HAGAI
Hagai, Ʒekaria â Maleaki porofete jahec â moc jaŋe Judaŋic gâcne jaŋe Babiloŋ kâpâcwâruonec Jerusalem haeo risierâ juhapie gie‐jeŋic bahuc jumbiŋ. Ine hâcne, Perisia ŋicwofuŋ Kiru eki risieniŋte mana‐jarehuc taha ufuŋte wâcwiac ʒikao barâ rakicne i mocwâc bârisie‐jarerâ taha ufuŋ heɋârerâ baniŋte moneŋ mafa wiac gâcne mâmâc jarewec. Eme jaŋe risierâ taha ufuŋte gie i sifu ʒoɋachec mi bambiŋte fârine biac mi fuawec. I ʒiŋucte: Jaŋacne hesarac gie â fic hae gie wâc bocjaha fowec, â qâpuc rârec rârec jurambiŋ jaŋe moc mi babafic‐jopa râsi ejarehuc jumbiŋ. Iŋuc juhapie porofete Hagaizi gie‐ticne fuŋkewec.
Gaŋ 1. Ira Judaŋic jaŋe jaŋacne fic wiac sawa baniŋte manasuhuc Wofuŋ taha ufuŋ‐ticnere nikec‐jopame mi sâckewec irec dâŋ fokac.
Gaŋ 2:1–9. Ira taha ufuŋ ɋâricne i eri qaraweŋnehec erâ ŋeocmu irec findaŋdâŋ woseŋgopeneŋ.
Gaŋ 2:10–14. Wofuŋtaonec dâŋ namba 3 izi taha bâzi sâqocne beheniŋte jazakac.
Gaŋ 2:15–19. Ira ine taha ufuŋ bapie irec jambuŋzi ŋic ŋokac jaŋerao fotâcneocmu wâc irec findaŋdâŋ qâreŋkekicne.
Gaŋ 2:20–23. Ira, qâpuc jaŋere uucmaŋ tâtieme Wofuŋzi Serubabe kiŋaŋŋic sâko‐ticne âkendâŋneocmu irec findaŋdâŋ fokac.
Porofete Hagai ere papia i jara dameŋ 520 B. C. irec faicnao mecne qâreŋkekicne. Dâŋticnere fuŋne ine ʒiŋuc honeŋgopeneŋ: Porofete dâŋte hata moc fuazo ewec. Porofete juwicnao jumbiŋ jaŋe ʒiŋuc mujumbieŋ: Wofuŋtaonec okacne fua‐jareme ŋic jaŋe maŋ bâbârisie bâfuapie bâbâpiaŋ dameŋ fua‐jareocmu wâc. Dâŋ iŋucne ine ʒira mocwâc mi fuakac. Ʒira bâbâpiaŋ dameŋte mukicne i taha ufuŋ heheɋârere fârine fuaocmu, irec sawa manasuhuc mukicne. Izi ine ʒiŋuc mufua‐nârekac: Judaŋic ʒâhec jumbiŋ jaŋe maŋ bâbârisiere mâcne, taha ufuŋko gie bapa irec manapie wiac fârine jâmbâŋ ewec. Me ʒiŋuc: Maŋ bâbârisie mâcne, sâcmutâc dâŋ rereŋke izi miti babaju fârine ekac. Dâŋ i hâcne juku Jesu e mâreŋko waharâ juha baju jumbieŋ.
