1 Eme Labaŋ ŋokâfâcne jaŋe dâŋ mumbiŋ i Jakobore hazecko huwec. Dâŋ kecʒiŋuc: “Jakobo e mamac‐nâŋecte wiac sasawa hurewec, mamac‐nâŋecte biŋe fowec wiac gâcne sâko i ro qâzuc eku mafa sâko hurewec hâcne.” 2 Eme Jakobo e Labaŋte ʒâŋe mai sorondoŋ eme honerâ ʒiŋuc manawec: E mârâc âgo enarehuc juwec irec sâc mocwâc mi enarekac. 3 Eme Wofuŋzi Jakobo âzâcne muwec: “Mimiŋnefâcge â mame sâkofâcge jaŋere mâreŋko risiezemec, eme no gohec jupemu.” 4 Eme Jakobo e qowi jaŋehec gieo juhuc dâŋ râeme rame Rahe â Lea jahe erao fisipire 5 ʒiŋuc jasawec: “No ʒiŋuc honekopac: Mamac‐ŋekic e mârâc âgo enarehuc juwec sâc ijaha mocwâc mi enarekac, mamac‐nanere Anutuzi ine nohec jukac. 6 Ŋohe manakopirec, no tâpiri‐nanere sâc mamac‐ŋekic kiŋaŋ qacnehuc jupo. 7 Mamac‐ŋekiczi ine eatucnuhuc gie furi‐nane bafec bawahac eme arec 10 ewec, ehuc wiac‐nane nowac rohuc bâʒâicnuzacte Anutuzi hekecnewec. 8 ‘Qowi tiŋpâc tiŋpâc jaŋe gore gie furi enʒepieŋ,’ iŋuc mume qowi sasawa jaŋe motecfâc‐jeŋic tiŋpâc tiŋpâc rocjopa‐fârembiŋ, me ‘Qâqâreŋ jaŋe gore gie furi enʒepieŋ,’ iŋuc mume qowi sasawa jaŋe motecfâc‐jeŋic qâqâreŋ rocjopa‐fârembiŋ. 9 Iŋuc fuame Anutuzi mamac‐ŋekic qowi iŋucne jâoc rohuc no nare‐fârewec. 10 Qowi ŋicne jaŋe ŋokacne hucjopambiŋ dameŋ ira guŋ manahuc ʒâŋe firâ ʒiŋuc honepo: Lama â noniŋ ŋicnezi ŋokacne hucjopambiŋ jaŋere sahac i qâqâreŋ, kuiqâreŋ â tiŋpâc tiŋpâc sasawa. 11 Eme Anuture aŋelozi ʒiŋuc nazawec: ‘Jakobo!’ Eme no âzâcnepo: ‘No ʒi.’ 12 Eme muwec: ‘Go ʒâŋege qâhâŋnerâ honec: Lama noniŋ ŋicnezi ŋokacne hucjopaeŋgopieŋ jaŋe qâqâreŋ, kuiqâreŋ â tiŋpâc tiŋpâc sasawa! No Labaŋzi wiac egarewec i hone manac efârepo. 13 No Bete hae irec Anutu, go ira hâcne qânâ moc wokemaŋ ruacnehuc dâŋ moc mupaŋke‐naremeŋ. Ajoc, go ʒiŋuczia faharec, erâ mâreŋ ʒi beherâ fufua hae mâreŋgao risie razemec.’ ” 14 Eme Rahe â Lea jahe Jakobo dâŋ ʒiŋuc bâtikiecnepic: “Nâhe mamac‐nâhecte merâfâc wiac biŋe qanâctekicne moc fokac me? 15 Me ere maio jaba tinac mi juekoperec? E qikiŋ‐nâforâ furi‐nâhec rohuc sipirickewec i. 16 Irec Anutuzi mamac‐nâhec mafa jâoc rowec sasawa i nâŋâc â ɋâricfâc‐nâŋec nâŋâcne biŋe ekac. Irec Anutuzi mutâcne‐garewec sâc ezemec.”

