1 Eme wiac keci fuawec irec faicnao ŋicwofuŋte waiŋ soŋaŋ micne â poroŋ ririke micne jahe gie‐jekic bâsifuckepic. 2 Eme Farao e kiŋaŋŋic jahec‐ticne, waiŋ soŋaŋ micne â poroŋ ririke micne hâcne, jahere aarickewec. 3 Irec mume momori micne ere ficko, kâpâcwâru ficko hâcne, râec‐jofambiŋ. Josefezi ine fic ijaha fowec. 4 Eme momori micne e Josefezi kiŋaŋ qajacteocte mucnewec. Ehame jahe dameŋ ŋondeŋ bembeŋne kâpâcwâru ficko ʒuhuckerâ fopic. 5 Ehuc dameŋ mocko ŋafe ijaha guŋ manapic. Moc e guŋticne moc manawec â moc e guŋticne moc manawec, guŋ manapic i ine fuŋnehec. Aigita ŋicwofuŋte waiŋ soŋaŋ micne â poroŋ ririke micne kâpâcwâru ficko fopic, jahe hâcne iŋuc epic. 6 Eme hae fureme Josefezi jahere ficmaŋko ferâ busâqoc hawari ŋehapire honec‐jofawec. 7 Honec‐jofarâ indiŋ‐jofahuc muwec: “Ŋohe miŋecgac wemocte busâqoc hawari ŋekopirec?” 8 Mume jahe âzâcnepic: “Nâhe guŋ manaperec, erâ ŋic moczi irec fuŋne nâsâocte basakoperec.” Eme Josefezi muwec: “Guŋte fuŋne mumu i Anuture wiac, erâ sifu binaŋ banarenic.”

9 Eme waiŋ soŋoŋ micnezi guŋ manawec irec binaŋ bahuc muwec: “No ʒiŋuc manapac: Maŋfuŋ‐naneo waiŋ qizecne fuame honepac. 10 Eme gitecne jahec â moc heha hehame ârine qajec, erâ izia wâc fârine fuarâ qeuejec. 11 Noni ine Faraore râqâc menanezi badomahuc hândâŋne rorâ bâpisickepe râqâcko hume Farao menao râepe rowec.” 12 Eme Josefezi âzâcnewec: “Irec fuŋne ʒiŋuc: Gitecne jahec â moc izi ʒoaŋ jahec â moc irec sâc ekac. 13 Ʒoaŋ jahec â moc tarame Faraozi bârisiecgurâ mocwâc giegao râecguocmu, eme go mârâc waiŋ soŋaŋ micne juhuc Farao râqâc râcnehuc jumeŋ iŋuc jaha mocwâc ehuc jucmu. 14 Iŋuc erâ bubiaŋ faio juhuc ine nore mac manasuhuc fuŋne‐nane Farao âzâcnezemec, iŋuc ehuc baficnutec fic ʒi behezepac. 15 Manakic, no Kanaaŋ mâreŋkonec fiuc rocnukicne â ʒira iŋuc jaha wiac sâqocne moc mi ehape oma jâmbâŋ kâpâcwâru ficko râecnumbiŋ.”

16 Eme poroŋ ririke micne e, Josefezi guŋte fuŋne biaŋne mutaniŋkejec, iŋuc honerâ ʒiŋuc âzâcnewec: “No guŋ manapac wâc, kecʒiŋuc: No amae jahec â moc poroŋhec qizecko huhuckepac. 17 Ehame amae faine ŋejec ira Faraore biŋne nânâ poroŋ aŋacne fuŋne fuŋne foha wipe jaŋe ware irecnec nâmbiŋ.” 18 Eme Josefezi dâŋ ʒiŋuc bâtikiecnewec: “Irec fuŋne kecʒiŋuc: Amae jahec â moc izi ʒoaŋ jahec â moc irec sâc jaha. 19 Ʒoaŋ jahec â moc tarame Faraozi mume jâcko bituacguniŋmu, eme wipe jaŋe biucge nâfâreniŋmu.”

20 Eme ʒoaŋ jahec â moc tarame Farao fufua hombaŋ‐ticne maickeme kiŋaŋ qaqafâc‐ticne jaŋere tiwâ bâzi ewec. Ehuc kiŋaŋ qaqafâcne jaŋere ŋondeŋko waiŋ soŋaŋ micne â poroŋ ririke micne jahere dâŋ mutarawec. 21 Ehuc waiŋ soŋaŋ micne e râqâc‐ticne mocwâc râcneocte mucnewec, mârâc gie‐ticnao râewec hâcne. 22 Poroŋ ririke micne e ine Josefezi jasawec irec sâcko bituambiŋ. 23 Waiŋ soŋaŋ micne eki ine Josefere mocwâc mi manasuwec, mâc nâme nikec erâ juwec.