1 Jakobo e Kanaaŋ mâreŋko mamac‐ticnezi jaba juwec ira hâcne ŋec juc ewec.

2 Jakobo wiacfâcne jaŋere binaŋ kecʒiŋuc fokac: Josefe e jara‐ticne 17 bazume hahacfâcne jaŋehec mâmâc lama soŋaŋ jumbiŋ. E motec ɋâri juwecte mamac‐ticnere ŋokac jahec Biliha â Silipa jahere ŋokâfâc jaŋehec juwec hâcne. Eme jaŋe bahac i me i moc bâfuapie Josefezi irec dâŋ mamac‐ticne âzâcne jujec. 3 Israezi ine Josefe maŋjauŋ ecnewec i ŋokâfâcne gâcne ejarewec irec sâc sirickewec. E Israezi biac ŋicqizec erâ juha fuawecte iŋuc ecnewec. Ehuc mume ŋaqi menehec moc bacnembiŋ. 4 Eme hahacfâcne jaŋe, mamac‐jeŋiczi ŋokâfâcne gâcne jauŋ afecne ejarehuc Josefe ine bafehuc ecnewec, iŋuc honerâ Josefe qaisockehuc ehec dâŋ urucne muc manac mi embiŋ.

5 Juku Josefezi guŋ moc manarâ hahacfâcne binaŋ bajarehuc 6 ʒiŋuc jazawec: “Ŋoŋe mananiŋ, no guŋ moc ʒiŋuc manapo: 7 Nâŋâc gieo padi dâtâckembeŋ. Ehame nore dâtâczi acmâc fahare domawec, â ŋoŋere dâtâczi ine nore orâŋkerâ hasickehuc domambiŋ.” 8 Iŋuc mume hahacfâcne jaŋe ʒiŋuc âzâcnembiŋ: “Hâc, go nâŋere ŋicwofuŋ ehuc soŋaŋ‐nâpocmurâ mukic me?” Iŋuc murâ guŋticnere â dâŋticnere boc qaisockembiŋ. 9 Eme irec faicnao guŋ moc manawec i ŋuc jaha hahacfâcne binaŋ bajarehuc ʒiŋuc muwec: “Mananiŋ, no guŋ moc ʒiŋuc manapac: Mosa ʒoaŋ â bâpiŋ 11 jaŋe dape‐narembiŋ.” 10 Binaŋ i mamac hahacfâcne mâmâc bajarewec. Eme mamacnezi dâŋ mucnehuc âzâcnewec: “Go guŋ keci manamec i weniŋuc? Neŋgoc mamac â hahacfâcge nâŋe fisirâ maŋfuŋgao fodapenaŋte mukomec me?” 11 Eme hahacfâcne jaŋe iiŋ guuŋ ecnehapie mamacnezi ine dâŋ i maŋkerâ juwec.

12 Eme hahacfâcne jaŋe mamac‐jeŋicte lamafâc soŋaŋ‐jopaniŋte Sikem hae mâreŋko ra juhapie 13 Israezi Josefe ʒiŋuc âzâcnewec: “Go manakic, hahacfâcge jaŋe Sikem mâreŋko lama soŋaŋ juŋgopieŋ. Irec warec, eme no jaŋerao sorecgupe razemec.” Mume muwec: “No ʒawierâ jukopac.” 14 Eme eki âzâcnewec: “Go rarâ hahacfâcge honec‐jopazemec, jaŋe ɋiɋicne â biaŋne juŋgopieŋ me weniŋuc, erâ lama guru jaŋe iŋuc jaha sâcne mac juŋgopieŋ me mâcne, erâ ware dâŋ binaŋ enarezemec.” Iŋuc muhuc Heboroŋ wâneŋkonec soreme raku Sikemko fisiwec. 15 Erâ hata qâsoriehuc rac warec eha ŋic moczi bâfuarâ wiocnewec: “Go wemo wiac basakic?” 16 Eki muwec: “No hahacfâc‐nane basac‐jopakopac. Jaŋe wena juhuc lama soŋaŋ‐jopaŋgopieŋ i nazac mac.” 17 Ŋic eki muwec: “Jaŋe ʒirecnec mocko rambiŋ. Ehuc ʒiŋuc mupie manapo hâcne: ‘Ajoc, nâŋâc Dotaŋko ranaŋ.’ ” 18 Eme Josefe e hahacfâcne basac‐jopa raku Dotaŋko bâfuac‐jopawec. Eme taicko juhame honerâ qaniŋte mumockehuc 19 ʒiŋuc muc manac embiŋ: “Honeniŋ, guŋŋic warekac kecocna! 20 Ajoc, wareme qanaŋ, erâ opâ nombâŋko behepene hurâ foha ʒiŋuc munʒepeneŋ: Qowi mimicnezi ware kisuckewec. Ehame guŋticnere fuŋne taniŋkezejec.” 21 Eme Rubeŋzi dâŋ i manarâ mejeŋickonec bataraocte manasuhuc ʒiŋuc muwec: “Aricne, mi qazo.” 22 Erâ ʒuhuckerâ jazawec: “Socticne mi hoŋkeniŋ! Mâreŋ tuhuo nombâŋ moc fokac ira behepie huoc, juju‐ticne ine akickenʒepieŋ.” E mejeŋickonec batararâ mamac‐ticnerao bârisieocte manasuhuc iŋuc muwec. 23 Eme Josefe e hahacfâcne jaŋerao fisime ŋaqi rojuwec, ŋaqi menehec hâcne, i heunuckecnembiŋ. 24 Erâ rorâ nombâŋko behepie huwec, nombâŋ ine opâ tâmiric tacne fowec.

