1 Dariusi e ŋicwofuŋ erâ juhame jara namba 2 irec mosa namba 7 â ʒoaŋ gie bapa 21 ira porofete Hagaizi ŋic ŋokac Wofuŋte dâŋ kecʒiŋuc muhuc jazawec: 2 “Go Sealitiere ŋokâ Serubabe, Juda mâreŋ soŋaŋ hâcne, â Jozadac ŋokâ‐ticne Josua taha bapa sâko, erâ ŋic ŋokac ʒanʒaŋne sasawa dâŋ ʒiŋuc jazac: 3 ‘Ŋoŋeraonec moczi mârâc jaha fic keci eri qaraweŋ‐ticnehec ŋehame honewec? Â ʒiŋuczia ine hawarine weniŋuc fuame honeŋgopieŋ? Honepie wiac omane ekac me weniŋuc? 4 Wofuŋzi ʒiŋuc mukac: O Serubabe, go hâbige roc, â Jozadacte ŋokâ, Josua taha bapa sâko, go wâc hâbige roc, erâ mâreŋ ʒirecnec ŋic ŋokac sasawa ŋoŋe hâbi hârohec erâ junʒepieŋ. No ŋoŋehec juekopacte gie baniŋ, Anutu Tâpiri Ɋuŋɋasaŋ Wofuŋ nore dâŋ iŋuc. 5 Aigita mâreŋkonec wahahapie dâŋ mupaŋke‐ŋarepo irec sâcko ŋoŋehec juekopac hâcne. Mâro‐nanezi ŋoŋehec juekacte mi hâwic‐ŋopazejec. 6 Anutu Tâpiri Ɋuŋɋasaŋ Wofuŋ no ʒiŋuc mukopac: Piticne jufenaŋmu, eme dameŋ moc ira noni sambâŋ â mâreŋ, hâwec â tiki itiriŋ‐jopapemu; 7 erâ ŋic gurune gurune ejarepe qiriŋ qafâreniŋmu. Eme boreŋ‐jeŋic ʒira ware‐fâreme noni mupe eri qaraweŋzi fic kecʒi fusucmaocmu, Anutu Tâpiri Ɋuŋɋasaŋ Wofuŋ nore dâŋ iŋuc. 8 Siliwa mecne, gol mecne irec rune noni jukopac, Anutu Tâpiri Ɋuŋɋasaŋ Wofuŋ nore dâŋ iŋuc. 9 Ufuŋ kecʒirec eri tatamac mârâc fowec i wawahane ehame ʒâhec fuaocmuzi fefene jâmbâŋ eocmu, Anutu Tâpiri Ɋuŋɋasaŋ Wofuŋ nore dâŋ iŋuc. Eme hae mâreŋ kecʒira wama mupe fuaocmu, Anutu Tâpiri Ɋuŋɋasaŋ Wofuŋ nore dâŋ iŋuc.’ ”

10 Dariusi e ŋicwofuŋ erâ juhame jara namba 2 irec mosa namba 9 â ʒoaŋ gie bapa 24 ira Wofuŋtaonec dâŋ porofete Hagai erao ʒiŋuc fuawec: 11 “Anutu Tâpiri Ɋuŋɋasaŋ Wofuŋ eki ʒiŋuc mukac: Go taha bapa numu‐jaretec wiwio kecʒiŋuc irec okacne bâtikie‐garenʒepieŋ: 12 ‘Ŋic moc e qowi jambuŋkekicne ŋaqi qoruc‐ticnezi foŋkerâ bajuhuc nânâ poroŋ me nânâ rikekicne, me waiŋ me wokemaŋ, me wiac nânâne i me i heuwame tiri moc eocmu me?’ ” Eme taha bapa jaŋe mumbiŋ, “Aricne.” 