14
Abram e ʒikaonec risieme Melikisedezi jambuŋkewec
1 Sina ŋicwofuŋ Amarafe, â Elasa ŋicwofuŋ Arioko, â Elam ŋicwofuŋ Kedo‐Laome erâ Goim ŋicwofuŋ Tidali 2 jaŋe ŋicwofuŋ 5 kecʒiŋuc jaŋehec qaqac embiŋ: Sodom ŋicwofuŋ Bera, â Gomora ŋicwofuŋ Birisa â Adama ŋicwofuŋ Sinaba â Zeboim ŋicwofuŋ Semebe erâ Bela ŋicwofuŋ. (Bela i Ʒoari irec ʒâŋe moc.) 3 Ŋicwofuŋ i sasawa jaŋe Sidim wâneŋko (Sidim i Hâwec Hâmocne irec ʒâŋe moc) ʒâʒâfic erâ tumaŋnembiŋ. 4 Jaŋe jara 12 Kedo‐Laome kiŋaŋ qacnehuc jumbiŋ, jara namba 13‐ko ine e râpeckembiŋ. 5 Eme jara namba 14‐ko Kedo‐Laome â ŋicwofuŋ ehec jumbiŋ jaŋe ware Asitero‐Karanaim haeo Refaim ŋic jopambiŋ, izi ware Ham haeo Ʒuŋim ŋic jopambiŋ, izi ware Kiriatim wâneŋko Emimŋic jopambiŋ, 6 izi ware Seiri tikio Horite ŋic jopa jâpec ejare raku Eleparaŋ haeo, mâreŋ burocnere qaŋeŋnao fisimbiŋ. 7 Erâ irecnec raku Eŋmisipa haeo (i Kadesi hae irec ʒâŋe moc) fisirâ ŋic mâreŋ ira jurambiŋ jaŋe joparâ Amori ŋic Hazazoŋ‐Tama haeo mâmâc jopambiŋ. 8 Eme Sodom ŋicwofuŋ, Gomora ŋicwofuŋ, Adama ŋicwofuŋ, Zeboim ŋicwofuŋ, â Bela ŋicwofuŋ i jaŋe Sidim wâneŋko ʒika qaniŋte rambiŋ. 9 Ra fisirâ ŋifec domahapie ŋifec Elam ŋicwofuŋ Kedo‐Laome, â Goim ŋicwofuŋ Tidali, â Sina ŋicwofuŋ Amarafe, erâ Elasa ŋicwofuŋ Arioko i jaŋe domambiŋ. Ŋifec 4 domambiŋ, ŋifec 5. 10 Sidim wâneŋko ira mâreŋ sâfâ irec nombâŋ i mâreŋ sâckerâ forawec. Eme râsi jaŋe Sodom â Gomora ŋicwofuŋ jahe jofa jâpec ejactepie wisepire ŋicfâc‐jekic gâcne nombâŋko humbiŋ â tiwâne jumbiŋ jaŋe tiki mâreŋko wiserâ rambiŋ. 11 Irec râsi jaŋe Sodom â Gomora haeonec mafa mecne nânâ mecne rofârerâ barâ rambiŋ. 12 Ehuc Abram hahac‐ticnere ŋokâ Loti Sodom haeo ŋec juc ewec, e jahacne â mafa‐ticne iŋuc jaha rorâ amecke rambiŋ.
13 Eme ʒikare nâfocne ŋic moczi fisi Hebiraio ŋic Abram biŋe âzâcnewec. Abram e dameŋ ira Amori ŋic Mamere ere boriŋ gieo ŋec juc ewec, â Mamere qomâ jahec‐ticne Esikola â Anera jahe wâc Abramhec ʒâʒâfic erâ jumbiŋ. 14 Abram e ine motecoc‐ticne niŋgiŋko barâ rakicne biŋe i manarâ izia ŋicfâc‐ticne ʒikare fuŋne mamana, ʒare‐jeŋic 318, e jahacne ficko fuakicne sasawa rocjopame râsi bâjâpec‐jopa raku Daŋ haeopec fisimbiŋ. 15 Eme Abramzi ŋicfâcne bâfâuc‐jopame gurune gurune ehapie ŋafeo râsi ututuŋ fisi‐jarerâ jopa jâpec ejare raku Hoba haeo Damasko faic‐ticnao fisimbiŋ. 16 Fisirâ mafa jowac rofârehuc motecoc‐ticne Loti â mafa wiac‐ticne, erâ ŋokac â ŋic ŋokac gâcne wâc mâmâc bârisiec‐jopa‐fârewec.
17 Abram e Kedo‐Laome â ŋicwofuŋ âgofâcne jopa jâpec ejareku risehame Sodom ŋicwofuŋ e fahare Sawe Wâneŋ, ʒâŋene moc Ŋicwofuŋ Wâneŋ ira hâcne bâfuaocte rawec. 18 Ehame Salem ŋicwofuŋ Melikisede, Anutu Femicne ere taha bapa juweczi Abram poroŋ â waiŋ bacne rawec. 19 Erâ jambuŋkehuc dâŋ ʒiŋuc muwec:
“Anutu Femicne e Abram jambuŋkezejec,
Anutu sambâŋ mâreŋ bâbâfua eki hâcne.
20 Erâ Anutu Femicne mucne bacnezo,
eki hâcne râsifâcge megao râec‐jopajec.”
Eme Abram e wiac sasawa teŋkonec wâŋ irec sâc râcnewec. 21 Ehame Sodom ŋicwofuŋ e Abram ʒiŋuc muhuc âzâcnewec: “Ŋic ŋokac bârisiec‐jopa‐narec, mafa ine fogareoc.” 22 Mume Abramzi Sodom ŋicwofuŋ ʒiŋuc âzâcnewec: “Wofuŋ Anutu Femicne hâcne, sambâŋ â mâreŋ irec bâbâfua, erao musanaŋkekopac. 23 No qoruc ɋâɋâtâ muc me kikehuhu bâmbândeŋ me wiac piticne i me i goraonec mi ropemu; go ʒiŋuc muzicte: Noni Abram mafa qâmiecnepo. 24 Mâc motec jaŋe suanʒeŋ nâmbieŋ izi fozejec, erâ ŋic nohec jumbeneŋ, Anera, Esikola â Mamere jaŋe ine sâcjeŋic ronʒepieŋ.”