17 Eme Jakobo e faharerâ ŋonâŋ jahec‐ticne â ŋokâfâcne jaŋe kamele faio râec‐jopawec. 18 Erâ lama bulimakaofâcne â mafa wiac Mesopotamia mâreŋko juhuc hurewec i rocjopa‐fârerâ Kanaaŋ mâreŋko mamac‐ticne Isaka erao risieocte rawec. 19 Labaŋzi ine lamafâcne jaŋere kanʒaŋ bâtâcnezo rawec. Ehame Rahezi mamac‐ticnere nemuɋâŋ fiuc rowec. 20 Jakobzi ine wiseocte Aramea ŋic Labaŋ hesoŋkecnehuc eatuckewec. 21 Ehuc faharerâ wiac ere biŋe ewec sasawa i ame susuckerâ wisewec. Wiserâ ra Eufrata opâ fotâcnerâ Gileade tiki mâreŋkopec rawec.

22 Eme ʒoaŋ jahec â moc tarame Labaŋ dâŋ ʒiŋuc âzâcnembiŋ: Jakobo e wisewec. Iŋuc âzâcnepie manarâ 23 soctofafâc‐ticne rocjopame ʒoaŋ 7 jâpe raku Gileade tikio bâfuambiŋ. 24 Anutuzi ine Aramea ŋic Labaŋ ŋafeo guŋko fuacnerâ ʒiŋuc âzâcnewec: “Go Jakobo dâŋ i me i moc mucnezicte rucge bazemec.”

25 Jakobozi tikio qoruc boze wiac‐ticne bahame Labaŋzi bâfuawec. Eme soctofafâc‐ticne jaŋehec Gileade tikio jaha mâmâc fombiŋ. 26 Ehuc Labaŋzi Jakobo ʒiŋuc âzâcnewec: “Go wemo mâsi enaremeŋ? Erâ eatucnuhuc otâ jahec‐nane kâpâcwâru ŋic iŋucne jowac‐jofa waremeŋ. 27 Go wemocte eatucnuhuc kamierâ wisemeŋ? Mufua‐naretec muzac noni gae woŋgâŋ ehuc râecguzapo. 28 Go ine otâ jahec‐nane muduc‐jofapemurâ mi manasu‐naremeŋ. Go mutuc emeŋ hâcne. 29 Eme ʒi wiac i me i kosa eŋarezo murâ tâpiri mi basazapo. Mamacgere Anutuzi ine ŋafeo qatara‐narehuc ʒiŋuc mujec: ‘Go Jakobo dâŋ i me i moc mucnezicte rucge bazemec.’ 30 Go mame sâkofâcge jaŋere boc egareha wisemeŋ i sâcne, mocjaha, nemuɋâŋ‐nane wemocte fiuc romeŋ?” 31 Eme Jakobozi Labaŋ dâŋ ʒiŋuc bâtikiecnewec: “No otâ jahecge nowac rocjofazicte hâwicnuwec. 32 Irec moctao me moctao nemuɋâŋge bâfuacmu e mi juzejec. Wiac bajukopac i soctofafâc‐nâhec jaŋere maio hone‐fârezemec. Ehuc bâfuarâ rozemec.” Jakobo e ine Rahezi nemuɋâŋ fiuc rowec i mi manawec.

33 Eme Labaŋ e Jakobo â Lea â kiŋaŋ narufâcne jaŋere qoruc bozeo fewec, erâ nemuɋâŋ‐ticne moc mi bâfuawec. Erâ Leare bozeonec waharâ Rahere bozeo fewec. 34 Ehame Rahezi ine nemuɋâŋ biac rorâ kamele jaŋere mafa bapa he ŋierâ fainao ŋewec. Eme Labaŋzi bozeo babasa gie bame arictac ewec. 35 Rahezi ine mamac‐ticne ʒiŋuc âzâcnewec: “Bomboŋ‐nane, go aaric mi manazemec, no gore maio sâcne mi faharepemu, ŋokac huc ejareekac i hâcne enarekac.” Eki ine wiac sasawa hone‐fârehuc nemuɋâŋ mi bâfuawec.

