3
Wofuŋ e Jerusalem hae bâtiŋneme biaŋkewec
1 Jei, hae keci micrereŋ tâmiric
râŋgeŋ qaŋqaŋne juhuc bâbâʒâic gie baekac hâcne!
2 E dâŋ fuame mi manaekac, â bâbâtiŋte takickeekac,
e Wofuŋtao mi roweckeekac, ehuc Anutu‐ticne mi maickeekac.
3 Haemaŋko fekicnefâc‐ticne juŋgopieŋ jaŋe
laioŋzi owackeeŋgopieŋ irec sâc ehuc jueŋgopieŋ,
â dâŋ mumutara ŋicfâc‐ticne jaŋe kâte qâto iŋucne eeŋgopieŋ,
jaŋe nânâ‐jeŋic nâhuc furictere biŋe tiwâne
moc mi behepie foekac.
4 Porofetefâc‐ticne jaŋe ŋic ʒaubacne â burec‐jeŋichec,
erâ taha bapafâc‐ticne jaŋe wiac tirine gâc hecnehuc
sâcmutâc dâŋ muhasickeeŋgopieŋ.
5 Wofuŋzi ine ŋondeŋ‐jeŋicko tiŋne juhuc
wiac moc mi bâsifuckeekac.
E furicne furicne mumutiŋ gie‐ticnere fuŋne bajaŋgeŋkehuc
dameŋ moc mi hetaraekac;
ŋic hehesicne jaŋe ine sifu mimi tâmiric kosa jueŋgopieŋ.
6 “No ŋicguru gâcne bâsirowec‐jopahuc
ficsanaŋ‐jeŋic ima bafârepo.
Ehuc hae hata‐jeŋic sipirickepo,
ira moczi moc rac warec sâcne mi eekac.
Hae wiac‐jeŋic niniŋ siarereŋ fuarâ foha
maŋnao ŋic jaŋe ŋeŋe juju mocwâc mi eeŋgopieŋ.
7 Iŋuc fuame mupo: ‘Ʒi jâmbomac araŋ banarehuc
mumutiŋ dâŋnane mananiŋmu,
ehuc dâŋ jaza mutâc epo i mi nikec‐jopaocmu.’
Jaŋe ine ʒoɋac erâ eebapa‐jeŋic sâqocne
i sueme sue bafembiŋ.”
8 Irec Wofuŋte dâŋ ʒiŋuc fokac:
“Ŋoŋe nore woŋec junʒepieŋ,
dameŋ maickeme no mumutaniŋ ŋic erâ fahare domapemu.
Mumupaŋ‐nane ʒiŋuc fokac:
No ŋic gurune gurune qâzuc‐jopahuc
ŋicwofuŋfâc‐jeŋic jaŋehec hetumaŋ‐jopapemu,
i aaric â kimbeŋ‐nanere ʒoc kine hesiepe
fai‐jeŋicko feocte iŋuc epemu.
Mâreŋ sâko mâreŋ i ʒoɋac‐nanere ʒocbâruŋzi
ʒâseŋke‐fâreocmu hâcne.
9 “Manaŋgopieŋ, no dameŋ ira ŋic gurune gurune
micbipic‐jeŋic bârisiepe ɋaɋackezejec,
eme Wofuŋ nore ʒâŋe riwaseckehuc
maŋ mocjaha erâ kiŋaŋ qanare‐fârenʒepieŋ.
10 Bâtâtiec‐jopakicnefâc‐nane jaŋe
Etiopia opâ sâko ocniŋucnaonec ware fisirâ
numu‐narehuc taha banareniŋmu.
11 “Ŋoŋe sâqocne fuŋne fuŋne bahuc bunaneo bambiŋ,
irec erâ dameŋ ira mimi faio mocwâc mi râec‐ŋopazo.
Pepec penaroŋ ehuc jueŋgopieŋ
jaŋe ŋondeŋ‐ŋeŋickonec bârâriec‐jopapemu hâcne,
ehame ŋoŋe iŋuc jaha tiri tiki‐naneo penaroŋhec mocwâc mi juniŋmu.
12 No ŋondeŋ‐ŋeŋicko ŋic maŋhuhuŋ â waha qaqane
jaŋe sawa bâtiric‐jopape juniŋmu,
ehuc Wofuŋ nore ʒâŋeo roweckepie
sâoc‐jopahape juniŋmu.
13 Israe ŋic ʒanʒaŋne jaŋe hâcne sâqocne mi baniŋmu,
â burecdâŋ mi muniŋmu,
erâ nameŋ‐jeŋiczi eeatuc mi eocmu.
Jaŋe nânâ nâku waha fomanahapie
moczi moc hâhâwic mi hejareocmu.”
14 O Zioŋte otâ, go gae hesokahuc hec!
O Israe, go semuja hec!
O Jerusalemte otâ,
go bubiaŋ manahuc ʒeri bari ec!
15 Wofuŋ e kisâfâcge bârâriec‐jopawec,
â râsifâcge bâsirowec‐jopawec.
Israere Femicne, Wofuŋ hâcne, eki gohec jukacte
wiac hâhâwicnezi mocwâc mi fua‐garezejec.
16 Dameŋ ira Jerusalem hae e dâŋ ʒiŋuc âzâcnezo:
“O Zioŋ, go mi hâwicguzejec,
â mege mi betaŋkezejec.
17 Wofuŋ Anutuzi gohec juekac,
e qac momoriheczi baficguekac hâcne.
E gore bubiaŋ sâko manahuc maŋjauŋ‐ticnere erâ bâpiaŋguekac,
erâ hombaŋ dameŋko ʒeri eeŋgopieŋ
irec sâc gore erâ ʒeri eekac.”
18 Wofuŋzi ʒiŋuc mukac:
“Sisipiriczi mimi bâfua‐garewecte
no i hâcne bârâriepemu.
19 Manakic, no dameŋ ira bâbâʒâicfâcge
jaŋe fisi‐jarerâ omaec‐jopapemu,
ehuc kike demba jaŋe bâpiaŋ‐jopapemu,
â bâtâtiec‐jopakicne jaŋe qâzuc‐jopapemu.
No mimi gaŋgaŋ‐jeŋic hetikiepe
ʒeri mumuteŋzi biŋe raranehec fuame
mâreŋ sâc mana‐fârenʒepieŋ.
20 Qâzuc‐ŋopapemu dameŋ ira hâcne jowac‐ŋopape
mame sâko hae‐ŋeŋicko risienʒepieŋ.
 busâqoc faio juju‐ŋeŋic hetikiepe
bubiaŋ faio juju fua‐ŋareocmu dameŋ ira wâc mupe
ʒâŋe biŋe‐ŋeŋiczi â mumuteŋ‐ŋeŋiczi mâreŋ sâc ŋic sâcjopa‐fârezejec.”