1
Taha ufuŋ baniŋte esoc qafeŋ ejarekicne
1 Dariusi e ŋicwofuŋ erâ juhame jara 1 â mosa 5 tarawec. Eme mosa 6 fufuŋkenao ira porofete Hagaizi Juda mâreŋ soŋaŋ Serubabe, Sealitiere ŋokâ, â taha bapa sâko Josua, Jozadacte ŋokâ hâcne, jahe Wofuŋte dâŋ ʒiŋuc jasawec: 2 “Anutu Tâpiri Ɋuŋɋasaŋ Wofuŋ e kecʒiŋuc mukac: Ŋicguru kecʒi jaŋe ʒiŋuc mueŋgopieŋ: Wofuŋte ufuŋ heɋârehuc bazore dameŋne mi maickekac.” 3 Eme porofete Hagaizi Wofuŋte dâŋ ʒuhuckerâ kecʒiŋuc muwec: 4 “Wofuŋte ufuŋ ima bakicnezi foha ŋaŋacne fic ba akic ekicnao ŋec foc eniŋte dameŋne maickekac me? 5 Irec hâcne Anutu Tâpiri Ɋuŋɋasaŋ Wofuŋ eki ʒiŋuc mukac: Ŋoŋe wiac ʒiŋuc fua‐ŋareekac irec manasuniŋ: 6 Ŋoŋe he sarac bocjaha embiŋ, fârine ine boc mi fua‐ŋarewec, ŋoŋe nânâ nâeŋgopieŋ, erâ sifu mi gapec‐ŋopaekac; ŋoŋe opâ nâeŋgopieŋ, erâ sifu mi sâcŋopaekac; ŋoŋe ŋaqi wiac hepie huekac, erâ sifu mi hâroŋ‐ŋopaekac; ŋoŋe moneŋ gie bahuc moneŋ rorâ kânoŋ‐ŋeŋic hawecnehecko ŋiepie hurâ wahaekac.
7 “Anutu Tâpiri Ɋuŋɋasaŋ Wofuŋ eki ʒiŋuc mukac: Ŋoŋe wiac fua‐ŋarewec irec moc manasunʒepieŋ. 8 Ehuc kâteo ferâ jâcsiec rorâ waha taha ufuŋ banʒepieŋ, eme no irec bubiaŋ manahape huriri qâreŋ‐nanezi fua tâcnezejec, Wofuŋ nore dâŋ iŋuc. 9 Ŋoŋe nânâ wiac bocjaha fua‐ŋareocte giene bapie fârine afecne sawa fuawec, eme i haeo bafisipie noni ficne suepe omaewec. Wemocte? Ŋoŋe ŋaŋacne fic wiac fuaocte ʒoɋac ehuc juhapie nore ficzi ŋetâtierâ ʒaŋke‐fârewec fokac irec. Anutu Tâpiri Ɋuŋɋasaŋ Wofuŋ nore dâŋ iŋuc. 10 Irec sambâŋzi bâpiŋ titikuc aka hecnewec â mâreŋ e ine mazuc mâriri‐ticne sakarewec. 11 Eme no mupe wiac kecʒiŋuczi kereŋke‐fârewec: Mâreŋ â tiki, jacgoŋ â waiŋ, oliwa wokemaŋ â mâreŋko wiac fua‐fâreekac, ehame ŋic â qowi erâ gie bapa‐jeŋicte fârine sasawa sipiricke‐fârewec.”
12 Iŋuc mume Sealitiere ŋokâ Serubabe â Jozadac ŋokâ‐ticne taha bapa sâko Josua, erâ ŋic ʒanʒaŋne jaŋe mâmâc sasawa Wofuŋ Anutu‐jeŋicte dâŋ mecne, â porofete Hagai ere dâŋ mecne mâmâc manarâ reŋkembiŋ, i Wofuŋ Anutu‐jeŋiczi jaŋerao porofete sorewec irec iŋuc embiŋ. Eme ŋic jaŋe Anuture hâwic‐jopame araŋ bacnembiŋ. 13 Iŋuc epie Hagai e Wofuŋte biŋe mumuzi Wofuŋte micte ŋic ŋokac ʒiŋuc jazawec: “No ŋoŋehec jukopac, Wofuŋ no iŋuc mupaŋkekopac.” 14 Eme Wofuŋ e Sealitiere ŋokâ Serubabe, Juda mâreŋ soŋaŋ hâcne, â Jozadac ŋokâ‐ticne taha bapa sâko Josua, erâ ŋic ŋokac gâcne sasawa esoc qafeŋ ejareme ʒoɋac sasanaŋ bâfuarâ ra Anutu Tâpiri Ɋuŋɋasaŋ Wofuŋ‐jeŋic hâcne, ere fic fuaocte giene fuŋkembiŋ. 15 Ine mosa namba 6 irec ʒoaŋ gie bapa 24 ira iŋuc embiŋ.