1 Eme Anutuzi Jakobo ʒiŋuc âzâcnewec: “Ajoc, go ʒawierâ Bete haeo ferâ ira ŋec juc ezemec. Ehuc hahacge Esaure hâwicgume wisehaŋtec Anutuzi fua‐garewec, e hâcne ira alata moc bacnezemec.” 2 Iŋuc mume Jakobozi wiacfâcne â ŋic ehec jumbiŋ jaŋe ʒiŋuc jaza‐fârewec: “Ŋondeŋ‐ŋeŋicko nemuɋâŋ forakac i behepie raha sahac‐ŋeŋic emasaŋkehuc ŋaqi wiac‐ŋeŋic ɋaɋacne hepie huzejec. 3 Eme faharerâ Bete haeo fenʒepeneŋ, no fific guguriŋ faio juhape mana‐narehuc hatao ŋezicnuwec, Anutu e hâcne ira alata moc bacnezepac.” 4 Iŋuc jazame nemuɋâŋ bajumbiŋ i mecne â hazec warawa wiac‐jeŋic i mâmâc Jakobo râcnepie, Sikem hae qaŋeŋnao boriŋjâc domawec irec fuŋnao duckewec.

5 Eme faharerâ rambiŋ. Ehame hae rârec rârec ŋerawec irec rune jaŋe ine Anuture hâwic‐jopame Jakobo â ŋokâfâcne wemocko jopa jâpec ejarenʒapiŋ. 6 Eme Jakobo â ŋicfâcne ehec jumbiŋ jaŋe Kanaaŋ mâreŋko Lusi haeo, Bete hâcne, ira fisi‐fârembiŋ. 7 Ehuc Jakobo e ira alata moc barâ ʒâŋene El‐Bete* Nâŋâcne dâŋko: Betere Anutu. muwec. E hahac‐ticnere hâwickeme wiserâ raha Anutuzi ira hâcne fuacnewecte iŋuc ewec. 8 Eme Rebeka jauŋ ŋokac‐ticne ʒâŋene Debora, e ira hâmome Bete hae juwicnao boriŋjâc fuŋnao duckembiŋ. Boriŋjâc ʒâŋene “Ki mamakuc boriŋ” muwec.

9 Eme Jakobo e Mesopotamia mâreŋkonec warerâ juhame Anutuzi mocwâc fuacnerâ jambuŋkewec. 10 Ehuc ʒiŋuc âzâcnewec: “Go ʒâŋege Jakobo, ʒi ine Jakobo mocwâc mi muhuc Israe muzo.” Iŋuc murâ Israe muwec. 11 Erâ Anutuzi ʒuhuckerâ âzâcnewec: “No Anutu tâpiri rune, go fua sawec ehuc sawe mâririackezemec, ehame goraonec ŋicguru mocjaha sawa mâcne, ŋic gurune gurune fua ranʒepieŋ, erâ ŋicwofuŋ jaŋe gore bifuŋkonec fuanʒepieŋ wâc. 12 Eme Abraham â Isaka mâreŋ jactepo i go garehuc ɋâricfâcge jaŋe mâmâc jarezepac.” 13 Eme Anutu e Jakobohec dâŋ muc manac epic irecnec fahare fewec. 14 Ehame Jakobo e Anutuzi dâŋ âzâcnewec mâreŋ ira qânâma moc âkendâŋnewec, erâ fainao taha bâzi râerâ wokemaŋ ruacnewec. 15 Ehuc Anutuzi dâŋ âzâcnewec mâreŋ irec ʒâŋe Bete muwec.

16 Eme jaŋe Bete beherâ rahuc juku Efarata hae bâqiŋkehuc Rahezi ʒâic sâko manahuc motec rowec. 17 Motec roocte ŋemâckeme gozi bapa‐ticnezi ʒiŋuc muhuc âzâcnewec: “Go mi hâwicguoc, ŋokâ jaha rocmu.” 18 Eme motec rorâ hâmozo ehuc ʒâŋene Ben‐oni† Nâŋâcne dâŋko: Ʒâic‐nanere motec. muwec, Mamacnezi ine ʒâŋene Benjamiŋ‡ Nâŋâcne dâŋko: Ʒeri motec. muwec. 19 Eme Rahezi hâmome Efarata hatao, Betelehem hatao hâcne, duckembiŋ. 20 Eme Jakobo e ʒâŋeruŋ‐ticnao qânâma moc âkendâŋnewec. Qânâ izi Rahe ʒâŋeruŋ‐ticnere ma ŋeweczi ŋekac. 21 Eme Israe e hata mocwâc ʒuhuckerâ raku Migida‐Ede ficʒora ocniŋucnao fisirâ qoruc boze‐ticne fârewec. 22 Erâ mâreŋ ira ŋec juc ehame Rubeŋzi mamac‐ticnere ŋonâŋoc Biliharao rame ehec fopic. Eme Israezi biŋe manarâ aarickewec.

23 Jakobo ŋokâfâcne 12 jumbiŋ. Leare ŋokâfâc ʒiŋuc: Rubeŋ, e Jakobo mârâc ŋokâ‐ticne, erâ Simeoŋ, Lewi, Juda, Isasa â Sebuloŋ. 24 Rahe ere ŋokâ jahec ʒiŋuc: Josefe â Benjamiŋ. 25 Biliha, Rahe kiŋaŋ naru‐ticnere ŋokâ ʒiŋuc: Daŋ â Naftali. 26 Silipa, Leare kiŋaŋ naru ere ŋokâ ine Gade â Ase. Jakobo ŋokâfâcne iŋuc hâcne Mesopotamia mâreŋko fuambiŋ.

27 Eme Jakobo e mamac‐ticne Isaka Mamere haeo Kiriati‐Araba, Heboroŋ hâcne, juwecko ra fisiwec. Hae mâreŋ ira hâcne Abraham â Isaka jahe jupic. 28 Isaka e jara‐ticne 180 bazuwec. 29 E jujâmbâŋkeku ŋicqizec erâ hâmohuc mimiŋnefâc‐ticne jaŋerao ʒuhuckewec. Eme ŋokâ jahec‐ticne Esau â Jakobo jahe duckepic.