1 Eme Jakobo e ʒâŋe fime rame mi Esau â ŋicfâcne 400 warepie honec‐jopazejec i. Iŋuc honec‐joparâ naru motec bâtâc bacjoparâ Lea â Rahe erâ kiŋaŋ ŋokac jajahec jaŋerao râec‐jopawec. 2 Erâ kiŋaŋ ŋokac jahe naru motecfâc‐jekic jaŋehec micne râec‐jopawec, izi Lea â naru motecfâcne, erâ Rahe â Josefe jahe ine ʒâhec jâmbâŋ. 3 E jahacne ine bânie‐jarehuc mâreŋko dape qâhâŋ eha arec 7 eme hahac‐ticnerao fisiwec.

4 Esauzi ine gasacke ra fisirâ hâpo mumuduc ecneme kikioc epic. 5 Ehuc ʒâŋe fime rame ŋokac naru motec honec‐joparâ muwec: “Keci weni jaŋe gohec juŋgopieŋ?” Eki muwec: “Anutuzi buuruc‐ticnere erâ kiŋaŋŋicge no naru motec tahacnuwec jaŋe hâcne.” 6 Eme kiŋaŋ ŋokac jahe â motecfâc‐jekic jaŋe ware dapembiŋ. 7 Eme Lea â naru motecfâcne jaŋe iŋuc jaha ware dapembiŋ, eme ʒâhec Rahe â Josefe jahe wâc ware dapepic. 8 Eme Esauzi Jakobo wiocnewec: “Ŋic â qowi guru hatao fâpie bâfuac‐jopapac izi wemo ezo mukomec?” Eki dâŋ ʒiŋuc bâtikiecnewec: “Bomboŋ‐nane goki akicnucmurâ râec‐jopapac.” 9 Esauzi ine muwec: “Ɋanane, no nahacne wiac bocjaha fonarekac, irec wiac fogarekac i fogareoc.” 10 Mume Jakobozi muwec: “Aricne, go nore manatec sâckekacko taha i sifu mac rozemec. Go âgo enarehuc akicnutec honecgupe ʒâŋe maige Anuture ʒâŋe mai tinac ejec. 11 Irec taha baware‐garepac i rozemec mac, Anutuzi buuruc‐ticnere erâ râe tahac enarewecte sesic qeqeri fonarekac hâcne.” Iŋuc muhuc fotariecneme sifu rowec.

12 Erâ Esauzi muwec: “Ʒi faharerâ bânie‐garepe ranac.” 13 Eki ine muwec: “Bomboŋ‐nane go manakic, naru motec jaŋe gegecne sasawa â lama bulimakao motecne jaŋe susu nâhuc juŋgopieŋ, irec ʒoaŋ mocjahao sawa hatare fâro ejarepe biac betaŋkerâ hâmo‐fârenʒipiŋkohec. 14 Irec bomboŋ‐nane, go kiŋaŋŋicge no bânie‐narec. No ine qowi â naru motec tâpiri‐jeŋicte sâcko qataŋ‐joparâ fâku Seiri haeo gorao fisizepac.”

15 Eme Esauzi muwec: “Iŋuc mukicte ine ŋicfâc‐nane nohec juŋgopieŋ jaŋeraonec gâcnezi baficguniŋte gorao râec‐jopape.” Eki ine muwec: “Iŋuc wemocte? No bomboŋ‐nane go akicnucmurâ mocjaha mukopac.” 16 Eme Esau e ʒoaŋ ijaha risie raku Seiri haeo fisiwec. 17 Jakobo e ine Sukoti haeo rarâ ficticne moc bawec, ehuc qowifâcne jaŋere boze wiac bawec wâc. Irec hae mâreŋ irec ʒâŋe Sukoti* Nâŋâcne dâŋko: Boze. muwec.

18 Jakobo e Mesopotamia mâreŋkonec sahac furu risie wareku Sikem haeo fisirâ hae mendâŋko ŋec juc ewec. 19 Ehuc boze‐ticne bawec mâreŋ i Sikemte mamac, ʒâŋene Hamoro ere ŋokâfâc jaŋeraonec moneŋ kâcɋene 100‐zi furine bawec. 20 Erâ ira alata moc barâ ʒâŋene ʒiŋuc muwec: “Anutu e Israere Anutu”.