1 Eme irec faicnao Wofuŋzi Abram maŋko fuac ecnerâ ʒiŋuc âzâcnewec: “Abram, go mi hâwicguoc, maroge no hâcne, â furige i fekicne jâmbâŋ fuaocmu.” 2 Abramzi ine muwec: “Wofuŋ Anutu, go wemo wiac moc narecmurâ mukic? No ɋâric tâmiric mâc hahata juekopac, eme Elieʒe Damasko haeonec eki merâfâc‐nane rauckerâ bajuocmu.” 3 Erâ ʒuhuckerâ muwec: “Manakic, go ɋâric moc mi tahacnumeŋ, irec juku kiŋaŋ qaqa‐nanezi merâfâc‐nane rauckeocmu hâcne.” 4 Iŋuc mume Wofuŋte dâŋ kecʒiŋuc fuacnewec: “Eki merâfâcge mi rauckezejec, aricne, gore bifuŋko fuaocmuzi merâfâge rauckeocmu.” 5 Eme mâreŋko jowa hurâ ʒiŋuc âzâcnewec: “Go qâhâŋnerâ sambâŋko ʒâŋe fitec feme bâpiŋ honec‐jopac, i sâcne wosec‐jopacmu me?” Erâ âzâcnewec: “Ɋâricfâcge jaŋe irec sâc hâcne fua ranʒoŋgopieŋ.” 6 Mume Abramzi Wofuŋ manasiŋkeme irec erâ maname kiŋticne tarawec.

7 Erâ ʒiŋuc âzâcnewec: “Wofuŋ jukopac, noni hâcne mâreŋ ʒi garepemurâ Uru haeonec, Kaldea mâreŋkonec jowacgu warepo.” 8 Abram ine dâŋ ʒiŋuc bâtikiecnewec: “Wofuŋ Anutu, no mâreŋ ʒi rauckepemu i weniŋuc erâ sâcne mana ʒakiepemu?” 9 Iŋuc mume âzâcnewec: “Go ra bulimakao ŋokacne moc jara‐ticne 3 ekicne â noniŋ ŋokacne â lama ŋicne moc jara‐jekic 3 jaha ekicne, erâ hapâ â buni motecne, iŋuc rocjoparâ bare‐narec.” 10 Mume ro bafisic‐joparâ hefâuckehuc dâkâne moc ŋifec â dâkâne moc ŋifec iŋuc biricke rawec, wipe sawa ine mi hefâuckewec. 11 Eme gafu hâro jaŋe fisirâ âsu gârec nâcjopaniŋte wahapie Abramzi jâpec‐jopawec.

12 Eme ʒoaŋ huzo eha Abram e guŋ qâŋɋâŋ foha hâhâwic â duŋdapâczi foŋkewec. 13 Ehame Wofuŋzi Abram ʒiŋuc âzâcnewec: “Go ʒiŋuc mana sanaŋkec: Ɋâricfâcge jaŋe mâreŋ moc, biŋe mi qajarekicne, ira jaba juniŋmu; ehuc mâreŋ rune jaŋe bomac‐jopapie kiŋaŋ qajarehuc juhapie jara 400 taraocmu. 14 Â kiŋaŋ qajareniŋmu ŋicguru i jaŋe ine noni okacne bazu‐jarepemu, eme ɋâricfâcge jaŋe mafa mâririhec waha raniŋmu. 15 Go gahacne ine apa ŋosafâcge jaŋere jujumana mâreŋko raʒicmu, go juju juutuckehuc ŋicqizec erâ hâmotec ducguniŋmu. 16 Jaŋe ine Amori ŋic jaŋere kiŋte sâc micnao biac mi qakacte jufekupie gaŋne 4 eme risie wareniŋmu.”

17 Eme ʒoaŋ hume dapâc efâreha hosâc râqâc â waha ʒocbâruŋhec fuarâ qowi dâkâne ŋondeŋko fotâcne rawec. 18 Ʒoaŋ ira Wofuŋzi ʒiŋuc muhuc Abramhec ʒâʒâfic ewec: “Aigita mâreŋte opâonec fuŋkerâ raku Eufrata opâ sâkoo tarakac, mâreŋ i hâcne ɋâricfâcge jaŋe jarepemurâ mupaŋkekopac. 19 Keniŋic, Keniʒi ŋic â Kadomi ŋic, 20 Hitiŋic, Periʒi ŋic â Refaim ŋic, 21 Amori ŋic, Kanaaŋ ŋic â Jebusi ŋic jaŋere mâreŋ hâcne.”