1 Eme Josefe Aigita mâreŋko ba fisipie Aigita ŋic moc ʒâŋene Potifa e Faraore momori fuŋfuŋfâc jaŋere micne juweczi Isimae ŋic jaŋeraonec furine bawec. 2 Wofuŋzi ine Josefehec juwecte eki wiac ebac ewec i biaŋke‐fâreme bomboŋ‐ticnere ficko juocte manacnekicne. 3 Eme Josefe e gie bawec sâc i Wofuŋzi ehec juhuc bafickeme bame biaŋke‐fârewec. 4 Bomboŋ‐ticnezi iŋuc honerâ Josefere maname sâckeme e jahacne kiŋaŋ qaqa jâmbâŋ bawec, ehuc ficticnere â wiac focnewec sâc irec soŋaŋ âkendâŋnewec. 5 Eme Potifa e Josefe ficticnere â moneŋ mafa wiac‐ticnere soŋaŋ râewec, dameŋ ira Wofuŋzi Josefere erâ Aigita ŋic ficticne jambuŋkewec, ehame wiac focnewec sâc, ficko mecne, gieo mecne i Wofuŋte jambuŋzi sâcke‐fârerâ fowec. 6 Eme irec hâcne wiac focnewec sâc i Josefere meo râehuc wiac irec me irec mana mezac mi ewec, mâc nânâ nâhuc juwec irec mocjaha manasuwec.

Josefe e sahac hawari biaŋ. 7 Eme irec hâcne Potifa ŋonâŋ‐ticnezi Josefe honebâckehuc juku dameŋ mocko ʒiŋuc âzâcnewec: “Go nohec fozemec.” 8 Eki ine qatararâ bomboŋ‐ticnere ŋonâŋ ʒiŋuc âzâcnewec: “Manakic, bomboŋ‐nanezi nore manabâc mi ehuc wiac focnekac sâc i nore meo râe‐fârewec. 9 Ehuc fic ʒira e jahacne sâc jaha jupemurâ râecnuwec. E wiac sasawa qikiŋne‐narehuc go mocjaha ŋonâŋ‐ticne jukicte sakare‐narewec. Ehame no wemocko hehesic iŋucne sâko moc bâfuahuc Anutu bunao bapemu.” 10 Eme ŋokac e ʒoaŋne ʒoaŋne Josefe jâiŋkehuc jume sifu sanaŋkerâ ehec juc foc eocte takickeme dâŋticne qikeŋnewec. 11 Eme ʒoaŋ mocko kiŋaŋ qaqa gâcne jaŋe mocko juhapie Josefezi gie‐ticne baocte ficko fewec. 12 Eme ŋokac e Josefere ŋaqi rorâ basanaŋkehuc muwec: “Go ware nohec fonac.” Eki ine ŋaqi‐ticne hetarame ere meo foha wiserâ hae ʒoŋao wahawec. 13 Eme ŋaqi‐ticne hetararâ hae ʒoŋao huwec, ŋokaczi iŋuc honerâ 14 kiŋaŋ qaqafâcne wira‐jarerâ ʒiŋuc jazawec: “Keci honeniŋ! Potifa e Hebiraio ŋic moczi kosa enâreocte baware‐nârewec i! E nohec foocte wefume owa ruruckepac. 15 Eme owa ruruckepe manarâ ŋaqi‐ticne norao hetararâ hae ʒoŋao hujec.” 16 Eme ŋaqi‐ticne râeme foha Josefe bomboŋ‐ticnezi risiewec. 17 Eme binaŋ ijaha bacnehuc muwec: “Hebiraio kiŋaŋŋic jowa waremeŋ, e wiac kosa enareocte wefujec i! 18 Eme no owa ruruckerâ wirape ŋaqi‐ticne norao ʒi hetararâ mâc wiserâ hae ʒoŋao hujec.”

19 Eme bomboŋ‐ticne e, ŋonâŋnezi “Kiŋaŋ qaqage e iŋuc enarejec” muhuc dâŋ binaŋ ecneme manarâ mâretec aarickewec. 20 Eme Potifa e Josefe rorâ kâpâcwâru ficko, ŋicwofuŋte kâpâcwâru ŋic ŋembiŋkoa râewec, eme ira fohuc juwec. 21 Ehame Wofuŋzi Josefehec juhuc kâpâcwâru fic soŋaŋ ecneme eki Josefere maname biaŋkewec. 22 Irec kâpâcwâru fic soŋaŋ e Josefezi kâpâcwâru ŋic sasawa soŋaŋ‐jopaocte erao râec‐jopa‐fârewec. Eme jaŋe wiac ebac embiŋ i Josefere micte efârembiŋ. 23 Eme kâpâcwâru fic soŋaŋ e Josefezi giedâŋ i me i muwec ira ʒuhuckerâ dâŋ moc mi muwec, i Wofuŋzi Josefehec juhuc bafickeme wiac ebac eme biaŋke‐fârewecte iŋuc ewec.