25 Jaŋe iŋuc erâ nânâ nâniŋte waha ŋembiŋ. Ehuc ʒâŋe fipie rame Isimae âbârâ ŋic Gileade haeonec warepie honec‐jopambiŋ. Jaŋe kamelefâc‐jeŋic jaŋe gumi â wokemaŋ â jâc sâŋiŋ wiac âsickepie Aigita mâreŋko raniŋte warembiŋ. 26 Eme Judazi ɋafâcne ʒiŋuc jazawec: “Nâŋâc ɋanâŋec qâhâmorâ hesoŋkepene wemo wiac fârine moc fua‐nâreocmu? 27 Irec Isimae ŋic jarepene jaŋe furi nârenʒepieŋ, e jahacne ine akickenʒepeneŋ, e ɋanâŋec â nâŋâcne soc biuc jaha.” Iŋuc mume ɋafâcne jaŋe manapie sâckewec. 28 Eme Midiaŋ âbârâ ŋic jaŋe ware fisipie Josefe nombâŋkonec fârepie wefume Ismae ŋic jarepie furine siliwa moneŋ 20 jarembiŋ. Ehuc Aigita mâreŋko barambiŋ.

29 Eme Rubeŋ e ʒâhec nombâŋko risie rarâ Josefe basawec. Erâ busâqoc manahuc ŋaqi‐ticne bâsuckerâ 30 ɋafâcne jaŋerao risierâ muwec: “No motec e basakopac i! Irec weniŋuc epe.” 31 Eme jaŋe noniŋ ŋicne moc qarâ Josefere ŋaqi noniŋ socko âke uruckembiŋ. 32 Iŋuc erâ ŋaqi menehec i mamac‐jeŋictao ʒiŋuc muhuc râepie rawec: “Wiac bâfuambeŋ i honec! I ŋokâge Josefere ŋaqi me mâcne?” 33 Eme eki ʒâŋitarâ muwec: “I ŋokâ‐nanere ŋaqi hâcne. Qowi mimicne moczi kisuckerâ nâwec, jâmbomac Josefe e kisuc qâsuckekicne.” 34 Erâ Jakobo e ŋaqi‐ticne bâsuckehuc mateŋ qonaŋkerâ ŋokâ‐ticnere ki mamakuc ehuc juwec. 35 Eme naru motecfâcne jaŋe sasawa faharerâ mu bâmiriŋ ecnezo mupie mana‐bipiehuc muwec: “Aricne, no ki busâqoc ehuc juku hâmorâ ŋokâ‐nanerao hâmoc haeo huzepac!” Mamacnezi iŋuc hâcne murâ kiohuc juwec. 36 Midiaŋ ŋic jaŋe ine Josefe Aigita mâreŋko ŋic moc ʒâŋene Potifa râcnepie furine bawec. Potifa e Faraore momori fuŋfuŋfâc jaŋere micne juwec.