69
Wira wâwâsic â muac baafec
1 O Anutu, go baficnuc!
Opâzi biac wefujec upe‐naneo qakac.
2 No sohoŋko âte utuckehuc ââtesiŋ basakopac;
ʒâkâŋko hupe rumizi qâurucnukac.
3 Owackeku marac‐nane bieme betaŋkekopac,
Anutu‐nanere woŋec juku ʒâŋe bâniniŋ enarekac.
4 Maŋgâŋ qaisocnuŋgopieŋ jaŋere ʒare
i qizec susuc‐nane sirickekac.
Tâpiri‐jeŋichec jaŋe burec ehuc sipiricnuzo eŋgopieŋ.
No wiac moc mi fiuckepo, eha bâtikiepemurâ muŋgopieŋ.
5 O Anutu, no mutuc epo irec fuŋne manakic,
wiac esifuckepo i kâuc mi bakic.
6 Go woricguhuc jueŋgopieŋ jaŋe nore erâ mi qurutuanʒepieŋ,
o Anutu, Tâpiri Ɋuŋɋasaŋ Wofuŋ.
Israere Anutu, go wira basac egareeŋgopieŋ,
jaŋe nore erâ mimi faio mi fenʒepieŋ.
7 Nore faio dâŋ fewec â mimi qaqa enarekicne,
i gore qâqâiŋne fua‐narewec hâcne.
8 Qomâfâc‐nane jaŋe mana‐narepie jabane ekopac,
neŋgoc‐nanere ɋâricfâc jaŋe ʒâŋe ruruŋnuŋgopieŋ.
9 Gore ficte erâ bunane ʒoc ʒarâ ʒâfitacnukac,
â go musoriŋgueŋgopieŋ jaŋere mumusoriŋzi nore faio fekac.
10 No kiorâ sowa juhuc sahac‐nane bâʒâickepo,
eme jaŋe hanecnuhuc musâqorecnumbiŋ.
11 No busâqocte erâ mateŋ qonaŋkerâ jupo,
eme jaŋe âke sisic enarehuc jumbiŋ.
12 Ŋic ŋokac jaŋe hae ʒoŋao turerâ nore mu binaŋ eeŋgopieŋ,
â waiŋ opâ nâhuc nore ʒoraŋ gae heeŋgopieŋ.
13 No ine nunumu‐nane, Wofuŋ gorao sorepe hefâekac.
O Anutu, buurucge fufusuc fokacte
dameŋ ira me ira manatec sâckeha mana‐narezemec.
14 Go jauŋ fârigeheczi baficnutec
sohoŋ dodocko mi âte utuckezepac;
râsifâc‐nane jaŋeraonec,
â opâ ʒâkâŋkonec bataracnuzemec.
15 Rumizi mi qâurucnuzejec,
â ʒâkâŋzi mi ɋâcnuzejec,
â nombâŋzi mi nâkâcnuzejec.
16 O Wofuŋ, go mana‐narec, aki anonocge aŋacne;
bumâteŋ sâkogere erâ norao fohorec.
17 Kiŋaŋŋicge no ʒâŋe maige mi bâsoŋke‐narec,
no mezacnukacte biac mana‐narec.
18 Maŋfuŋ‐naneo warerâ firuecnuc,
râsifâc‐nane jaŋere erâ rambaŋko râecnuc.
19 Mimi qaqa enarekicne â musoriŋnukicne,
i goki mana‐fârekomec;
â râsifâc‐nane kâuc mi bacjopakic.
20 Mimizi ŋecnukume bunane herickekac,
busâqoc mana‐nareniŋte ʒâŋe fipo, erâ basapo,
bâbâmiriŋ bâfuapemurâ eipiepo.
21 Nânâre okacne marasiŋ sâqocne narembiŋ,
opâre hâmope opâ ʒaʒacne gumecnumbiŋ.
22 Jaŋacne tebozi wiwitic ejarezejec,
â tiwâ bâzi‐jeŋiczi bitiŋ ejarezejec.
23 Go ʒâŋe‐jeŋic bâhâpotec tiŋtuŋ qanʒepieŋ,
hoqaŋeŋ‐jeŋiczi qiric qârâc qahuc juzejec.
24 Aaricge hoŋketec fai‐jeŋicko fezejec,
kimbeŋgere ʒocbâruŋzi qâhâsâc‐jopazejec.
25 Hae‐jeŋic tuhu fuazejec,
ficjeŋicko ŋic moc mi juzejec.
26 Go ŋic qa bâtiŋ ejaremeŋ jaŋe fific guguriŋ ejareŋgopieŋ,
â ŋic ʒâpâ jopameŋ jaŋe ʒâic bâsoka‐jareŋgopieŋ.
27 Go kiŋzi kiŋ ʒuhucke‐jarezemec,
moc mi jowac rotec maigao bahac fâsâc enʒepieŋ.
28 Juju sanaŋte papiao ʒâŋe‐jeŋic hetâmirezemec,
tiŋne jaŋere birio mi râec‐jopazemec.
29 No ine qarâ suriŋne â ʒâic hati jukopac;
Anutu goki baficnurâ sabecnuzemec.
30 No Anutu gae hecnehuc muteŋkepemu,
no daŋge âzâcnehuc muafeckepemu.
31 Wofuŋ e irec mana biaŋkeocmu,
bulimakao ʒuŋenehec â sârânehec bâzi rikecnepe muzac
ine maname wawahane ezac.
32 Ro waha âte ejarekicne jaŋe i honerâ ʒeri enʒepieŋ;
Anutu wira basac ecneeŋgopieŋ ŋoŋe maŋŋeŋic firiezejec.
33 Wofuŋ e tac qararacne jaŋere dâŋ manaekac,
e fuŋfuŋfâcne niŋgiŋko foeŋgopieŋ jaŋe mi suŋgiŋ‐jopaekac.
34 Sambâŋ â mâreŋ jahe e mumbiaŋkezepirec,
hâwec â maŋnao wiac qiriŋ qaŋgopieŋ sasawa jaŋe mâmâc.
35 Anutu e Zioŋ sisipirickonec bataraocmu,
â Juda mâreŋko hae sesuc heɋâreocmu;
eme kiŋaŋŋicfâcne jaŋe irec rune erâ junʒepieŋ.
36 Kiŋaŋ qaqafâcne ɋâricfâc‐jeŋic jaŋe hotâckenʒepieŋ,
eme ʒâŋe‐ticnere aŋac‐jopaekaczi maŋnao junʒepieŋ.