1 Eme Israe e wiac‐ticne sasawa ame susuckerâ ra Bere‐Seba haeo fisirâ mamac‐ticne Isakare Anutu bâzi rikecnewec. 2 Eme Anutuzi guŋko Israe ʒiŋuc âzâcnewec: “Jakobo, Jakobo!” Eki ine muwec: “No ʒi.” 3 Eme muwec: “No mamacgere Anutu. Go Aigita mâreŋko racmurâ mi hâwicguoc, no ira basawecgupe ŋicguru sâko ezemec. 4 No gohec mâmâc Aigita mâreŋko ra jupemu, erâ juku irecnec mocwâc bârisiecgupemu, Josefezi ine ʒâŋege bâhâpozejec.” 5 Iŋuc âzâcneme Jakobo e Bere‐Seba haeonec fahareme ŋokâfâcne jaŋe mamac‐jeŋic mecne, naru motecfâc‐jeŋic mecne, ŋonâŋfâc‐jeŋic mecne mâmâc keretac faio râec‐jopapie fembiŋ. Faraozi Jakobo roocte keretac râeme warewec, ira hâcne. 6 Erâ qowifâc‐jeŋic â mafa wiac‐jeŋic Kanaaŋ mâreŋko hurembiŋ i mâmâc rocjoparâ raku Aigita mâreŋko fisimbiŋ. Jakobo â ɋâricfâc‐ticne sasawa 7 ŋokâ otâfâcne â ŋosafâcne hâcne Aigita mâreŋko bacjopa rawec.

8 Ʒi ine Israe ɋâricfâcne Aigita mâreŋko fisimbiŋ jaŋere ʒâŋe biri, Jakobo â ŋokâfâcne hâcne: Mârâc ŋokâ‐ticne Rubeŋ. 9 Rubeŋ ŋokâfâcne ine ʒiŋuc: Hanoki, Palu, Hezoroŋ â Karami. 10 Simeoŋ ere ŋokâfâc ʒiŋuc: Jemuele, Jamiŋ, Ohada, Jakiŋ erâ Kanaaŋ ŋokac ere ŋokâ Saulu. 11 Lewire ŋokâfâc ʒiŋuc: Geresoŋ, Kohati â Merari. 12 Juda ere ŋokâfâc ʒiŋuc: Ero, Onaŋ, Sela, Pereze â Sera. Ero â Onaŋ jahe ine biac Kanaaŋ mâreŋko hâmopic. Eme Pereze ere ŋokâ jajahec ʒiŋuc jupic: Hezoroŋ â Hamulu. 13 Isasa ere ŋokâfâc ʒiŋuc: Tola, Puwa, Jasubu â Simoroŋ. 14 Sebuloŋ ere ŋokâfâc: Serede, Eloŋ, â Jalele. 15 Leazi Mesopotamia mâreŋko Jakobore ŋokâ rocjopawec ine hâcne, erâ otâ‐ticne Sine mâmâc; qâhâckepene naru motec 33 eŋgopieŋ. 16 Erâ Gadere ŋokâfâc: Ʒifioŋ, Kagi, Suni, Eziboŋ, Eri, Arodi â Areli. 17 Ase ere ŋokâfâc ʒiŋuc: Imina, Isiwa, Isiwi, Beria â seŋjeŋic Sera. Erâ Beria ŋokâ jahec‐ticne Hebere â Malikiele. 18 Labaŋzi otâ‐ticne Lea Silipa râcnewec, e Jakobore ŋokâfâc 16 rocjopawec hâcne. 19 Jakobo ŋonâŋ‐ticne Rahe ere ŋokâ ine Josefe â Benjamiŋ. 20 Josefe e ine Aigita mâreŋko ŋokâ jajahec fuacnepic, ʒâŋe‐jekic Manase â Eferaim. Ine Oŋ haeonec taha bapa Potifera ere otâ Asinatizi rocjafawec. 21 Benjamiŋte ŋokâfâc ine ʒiŋuc: Bela, Bekere, Asibele, Gera, Naemaŋ, Eki, Rosi, Mupim, Hupim â Arada. 22 Rahe e Jakobore ŋokâfâc 14 i jaŋe hâcne rocjopawec. 23 Daŋ ere ŋokâ Husim mocjaha. 24 Naftali ere ŋokâfâc ʒiŋuc: Jazele, Guni, Jezera â Silem. 25 Labaŋzi otâ‐ticne Rahe Biliha râcnewec eki Jakobore ŋokâfâc rocjopawec jaŋere ʒare 7 hâcne. 26 Ŋic ŋokac sasawa, Jakobore bifuŋko fuambiŋ erâ Aigita mâreŋko ra fisimbiŋ, jaŋere ʒare qâhâckepene 66 ekac. Jakobo ŋokâfâc‐ticne jaŋere ŋonâŋfâc ine jaŋerao mi ʒuhuc‐jopakicne. 27 Josefere ŋokâ, Aigita mâreŋko fuacnepic ine jajahec sawa. Jakobore wiacfâc Aigita mâreŋko fisi‐fârembiŋ jaŋere ʒare 70 hâcne.

28 Jakobo e Juda soreme Joseferao bânierâ rawec, i biŋe âzâcneme Goseŋ mâreŋko raocte iŋuc ewec. 29 Josefezi mume keretac baʒawiecnepie mamac‐ticne Israe bâfuaocte Goseŋ mâreŋko rawec. Ra bâfuarâ hâpohuc boc kiowec. 30 Eme Israezi Josefe âzâcnewec: “Go juhaŋtec jaha ʒâŋe maige honekopacte ʒi sâcne afeckerâ hâmopemu.” 31 Eme Josefezi hahacfâcne â mamac‐ticnere wiacfâc ʒiŋuc jazawec: “No ra Farao dâŋ binaŋ ecnehuc ʒiŋuc âzâcnepemu: ‘Hahacfâc‐nane â mamac‐nanere wiacfâc jaŋe Kanaaŋ mâreŋko jumbiŋzi norao ware fisimbiŋ. 32 Erâ jaŋe lama soŋaŋ juhuc bulimakao gie baeŋgopieŋ wâc, irec lama â bulimakaofâc‐jeŋic â wiac‐jeŋic sasawa amec‐jopa warembiŋ.’ 33 Eme Faraozi hefârec‐ŋoparâ, ‘Ŋoŋe wemo gie bahuc jueŋgopieŋ,’ 34 iŋuc wio‐ŋareme ʒiŋuc âzâcnenʒepieŋ: ‘Kiŋaŋ qaqafâcge nâŋe mamacfâc‐nâŋec jaŋe iŋucne ɋie‐nâŋeckonecteaŋ qowi gie bapa jumbeŋzi jueŋgopeneŋ.’ Ŋoŋe iŋuc âzâcnepie Goseŋ mâreŋko juniŋte mana‐ŋareocmu; i Aigita ŋic jaŋe lama bulimakao soŋaŋ jaŋere manapie mamakâcne eekac irec.”