1 Eme Josefe e orâŋkerâ domambiŋ ŋic i jaŋere maio bu heheric ecneme ʒiŋuc muwec: “Ŋic ejarepie hufâreniŋ.” Iŋuc mume hufârepie Josefezi hahacfâcne fuŋne‐ticne mutaniŋke‐jarewec. 2 Eme ki kâcɋene kiowecte Aigita ŋic jaŋe manambiŋ, â Faraore ficko jumbiŋ jaŋe wâc mâmâc mana‐fârembiŋ. 3 Eme Josefezi hahacfâcne ʒiŋuc jazawec: “No Josefe, mamac‐nane jukac me?” Hahacfâcne jaŋe ine fâfâre sâqorehuc mâc bipic tatara domambiŋ.

4 Ehame Josefezi hahacfâcne jazawec: “Ŋoŋe ware mai domaniŋ!” Eme jaŋe rarâ mai domahapie ʒiŋuc muwec: “No ɋaŋeŋic Josefe, Aigita ŋic jaŋerao râecnuhuc furi rombiŋ, no hâcne ʒi. 5 Eme ʒi mi hâwic‐ŋopaoc â busâqoc boc mi mananiŋ, furi‐nane rohuc Aigita ŋic jaŋerao râecnumbiŋ i no juju‐ŋeŋic dopeckepemurâ Anutuzi sorecnume bânie‐ŋarerâ warepo hâcne. 6 Ʒi roroc foha biac jara jajahec tarakac, erâ he sarac â qa roro mi ee mâc jufekuhapene ʒuhuckerâ jara 5 taraocmu. 7 Garikiŋfâc‐ŋeŋic jaŋe mâreŋko mi omaeniŋte â ŋoŋeraonec bocjahazi mi hâhâmo jufehuc juniŋte Anutuzi sorecnume bânie‐ŋarerâ warepo hâcne. 8 Irec ŋoŋe mâcne, Anutuzi sorecnume warepo, eki hâcne Farao mamac ecnehuc ficticnere soŋaŋ â Aigita mâreŋ sâko irec ŋicbomboŋ jupemurâ râecnuwec. 9 Irec ʒi bâruŋ jaha mamac‐nanerao risierâ âzâcnenʒepieŋ: ‘Ŋokâge Josefe e gore dâŋ ʒiŋuc mukac: Anutuzi Aigita mâreŋ sasawa irec ŋicbomboŋ râecnuwec, irec go ŋeŋe râqâc mi ehuc biac norao warezemec. 10 Erâ Goseŋ mâreŋ bembeŋko fokac ira ŋec juc ezemec, go mecne, ŋokâ ŋosafâcge mecne, lama bulimakaofâcge mecne, erâ wiac fogarekac sasawa i mâmâc. 11 Go ira juhaŋtec hone jauŋ egarepemu, i roroczi ʒuhuckerâ jara 5 foha go â wiacfâcge erâ wiac jugarekac sasawa ŋoŋe tac qararacne erâ junʒipiŋte iŋuc ezemec.’ 12 No nahac ŋoŋehec dâŋ dâŋ ekopac i ŋoŋe ʒâŋe fâri‐ŋeŋiczi honeŋgopieŋ erâ ɋanane Benjamiŋzi wâc honekac. 13 Eme Aigita mâreŋko gie fekicne munarekicne bahuc jukopac i mecne, â wiac gâcne hone manac embiŋ irec binaŋ mâmâc mamac‐nane bacne‐fârenʒepieŋ, ehuc biac jaha jowa warenʒepieŋ.” 14 Iŋuc murâ ɋaticne Benjamiŋhec hâhâpoc ehuc kikioc epic. 15 Eme hahacfâcne sasawa hâpo mickukuc ejarehuc kiowec. Iŋuc ejareme hahacfâcne jaŋe ehec dâŋ dâŋ embiŋ.

16 Eme Faraore ficko dâŋ biŋe ʒiŋuc ra fisiwec: “Josefe hahacfâcne jaŋe warembieŋ.” Eme Farao â kiŋaŋŋicfâcne jaŋe biŋe i manarâ bujeŋic biaŋkewec. 17 Eme Faraozi Josefe âzâcnewec: “Hahacfâcge ʒiŋuc jazac: ‘Ŋoŋe becâsicfâc‐ŋeŋic jaŋere faio nânâ mafa râepie feme Kanaaŋ mâreŋko risierâ 18 mamac‐ŋeŋic â ŋonâŋ naru motecfâc‐ŋeŋic norao jowac‐jopa warenʒepieŋ. Eme Aigita mâreŋko mâriri sâko fokac i hâcne ŋarepe mâreŋ ʒirec nânâ qowi nâ bac enʒepieŋ.’ 19 Go ine ʒiŋuc jazacmurâ gazakopac: ‘Ŋoŋe ŋonâŋ motecfâc‐ŋeŋic jaŋere erâ Aigita mâreŋkonec keretac bararâ mamac‐ŋeŋic jowa warenʒepieŋ. 20 Erâ wâc wiac‐ŋeŋic gâcnere mana mezac mi enʒepieŋ, Aigita mâreŋ sâkoo wiac fâri biaŋ jâmbâŋ fuaekac izi ŋoŋere biŋe ezejec.’ ”

21 Eme Israe ŋokâfâcne jaŋe iŋuc hâcne embiŋ. Ehame Josefe e Faraore micte keretac â hatare nâsiŋ jarewec. 22 Erâ ru sâc hombaŋ ŋaqi mocjaha mocjaha jarehuc Benjamiŋ ine hombaŋ ŋaqi 5 â siliwa moneŋ 300 râcnewec. 23 Ehuc mamac‐ticnere ine doŋgi 10, fainao Aigita mâreŋte wiac fâri biaŋ râekicne jaŋe mecne â doŋgi ŋokacne 10 padi â poroŋ â hatare nâsiŋhec jaŋe mâmâc râec‐jopame rambiŋ. 24 Iŋuc ehuc hahacfâcne râec‐jopahuc ʒiŋuc jazawec: “Ŋoŋe hatao rahuc mumu hehec mi enʒepieŋ.” 25 Iŋuc ejareme jaŋe Aigita mâreŋkonec fahare raku Kanaaŋ mâreŋko mamac‐jeŋic Jakoborao fisimbiŋ. 26 Fisirâ dâŋ binaŋ ʒiŋuc ecnembiŋ: “Josefe e jukac, ehuc Aigita mâreŋ sasawa irec ŋicbomboŋ jukac hâcne.” E ine dâŋjeŋicte maname fârine mi eha maŋticne gâckewec. 27 Ehame jaŋe Josefezi dâŋ jazawec sâc âzâcne‐fârembiŋ. Eme Josefezi mamac‐ticne roocte keretac râewec i ware fisime mamac‐jeŋic Jakobozi honerâ maŋne fie ruruckewec. 28 Eme muwec: “Sâcne, ŋokâ‐nane Josefe jukac, no mi honehuc hâmozipore biac ra honezepac.”