13 Eme Hagaizi muwec: “Ŋic moc e ine qâŋɋâŋ moc bâuwahuc wâwânâŋhec erâ ʒâhec wiac keci jaŋe moc heuwac‐jopame wâwânâŋhec eniŋmu me?” Mume taha bapa jaŋe mumbiŋ: “Eha wemo, wâwânâŋhec eniŋmu hâcne.” 14 Iŋuc mupie Hagaizi muwec: “Ŋicguru ʒi nore maŋfuŋko juŋgopieŋ jaŋe jaŋacne fuŋne mecne â meqâreŋ‐jeŋicte fuŋne mecne i sâc ijaha fokac, irec wiac i me i tahare râeeŋgopieŋ i wâwânâŋnehec jaha eekac. Wofuŋ nore dâŋ iŋuc. 15 Erâ ʒuhuckerâ ʒiŋuc mukopac: Ŋoŋe ʒi wiac weniŋuc fua‐ŋare raocmu i hone manac enʒepieŋ, ehuc fic kecʒirec wâtuŋ mi râepie huwec dameŋ ira wiac weniŋuc fua‐ŋarewec i wâc mâmâc manasunʒepieŋ. 16 Ŋoŋe padi gie mockonec târu 20 irec sâc ro ŋihec enaŋmu muhuc ra târu 10 irec sâc sawa fome rombiŋ, me waiŋ bapa ficko ira waiŋ pake 50 fiapene hurâ fusucmaocmu muhuc rarâ fiapie pake 20 sawa hurâ fusewec. 17 I ʒiŋucte fuawec: No bâʒâic‐ŋopahuc mupe giegaŋ‐ŋeŋicte fârine gâcne ʒoaŋ fâroroczi ʒâhâmome kenoŋkewec, â gâcne hoe sanaŋzi henʒaŋnewec, ŋoŋe ine maŋŋeŋic mi bârisiembiŋ. Wofuŋ nore dâŋ iŋuc. 18 Irec ŋoŋe mosa namba 9 irec ʒoaŋ gie bapa 24 ʒirecnec fuŋkerâ jufehuc wiac weniŋuc fua‐ŋare raocmu i hone manac enʒepieŋ. Wofuŋ nore taha ufuŋte wâtuŋ miŋecgac mocwâc râepie huhame wiac kecʒiŋuc hone manac enʒepieŋ: 19 Wiac ukicnezi rowaŋko jaha sâcne mocwâc mi foocmu, â waiŋ qizecne â jâmbojâc â hâmeŋ fâric â oliwa jâc jaŋe fâri tâmiric mi domaniŋmu, aricne, no miŋecgac hâcne fuŋkerâ jambuŋ‐ŋopa rahuc jupemu.”

20 Mosa irec ʒoaŋ gie bapa 24 ira Wofuŋtaonec dâŋ kecʒiŋuc Hagairao fuame arecne jajahec ewec: 21 “Go Juda mâreŋ soŋaŋ Serubabe ʒiŋuc muhuc âzâcnec: No sambâŋ â mâreŋ itiriŋ‐jofazo ekopac. 22 Ehuc ŋicne ŋicne jaŋere ŋicwofuŋ ŋeŋe herândiŋ‐jopa‐fârepe omaeniŋmu; no ŋic gurune gurune tâpiri‐jeŋic bawahahuc keretac â fainao ŋeeŋgopieŋ jaŋe hetuŋ‐jopapemu, ehame becâsic mecne â irec faio ŋeeŋgopieŋ mecne jaŋe jaŋac qaqac ehuc qâqâhâmoc efâreniŋmu. 23 Anutu Tâpiri Ɋuŋɋasaŋ Wofuŋ no ʒiŋuc mukopac: No dameŋ ira kiŋaŋŋic‐nane Serubabe, Sealitiere ŋokâ hâcne, go rocgurâ mefâro‐nane bacgupemu, noni hâcne rowosâecgupo. Anutu Tâpiri Ɋuŋɋasaŋ Wofuŋ nore dâŋ iŋuc.”