1 Abram e jahacne â ŋonâŋ‐ticne â mafa wiac‐ticne erâ Loti mâmâc Aigita mâreŋkonec risierâ Negebe mâreŋko ra fisimbiŋ. 2 Abram e lama bulimakao erâ gol â siliwa ŋemâcne focnewec. 3 Eme Abram e Negebe mâreŋkonec Bete haeopec juju fofo raku mârâc jaha Bete â Ai hae ŋondeŋ‐jekicko qoruc boze‐ticne fâreme fowec ira fisiwec. 4 Erâ mârâc jaha alata bawec ira hâcne Wofuŋte ʒâŋe riwaseckewec. 5 Loti e Abramhec juhuc iŋuc jaha lama bulimakao bacjopa juwec â qoruc boze wâc ŋecnewec. 6 Eme mâmâc jaha junicte mâreŋzi mi sâcjofawec. Qowifâc‐jekic bocjaha jumbiŋte mâreŋ mocjahao ŋec juc eenere sâc mi ewec. 7 Irec Abram â Loti qowi soŋaŋfâc‐jekic jaŋe mâreŋte iiriac embiŋ. Dameŋ ira Kanaaŋ ŋic â Periʒi ŋic jaŋe mâreŋ irec rune jumbiŋ.

8 Eme Abram e Loti ʒiŋuc âzâcnewec: “Nâhâcne ŋondeŋko me soŋaŋfâc‐nâhec jaŋere ŋondeŋko rârâsi fome mi sâckeocmu, nâhâc mame ŋokâ. 9 Ʒâŋe maigao mâreŋ sâko forakac i mi honekic me? Irec râwiŋnenac. Go qanaopec razo mukicko noni fâreopec rapemu, me fâreopec razo mukicko noni qanaopec rapemu.” 10 Eme Loti e ʒâŋe fime rame honewec: Jordaŋ mâreŋ i opâzi bâgunucke‐fârekicne, Wofuŋte jufu gie iŋucne, erâ Aigita mâreŋ iŋucne, domarâ raku Ʒoari fisikac hâcne. Wofuŋzi Sodom â Gomora hae mi bâsirowec‐jofawec dameŋ ira Jordaŋ mâreŋzi iŋuc hâcne fowec. 11 Eme Loti e Jordaŋ wâneŋ sâko hone wosâerâ ʒoaŋ wewefunaopec rawec. Iŋuc ehuc rârâwiŋ epic. 12 Eme Abram e Kanaaŋ mâreŋko ŋec juc ewec, â Loti e ine Jordaŋ mâreŋko hae ŋerambiŋ jaŋere ŋondeŋko ju fofo raku Sodom hae mendâŋko fisirâ qoruc boze‐ticne fâreme fowec. 13 Sodom hae rune jaŋe ine Wofuŋte maio ŋic hehesicne juhuc sindaŋ fuŋne fuŋne ejumbieŋ.

14 Loti e Abram beherâ rame Wofuŋzi Abram ʒiŋuc âzâcnewec: “Go mâreŋ domakomecko qâhâŋnerâ ʒâŋe fitec mâreŋ faicpec â juwicpec erâ ʒoaŋ wewefunaopec â huhunaopec raoc. 15 Mâreŋ honekic sasawa i go â ɋâricfâcge fofo sanaŋ foŋareocte biŋe qaŋarekopac. 16 Â ɋâricfâcge basawec‐jopape sawe mâririackepie ʒare‐jeŋic mâreŋko rufe fokac irec sâc eocmu. Eme rufe wowosene mi ekac, wowosene ezacko ine ɋâricfâcge wowosec‐jopane jaha ezac. 17 Go faharec, erâ mâreŋ hâŋne â otecne fotâcnerâ rac, mâreŋ i go tahacgukopac hâcne.” 18 Eme Abram e ju fofo raku Heboroŋ haeo Mamere ere boriŋ gie fowecko qoruc boze‐ticne fâreme fowec. Erâ ira ŋec juc ehuc Wofuŋte alata moc bawec.