1 Rahe e ine hufiŋne juhuc Jakobore naru motec moc mi rocjopawec, e jahacne fuŋne iŋuc honerâ hahac‐ticne Lea iiŋ guuŋ ecnehuc Jakobo ʒiŋuc âzâcnewec: “Go naru motec bâfuac‐jopa‐narezemec, mi etecne hâmopemu.” 2 Eme Jakobo e Rahere erâ bune wefume ʒiŋuc âzâcnewec: “Wiac, Anutuzi naru motec sakare‐gareha no wemocko e âkehockerâ moc bâfua‐garepemu.” 3 Eme eki muwec: “Ʒi kiŋaŋ naru‐nane Biliha bajuhaŋtec ŋokâ moc rome nore biŋe ezejec.” 4 Iŋuc murâ kiŋaŋ naru‐ticne Biliha ŋokac‐ticne eocte râcneme Jakobozi ehec juwec. 5 Eme Bilihazi motec kiweckerâ Jakobore ŋokâ moc rowec. 6 Rahezi ine muwec: “Anutu e mana‐nareme sâckeha dâŋnane manarâ motec moc tahacnuwec,” iŋuc murâ ʒâŋe‐ticne Daŋ muwec. 7 Eme Rahe kiŋaŋ naru‐ticne e faicnao mocwâc motec kiweckerâ Jakobore ŋokâ moc rome jajahec epic. 8 Eme Rahezi muwec: “Hahac‐nanehec juju gie baku sanaŋkepo,” iŋuc murâ motecte ʒâŋe Naftali muwec.

9 Eme Lea e motec roro dameŋ‐nane tarawec iŋuc manarâ kiŋaŋ naru‐ticne Silipa rorâ Jakobore ŋokac eocte râcnewec. 10 Eme Silipa, Leare kiŋaŋ naru hâcne, e Jakobore ŋokâ moc rowec. 11 Rome Leazi muwec: “Bubiaŋ!” iŋuc murâ ʒâŋene Gade muwec. 12 Eme Silipa, Leare kiŋaŋ naru hâcne, e Jakobore ŋokâ moc rome jajahec epic. 13 Eme Leazi muwec: “No ʒeri‐nanehec! Ŋokac jaŋe nore manapie ʒerine eocmu.” Iŋuc murâ ʒâŋene Ase muwec.

14 Eme waizeŋ qa roro dameŋ ira Rubeŋzi ʒoaŋ mocko hata rarâ gieo ŋokac seroŋ wiac moc bâfuawec. Erâ bare neŋgoc‐ticne Lea râcnewec. Eme Rahezi Lea ʒiŋuc âzâcnewec: “Ŋokâgezi seroŋ wiac bawarejec i gâcne no narec.” 15 Eki ine muwec: “Ŋowe‐nane nowac rozo ekomec i manatec afeckeha ŋokâ‐nanere seroŋ wiac i mâmâc rozo mukic me?” Rahezi ine muwec: “Sâcne, ŋokâgere seroŋ wiac irec okacne ŋowe‐nâhec ŋafe ʒi gohec sâcne foocmu.” 16 Eme Jakobo e owâ ririŋte gieonec ware fisime Leazi ra bâfuarâ muwec: “Go norao wefuzemec, no ŋokâ‐nanere seroŋzi furi bacgupac.” Iŋuc mume ŋafe ira ehec fowec hâcne. 17 Eme Anutu e Lea manacneme motec kiweckerâ juku Jakobore ŋokâ moc rome 5 embiŋ. 18 Eme Leazi muwec: “No kiŋaŋ naru‐nane ŋowe‐nane râcnepore Anutuzi ŋokâ moc narewec.” Iŋuc murâ ʒâŋe‐ticne Isasa muwec. 19 Eme irec faicnao Leazi mocwâc motec kiweckerâ juku Jakobore ŋokâ moc rome 6 embiŋ. 20 Eme Leazi muwec: “Anutu e taha biaŋne tahacnume ŋowe‐nanere ŋokâ 6 rocjopapo, irec ʒi nohec paŋʒâic juocmu.” Iŋuc murâ ʒâŋene Sebuloŋ muwec. 21 Faicnao otâ moc rowec ere ʒâŋe Dina muwec. 22 Iŋuc fua‐fâreme Anutuzi Rahere manasurâ nunumu‐ticne dopeckehuc naru motecfâc‐ticne fuaniŋte manacnewec. 23 Eme motec kiweckerâ ŋokâ rorâ muwec: “Anutuzi mimi‐nane nowac rowec.” 24 Iŋuc murâ ʒâŋe‐ticne ʒiŋuc muhuc Josefe muwec: “Wofuŋ e ŋokâ moc ʒuhucke‐narezo murâ ʒuhucke‐narezejec.”

