1 Leazi Jakobore otâ moc rowec ʒâŋene Dina, e hâcne dameŋ mocko mâreŋ rune naru âgofâc‐ticne jaŋe honec‐jopaocte rawec. 2 Ehame mâreŋ irec ŋicbomboŋ Hiwiŋic Hamoro ere ŋokâ Sikemzi naru e honewec. Erâ rorâ ehec fohuc bâsâqorewec. 3 Ehuc maŋticnezi erea domaha âgo ecnehuc mu bâmiriŋ biaŋne ecnewec. 4 Erâ mamac‐ticne Hamoro ʒiŋuc âzâcnewec: “Go naru keci nore ŋonâŋ eocte dâŋgie bazemec.” 5 Jakobozi ine otâ‐ticne bâsâqorekicne irec biŋene manawec, ehuc ine ŋokâfâcne jaŋe qowi soŋaŋ jumbiŋte jaŋere woŋec juhuc dâŋ i mâc râeme fowec. 6 Ehame Sikem mamac‐ticne Hamoro e Jakobohec dâŋ municte erao rawec. 7 Eme Jakobo ŋokâfâcne jaŋe gieonec risierâ Sikemzi seŋjeŋic bâsâqorehuc Israe guruo mimi sâko bâfuawec biŋe i manarâ bujeŋic wefume aaric‐jopawec. E wiac mi eene jâmbâŋ ewec hâcne.

8 Hamoro e ine ʒiŋuc muhuc jazawec: “Ŋokâ‐nane Sikem e maŋticne ere sanaŋne domakacte sifu ŋonâŋ‐ticne eocte râcneniŋ me! 9 Eme nâŋehec sâsâme efârenaŋ, ŋoŋe narufâc‐ŋeŋic nârehuc nâŋere narufâc rocjopaniŋ. 10 Ehuc nâŋerao juhapie mâreŋ ʒizi ŋoŋere biŋe ezejec wâc, irec ʒira juhuc gie barâ ŋesanaŋkeniŋ.” 11 Eme Sikem e Dina mamac‐ticne â seŋfâcne ʒiŋuc jazawec: “Ŋoŋe sifu mac mana‐nareniŋ! Eme wiac muniŋmu sâc i ŋarepemu. 12 Ŋoŋe ŋokac furi bafehuc bec boreŋ wiac bocjahare mupie sifu muniŋmu sâc râepemu, mâc naru e ŋonâŋ‐nane eocte nare‐jâmbâŋkenʒepieŋ.”

13 Eme Sikem e seŋjeŋic Dina bâsâqorewecte Jakobo ŋokâfâcne jaŋe sioc ehuc Sikem â mamac‐ticne Hamoro dâŋ ʒiŋuc bâtikie‐jactehuc jasambiŋ: 14 “Nâŋe ŋic moc sahacnao ma mi bakicne iŋucne seŋnâŋec sâcne mi râcnenaŋmu, wiac iŋucne i nâŋerao miminehec eekac. 15 Irec ʒiŋuc epie mana‐ŋactenaŋmu: Ŋoŋe nâŋe iŋucne ehuc ŋic sasawa sahac‐ŋeŋicko ma banʒepieŋ. 16 Iŋuc epie narufâc‐nâŋec ŋarenaŋmu â nâŋe wâc narufâc‐ŋeŋic sâcne rocjopanaŋmu, erâ ŋoŋerao ʒuhuckepene ŋicguru mocjaha efârenʒepeneŋ. 17 Â dâŋ ŋazaŋgopneŋ i qatarahuc sahac‐ŋeŋicko ma mi baniŋmuo ine naru‐nâŋec rorâ hae mâreŋ ʒi beherâ ranaŋmu.”

18 Hamoro â ŋokâ‐ticne jahe dâŋjeŋicte manapire sâckewec. 19 Eme Sikem e iŋuc eocte manabâc mi ewec, e Jakobo otâ‐ticne honebâckewec hâcne â wiacfâcne jaŋe ere manapie fefene ewec. 20 Eme Hamoro â ŋokâ‐ticne Sikem jahe hae‐jekicko risierâ tutumaŋ ficko ferâ hae rune ʒiŋuc jazapic: 21 “Ŋic keci jaŋe wamane, irec mâreŋ‐nâŋecko juhuc gie wiac‐jeŋic baniŋte mana‐jarenʒepeneŋ. Mâreŋ rârec rârec kâcɋene fokacte sâcne sâcjopaocmu. Ehame nâŋâc narufâc‐jeŋic ŋokac rocjopanʒepeneŋ, ehuc nâŋâcne narufâc jaŋe jarenʒepeneŋ wâc. 22 Mâc jaŋe wiac ʒiŋucte sawa mana‐nârerâ ʒira juhuc nâŋâcnehec sisifuc eniŋte muŋgopieŋ: Jaŋe sahac‐jeŋicko ma bakicne iŋuc jaha ŋic sasawa nâŋâc sahac‐nâŋecko ma banʒepeneŋ. 23 Iŋuc epene lama bulimakaofâc‐jeŋic â mafa wiac‐jeŋic sasawa i nâŋâcne biŋe jaha eocmu. Irec mana‐jarepene nâŋâcnao ŋec juc enʒepieŋ.” 24 Eme hae rune sasawa jaŋe Hamoro â ŋokâ‐ticne Sikem jahere dâŋte manapie sâckeme sahac‐jeŋicko ma bambiŋ.

25 Eme ŋic jaŋe ʒâic manahuc fohapie ʒoaŋ jahec â moc eha Jakobo ŋokâ jahec‐ticne Simeoŋ â Lewi, Dinare seŋ jahec hâcne, jahe ʒika‐jekic rorâ haeo ferâ ŋic jopa‐fârepic. 26 Ehuc Hamoro â ŋokâ‐ticne Sikem jahe mâmâc jofarâ Sikemte fickonec Dina fâre waharâ jowa rapic. 27 Eme Jakobo ŋokâfâc‐ticne gâcne jaŋe ŋic qâhamoc‐jopakicne jaŋere mafa â hae irec mafa wiac fiuc rombiŋ, i seŋjeŋic bâsâqorembiŋte iŋuc embiŋ. 28 Erâ lama bulimakao â doŋgifâc‐jeŋic, haeo jumbiŋ mecne gieo jumbiŋ mecne i mâmâc rocjopa‐fârembiŋ. 29 Ehuc mafa wiac‐jeŋic â ŋokac naru motecfâc‐jeŋic i mâmâc jowac‐jopa rambiŋ. Ficko wiac fowec sâc i fiuc rofârerâ barambiŋ hâcne. 30 Iŋuc epie Jakobozi Simeoŋ â Lewi ʒiŋuc jasawec: “Ŋohe mâreŋ rune Kanaaŋ â Periʒi ŋic jaŋere maio ʒâŋe biŋe‐nane bâsâqorehuc fai‐naneo wiac hâhâwicne râepire fejec. No ŋicfâc‐nane afecne sawa juŋgopieŋ, eme jaŋe râsi roroc ehuc ware nâpopie no â wiacfâc‐nane sipiricke‐fârenaŋmu.” 31 Eme jahe mupic: “Hâc, e seŋnâŋec boe sau ŋokac iŋucne wiac ecneme sâckewec me?”