36 Eme Jakobozi aarickeme Labaŋ dâŋ mucnehuc ʒiŋuc âzâcnewec: “No wemo wiac sâqocne me bahac bâfuapore nu jâpec enarekomec? 37 Ʒi wiac‐nane sasawa basa hewiric efâremec, irec gahacne wiac moc bâfuamecko soctofafâc‐nâhec jaŋere maio râetecne jaŋe honerâ nâhâcne dâŋ mutaranʒepieŋ. 38 No gohec juhape jara 20 tarawec, ehame lama â noniŋfâcge jaŋe motec rocjopapie hâmo sipiric moc mi embiŋ, â gore lama guruonec ŋicne qa nâc moc mi ejarepo. 39 Me qowi momori jaŋe lamafâcge kisuc qâsuc‐jopapie mi bafisi‐garehuc no nahac okacne râepo, go ʒoaŋko me ŋafeo nâcjopapie okacne garepemurâ munaremeŋ hâcne. 40 No ʒoaŋko fârorocte dockehuc jupo â ŋafeo mâmâteŋte erâ guŋqâri jupo. 41 No jara 20 sâko ficgao kiŋaŋ qagarehuc jupo, jara 14 otâ jahecge jahere erâ epo â jara 6 qowifâcge jaŋere erâ epo, goki ine gie furi‐nane bafec bawahac etecne arec 10 ewec. 42 Mamac‐nanere Anutu, Abrahamte Anutu hâcne, â Isakazi araŋ bacnehuc juwec, e mi jume muzac go metariŋ jâmbâŋ râecnutec warezapo. Anutuzi ine busâqoc â ʒâic gie‐nane hone manac erâ ŋafeo dâŋnane mutarajec.”

43 Eme Labaŋzi Jakobo dâŋ ʒiŋuc bâtikiecnewec: “Otâ jahe mecne, naru motec mecne, lama bulimakao mecne â wiac hone‐fârekomec ʒi jaŋe nore biŋe sasawa. Mâc otâ jahec‐nane â naru motec rocjopambiŋ jaŋe ine miŋecgac wemo wiac moc ehâmo‐jarepe sâckeocmu? 44 Ajoc, ʒâʒâfic moc enac, ehuc qânâma moc âkendâŋnepere izi ŋondeŋ‐nâhecko mumutaniŋ erâ ŋezejec.” 45 Iŋuc mume Jakobozi qânâ moc rorâ ma âkendâŋnewec. 46 Eme Labaŋzi soctofafâc‐ticne ʒiŋuc jazawec: “Ŋoŋe qânâ gâcne nuseniŋ.” Eme jaŋe qânâ nuse guruc epie heririŋnao ŋehuc tiwâ bâzi nâmbiŋ. 47 Ehuc Labaŋ eki qânâ guru irec ʒâŋe Jega Sahaduta* Nâŋâcne dâŋko: Mumutaniŋ qânâ guru. muhame Jakobozi ʒâŋene Galede muwec. 48 Eme Labaŋzi muwec: “Miŋecgac qânâ guru ʒizi nâhâcne mumutaniŋ ezejec, irec ʒâŋene Galede mukicne, 49 â qânâma jâmbâŋ ine ʒiŋuc muhuc ʒâŋene Mizipa muwec: Wofuŋ e rârâwiŋ juhapere soŋaŋ‐nâhec juzejec. 50 Go otâ jahec‐nane hone takirec‐jofacmu me mi manahape ŋokac gâcne ʒuhuckerâ rocjopacmuo ine ʒiŋuc manasuzemec: Anutu e honec‐nâpoekac.”

51 Erâ Labaŋzi Jakobo ʒuhuckerâ ʒiŋuc âzâcnewec: “Manakic, qânâ guru â qânâma ŋondeŋ‐nâhecko âkendâŋnepac 52 izi hâcne mumutaniŋ‐nâhec ŋeha no râsi egarehuc jâururâ gorao mi fâzepac, erâ goki wâc râsi enarehuc iŋuc jaha jâururâ norao mi warezemec. 53 Abraham â Naho jahere Anutuzi hâcne mumutara‐nâhec ezejec.” Eme Jakobo e mamac‐ticne Isakazi Anutu araŋ bacnehuc juwec erao mupaŋkewec. 54 Erâ tikio taha bâzi moc bâmockerâ soctofafâc‐ticne nânâre hefârec‐jopawec. Eme tiwâ bâzi nârâ tikio fombiŋ.

55 Izi hae fureme Labaŋ e otâ ŋosafâc‐ticne muduc‐joparâ jambuŋ‐jopawec. Iŋuc erâ behec‐jopahuc hae‐ticnao risie rawec.