25 Eme Rahe e Josefe rome Jakobozi Labaŋ ʒiŋuc âzâcnewec: “No hae mâreŋ‐naneo rapemurâ râecnuzemec. 26 Ŋonâŋ jahec‐nane â naru motecfâc‐nane jaŋere kiŋaŋ qagarehuc jupo irec jaŋe qikiŋ‐jopa‐naretec jowac‐jopa razepac. Erâ kiŋaŋ weniŋuc jaha qagarehuc jupo i go gahac manakic.” 27 Eme Labaŋzi âzâcnerâ muwec: “Wiac mocjahare sawa mupe mana‐narenʒaŋ. No ɋâsâi qahuc ʒiŋuc mana tarapo: Wofuŋ e gore erâ ehâmo‐narewec.” 28 Eme ʒuhuckerâ muwec: “Giegere furine mutec garezepac.” 29 Jakobozi ine muwec: “No kiŋaŋ weniŋuc qagarepo â lama bulimakaofâcge soŋaŋ‐jopahape jaŋe weniŋuc embiŋ i go gahac manakomec. 30 No mi warehape afecne sawa jugarembiŋ, ʒi ine fua sawec erâ guru sâko embiŋ juŋgopieŋ, eme Wofuŋ e gie‐nane bahape go ehâmo‐garewec. Dameŋ ʒi ine no nahac wiacfâc‐nane jaŋere erâ gie bahuc dope wiac bâfua‐jarezepac.” 31 Eme Labaŋzi wiocnewec: “Wemo wiac garepemurâ mukic?” Jakobozi dâŋ ʒiŋuc bâtikiecnewec: “Go wiac moc mi narezemec. No dâŋ maŋkekopac i mupe manatec sâckeocmuo ine lama bulimakaofâcge mocwâc soŋaŋ‐jopahuc juzepac. 32 Ʒiŋuc: No miŋecgac qowifâcge gurune gurune honec‐jopahuc qâqâreŋ â tiŋpâc tiŋpâc jaŋe bâwosâec‐joparâ bârâriec‐jopapemu, lama motecne gâgâpâc â noniŋ kuiqâreŋ â tiŋpâc tiŋpâc jaŋe hâcne. Eme qowi iŋucne jaŋe hâcne gie furi‐nane enʒepieŋ. 33 Eme wiac ekopac i sâckekac me mâcne, irec fuŋne ʒâhec taniŋkezejec. Go juku furi‐nane honezo warerâ, noniŋ jaŋere ŋondeŋko kuiqâreŋ â tiŋpâc tiŋpâc tâmiric â lama motecne jaŋere ŋondeŋko gâgâpâc sawa mâcne, gâcne mâmâc juniŋmu, iŋuc bâfuac‐joparâ muzemec: I jaŋe fiuc rocjopakicne.” 34 Eme Labaŋzi muwec: “Sâcne, mukomec iŋuc fooc.” 35 Iŋuc murâ ra ʒoaŋ ijaha lama ŋicne qâqâreŋ â tiŋpâc tiŋpâc â noniŋ tiŋpâc tiŋpâc â kuiqâreŋ â qaŋqaŋ ocŋondeŋ sasawa hâcne, erâ lama motecne gâgâpâc rocjoparâ ŋokâfâcne jaŋere meo râec‐jopa‐fârewec. 36 Erâ Jakobo beherâ ʒoaŋ jahec â moc hata raku mâreŋ wiwicko fisiwec. Ehame Jakobozi Labaŋte lamafâc gâcne soŋaŋ‐jopahuc juwec.

37 Erâ Jakobo e fâric â jâc wiac gâcne irec huti ɋâricne hetâcnerâ sahacne ocŋondeŋ ritume maŋne qaŋqaŋ fua tâcneme qâqâreŋ ewec. 38 Iŋuc erâ huti ritukicne i lama jaŋe opâ nâniŋte ware fisipie jaŋere maio opâ otoo râeme hujujec. 39 I lama jaŋe opâ nâniŋte fisirâ ŋicnezi ŋokacne hucjopa jumbieŋte iŋuc ewec. Eme qowi jaŋe hutire maŋfuŋko iŋuc erâ juku motecfâc‐jeŋic qâqâreŋ â tiŋpâc tiŋpâc â kuiqâreŋ rocjopambiŋ. 40 Eme Jakobo e lama motecne bâwosâec‐joparâ ejareme Labaŋte qowi gurune gurune qâqâreŋ â gâgâpâc jaŋeraopec ʒâŋe fihuc domambiŋ. E iŋuc ehuc e jahacne guru moc buc bâfuarâ Labaŋte guruo mi ʒuhuc‐jopawec. 41 Eme qowi sanaŋne jaŋe huhuc epie sâc Jakobozi ʒâŋe mai‐jeŋicko huti otoo râeme hujujec. I huti wiac honehuc huhuc eniŋte iŋuc ewec. 42 Qowi rorokacne jaŋe Labaŋte biŋe ehapie tâpirihec jaŋe Jakobore embiŋ. 43 Ŋic e iŋuc hâcne ehuc mafa sâkohec eha qowi â kiŋaŋ qaqa â kamele â doŋgi bocjaha fuacnembiŋ.