko i mi faicnec ʒâʒâŋiŋ jaha suckeha waha tarazejec i! Erâ mâreŋ itiriŋkeme heâŋko qânâ fâuckeme hârâc rowec. Wah 26:31; Heb 10:19, 20 52 Eme ʒâŋeruŋ forawec i aŋkeme mitiŋic mârâc hâmombiŋ jaŋeraonec gâcnezi ɋârembiŋ. 53 Eme Jesu e jahacne micne barâ fahareme jaŋe ʒâŋeruŋ‐jeŋickonec wefurâ miti hae qizecko ferâ ŋic bocjaha fua‐jarembiŋ. Apo 26:23; Dan 12:2 54 Momori soŋaŋ â ŋicfâc‐ticne Jesure soŋaŋ domambiŋ jaŋe ine homeŋ â wiac gâcne hone manac erâ weaŋkerâ mumbiŋ, “Ŋic ʒizi jâmbomac Anuture Ŋokâ juwec.”

55 Jesu qambiŋ ira ŋokac bocjaha taicko domahuc wiac hone manac embiŋ. Jaŋe Jesu Galilaia mâreŋkonec bâjâpe warehuc kiŋaŋ qacnembiŋ. Luk 8:2, 3 56 Maria Madala haeonec, erâ Maria wasene, Jakobo â Jose jahere neŋgoc, erâ ŋokac moc, Ʒebedaio ŋokâ jahec‐ticne jahere neŋgoc, jaŋe mâmâc jumbiŋ. Mat 20:20

57 Hae owâeme Arimataia haeonec mafaŋic moc ʒâŋene Josefe, Jesure miti manahuc juwec, eki warewec. Wah 34:25 58 Warerâ Pilatorao rarâ Jesu qâŋɋâŋ‐ticnere âzâcneme manarâ mume momori jaŋe qikiŋnecnembiŋ. 59 Eme Josefezi qâŋɋâŋ rorâ qoruc qaŋqaŋ furune moczi râpâckerâ barawec. 60 Bararâ qânâ hâŋko e jahacne ʒâŋeruŋ biŋe hawecne gufukicne ira Jesu râerâ qorac sâko moc qârândiŋkeme motâc ŋebâzickeme rawec. Jes 53:9 61 Eme ʒâŋeruŋ ramicnao ira Maria Madala haeonec â Maria âgo‐ticne jahe ŋehuc honepic.

62 Hae fureme Sondagieo ira taha bapa micne â farisaio ŋic jaŋe qâturerâ Pilatorao rambiŋ. 63 Erâ mumbiŋ, “Bomboŋ‐nâŋec, nâŋe dâŋ moc manasumbeneŋ gazanaŋ. Burecŋic e ɋâricne juhuc kecʒiŋuc muwec: ‘Hâmorâ ʒoaŋ jahec â moc eha ɋârerâ faharepemu.’ Mat 27:40; 12:40 64 Eme motecfâcne jaŋe rarâ qâŋɋâŋ‐ticne fiuc bawiserâ ‘Hâmockonec faharejec’ muhuc burec ejarenʒipiŋte mutecne momori jaŋe ʒâŋeruŋko soŋaŋ paŋnea ŋehapie ʒoaŋ gie bapa jahec â moc tarazejec. Mârâc burec fohame ʒâhec bureczi fainao feme siwiŋnezacte manabâc erâ gazaŋgopeneŋ.” 65 Mupie Pilatozi ʒiŋuc jazawec: “Sâcne, momori ŋarekopac. Jowac‐jopa rarâ ʒâŋeruŋ iŋuc me iŋuc manaŋgopieŋ sâc fitec qapie ŋezejec.” 66 Mume jaŋe momori jaŋehec rarâ ʒâŋeruŋ fitec qarâ qânâ faio doc sipuac râembiŋ. Dan 6:17